Laugarásheimsókn, föstudagur

Kíktum til Arnars og Unnar (og Unnsteins) að Laugarási.. þar sem þau búa í nokkuð skemmtilegu húsi, ekki beint sumarbústaður eins og við héldum. En mættum í fínni stemmingu eftir að hafa rifjað American Idiot upp á leiðinni.. Iðunn reyndar útkeyrð eftir að hafa „trommað“ nánast allan tímann.

Alli, Hrafnkell Máni og Agla Margrét mættu svo líka.

Við buðum upp á spínatspaghetti í einfaldan kvöldmat og duttum í að spila Fimbulfamb fram eftir nóttu. Létum nægja að koma okkur fyrir í húsinu frekar en að færa okkur yfir í nærliggjandi sumarbústað sem við máttum nota.

Enski boltinn á Hamborgarasmiðjunni

Við Jón Einars fórum seinni partinn á Hamborgarasmiðjuna að drekka bjór og horfa á Manchester United – Chelsea.

Undarlega tilfinning að halda með Manchester United vegna þess að þeir eru lítilmagninn, en ágætt að þeir náðu að jafna..

Október bjór hjá Staka

Gripum smá bjór smökkun eftir vinnu hjá Staka.. aðallega einhverja október-fest bjóra. Verð eiginlega að játa að mér þykja margir þessara árstíðabundnu bjóra ekkert sérstaklega góðir.. jú, jú – fín stemming að smakka, en ég dett nú varla í að drekka mikið af þessu.

En kvöldið endaði svo á póker eftir pool og fleira.. datt út í fjórða sæti.

Bar og leikhús

Fyrsta leiksýning vetrarins.

Byrjuðum á léttum mat á Íslenska barnum, allt í lagi matur, skemmtilegt úrval af bjór – en rútubílasöngstjórinn á píanóinu var ekki alveg það sem við vorum að leita eftir.. vorum svona frekar á þeim buxunum að reyna að spjalla saman.

Þá í Borgarleikhúsið á Bláskjá. Eitthvað vorum við ekki að tengja og eitthvað vorum við ekki að skilja. Stutt (sem var óneitanlega kostur) og einhvern veginn mikil læti utan um lítið annað en klisjur, tilgangslausar tilvísanir og jú, verulega slappa brandara.

En kannski eru þetta bara okkar takmarkanir.

Vínsmökkun, heitir pottur, matur…

Sambindis hittingur í Skildinganesi… bjór, heitur pottur, smávindlar, rauðvin, kjúklingur, Alan Hinton upprifjun, meira rauðvín, ostur..

Ætlaði að ná Ojba Rasta á Húrra.. en enginn annar í stemmingu, fór frekar seint og missti af þeim. Enda ekkert sérstaklega góð hugmynd að vera að þvælast þetta seint…

Stúdíó… Brains

Kíkti aftur í stúdíó – í þetta skipti til að klára demo að Brains.. ekki alveg að virka enn..

Landsleikir og spil í Kaldaseli

Enn eitt spilakvöldið í pókermótaröðinni okkar í Kaldaselinu..

En kvöldið hófst reyndar snemma.

Horfði á Danmörk-Ísland U21 eftir vinnu í Ármúlanum… fín úrslit. Vonandi ná þeir að klára dæmið heima.

Kom svo heim og horfði á Litháen-Ísland.. frábær leikur hjá íslenska liðinu og úrslitin eftir því. Ótrúlegt að sjá íslenskt landslið loksins spila alvöru fótbolta.

Svo mættu Þórhallur, Brynja, Alli og Maggi í spil.. Guðjón tók þátt í því síðasta – við náðum fjórum mótum, sem hefðu reyndar mátt ganga betur.

Lokaútgáfa af „Bugging Leo“

Fór í stúdíó að ganga frá endanlegri útgáfu af nýju lagi Fræbbblanna, Bugging Leo.

Jens var veikur en við gerðum smá lagfæringar á laginu eftir athugasemdum Rikka, en reyndar fengu þær ekki allar náð fyrir okkar eyrum.

Hvað um það, lagið er ekki líkt neinu sem við Fræbbblar höfum gert… og kemur út á safnplötu fljótlega.

Nýtt Fræbbblalag

Við Gummi, trommari, mættum í stúdíó til Jens Hanssonar og Arnórs Sigurðssonar að klára að syngja og ganga frá nýjasta Fræbbblalaginu, Bugging Leo.

Það tókst eiginlega bara nokkuð vel til, en hvað vitum við hvað virkar og öðrum finnst?? En lagið kemur fljótlega á safnplötu…

Blikasigur 40 ára

Kíkti á Kópavogsvöll í hádeginu að hitta gamla félaga úr yngri flokkum Breiðabliks frá áttunda áratugnum. Gaman að hitta hópinn og rifja upp gamlar sögur. Ég var reyndar til þess að gera lítið með 1974 þegar félagið vann þrjá Íslandsmeistaratitla á einum og sama deginum.. en var aðeins með árið eftir þegar við unnum tvo titla.

Horfði svo kvefarður innandyra á Breiðablik taka á móti Val í lokaleik deilarinnar þetta árið.. mikið hrikalega var fúlt að tapa fyrir Þór um síðustu helgi, hefði sá leikur unnist hefði Evrópusæti enn verið í myndinni.

Svolítið undrandi á Valsmönnum, virkuðu áhugalausir og pirraðir og aðallega hafa áhuga á að brjóta á andstæðingunum, hefði ekki komið á óvart þó fleiri en einn hefði verið sendur snemma í sturtu. Frekar daufur leikur framan af, en eftir að Blikar komust yfir var aldrei spurning hvernig leikurinn færi. Þar fyriri utan frekar skrýtið að stuðningsmenn Valsmanna skyldu sitja heima þegar liðið er í færi að ná Evrópusæti.. nema þeir séu ekki fleiri en þetta.