Toscana, RImini, Budapest

11. júní – Hótel Örk, Mílanó

Morgunmatur og svo golf með Bergþóru, Viktori og Iðunni, Alexandra var aðeins með og Guðjón prófaði á síðustu holunum.
Svo gufa með Viktori áður en við fórum heim.
Það var svo (auðvitað) seinkun á fluginu en við fórum til Keflavíkur seinni partinn.
Lentum í Mílanó um tvö og fórum á fínasta hótel, en það var reyndar aðeins frá flugvellinum og lestarstöðinni.

12. júní – Til Toscana

Fínn morgunmatur á hótelinu, Malpensa, svo leigubíll niður á lestarstöð, lest milli stöðva í Mílanó, svo til Flórens og þaðan sú þriðja til Empoli.
Kristín og Þórður sóttu okkur þangað og við fórum upp í sveit, þeas. Toscana, þar sem Hekla, Rakel, Assa, Sesselja og Áslákur biðu,
Þórður bauð upp á þetta frábæra Lasagne um kvöldið.

13. júní – Rigning, Coq au vin

Það rigndi eitthvað þarna, en við Þórður skruppum í smá verslunarferð til Empoli og Iðunn eldaði CocAuVin um kvöldið – virkilega vel heppnað en aðeins öðru vísi en áður.
Við Iðunn tókum lítið pókermót með Kristínu og Þórði, sem ég vann!

14. júní – Rigning, út að borða

Meiri rigning, Dísa, vinkona Össu mætti.
Fór aftur með Þórði til Empoli.
Svo út að borða „upp í fjall“ um kvöldið – maturinn allt í lagi og umhverfið fínt – sérstakt að fá ansjósur úr ómerktri dós.

15. júní – Sól og nautasteik

Við Þórður fórum enn eina verslunarferðina til Empoli, keyptum nautasteik héraðsins og Þórður eldaði, ég græjaði einhvers konar útgáfu af Bernaise sósu, fínasta steik, en matarlystin ekki mikil.
Veðrið eitthvað betra, amk. talvert mikil sól
Rakel fór heim seinni partinn.

16. júní – Hjálmar mættur

Hjálmar mætti á staðinn, það fór aftur að rigna.
En minnir að Dísa hafi séð um matinn.
Við Iðunn kíktum á Leonardo Da Vinci safn og einn bjór í „bænum“, Vinci, aðalsafnið var reyndar lokað.

17. júní – Til Rimini

Næsti áfangastaður, Þórður skutlað okkur til Empoli, um hádegi, þurftum aðeins að bíða eftir lestinni, fjórar ferðir til Rimini, vorum komin sjö / hálf – átta. Fengum mjög fínan mat á hótelinu, Hotel Life, hlaðborð með mjög góðum forréttum og allt í lagi aðalréttum.

18. júní – Fyrsti dagur á Rimini

Fínn morgunmatur á hótelinu, tókum smá rölt um nágrennið, fengum okkur smárétti á Mozi um daginn og ágætan kvöldmat á Nave.

19. júní – Rólegt

Röltum aðeins um nágrennið, gripum kaffi og bjór og snarl á staðnum á móti hótelinu.
Fórum á ítalskan stað um kvöldið, þjónustan ansi hæg, en maturinn fínn.
Gripum bjór á Atlantic um kvöldið, en nú brá svo við að staðurinn tók ekki kort.

20. júní – Ísland – Portúgal

Kíktum á ströndina og gripum snarl á Mozi.
Fengum okkur kvöldmat á hótelinu og horfðum svo á ansi svekkjandi leik Íslands og Portúgals á Mozi barnum.

21. júní – Ströndin

Rólegt á ströndinni, borðuðum á Sitopia um kvöldið, staður aðeins nær miðbænum, mjög góður matur.
Gripum bjór fyrir svefninn.

22. júní – Riccione

Vinnufundur um morguninn, svo sundlaug við hótelið, pizza og krækling á Nave.
Tókum strætó og lest til Riccione.
Bjór, kokkteil, bjór og matur við ströndina.
Furðulegt að það fylgdi matur með á öllum börum.
Tókum strætó frekar seint heim, engir leigubílar í boði.
Sérstakt að það var talsvert um hermenn í fullum skrúða í jeppum á rúntinum í miðbænum.

23. júní – HK – Breiðablik

Rólegt við sundlaugina, fengum okkur snarl á hótelinu og mat þar um kvöldið.
Horfðum á HK – Breiðablik, heldur betur skelfilegur leikur,
Snemma að sofa.

24. júní – Til Budapest

Morgunmatur á hótelinu og leigubíll upp á flugvöll.
Stutt og þægilegt flug, upp á hótel og fínasta snitsel í kvöldmat á hótelinu.

25. júní – Spago og Halli

Rólegur sunnudagur í Búdapest, kíktum í Arena Mall og Iðunn stóð sig svo vel að þegar hún sagðist þurfa að finna klósett þá gerði ég ráð fyrir að hún vildi kaupa..
En kíktum á Spago í frábæran kvöldmat, hittum svo Halla Guðsteins á kokteilbar ekki langt kirkjunni, bar sem Iðunn mundi sérstaklega eftir.
Halli var í fínum gír, var líka í tannaðgerðum, átti að vera farinn heim, en hafði misst af fluginu..

26. júní – Fyrsti dagur í aðgerðum

Iðunn fór um hádegi, ég reyndi að finna út úr vinnuaðstöðu og kaupa græjur en gekk ekki vel, tók megnið af deginum, fann samt hleðslutæki fyrir tölvuna og lyklaborð.
Létum einfaldan mat á hótelinu nægja um kvöldið.

27. júní – Tannlæknir og græjukaup

Iðunn aftur í aðgerðum, ég fór á flakk að kaupa græjur, litlar búðir, lítil enskukunnátta og lítið um græjur.
Fékk Kebab í bænum áður en við fengum okkur gúllassúpu á hótelinu.

28. júní – Skrifstofa, skoða

Kíkti á skrifstofuna sem ég ætla að leigja, Iðunn í stuttri tannlæknaferð, vinnufundur um umhverfismælingar.
Æfing, svo niður í bæ að finna naglaaðgerðastofu, Craft Beer (Madhouse), vínbar, frábær matur á Fabbrica og svo heim, svolítið drukkin.

29. júní – Vinna á hótelinu

Vann aðeins á hótelinu, kíktum í verslunarmiðstöðina á hinum endanum – fengum okkur ekkert sérstakan mat á Terrace.

30. júní – Vinna, Breiðablik – Buducnost

Fór upp á „skrifstofu“ og vann til tvö, sendi reikninga og kláraði nokkur mánaðamótaverk, æfingar, gufa, matur á hótelinu og Breiðablik – Buducnost, 5-0 um kvöldið.

1. júlí – Bæjarflakk

Fórum á smá flakk seinni partinn, eftir nokkur verkefni í vinnunni.
Búðir, barir, allt of síðbúnir smáréttir á Divine?
Matur á Ottimo um kvöldið, Iðunn hafði enga lyst og ég ekki mikla, en greinilega hafði einhver unnið kökukastkeppnina.
Fengum ekki nema flöskubjór á hótelinu, þrátt fyrir 11 tilraunir við að græja úr krana, rukkaði samt eins og við hefðum fengið stóran.
En loftræstingin ekki komin í lag enn..

2. júlí – Annað hótel

Loftræstingin ekki í lagi, fengum að fara á annað Danubius hótel, Helia. Tókum því samt rólega og fórum á indverska staðinn Swaad, en einhvern veginn alveg búin á því og fórum snemma að sofa.

3. júlí – Alexandra mætt

Vinna eitthvað fram eftir degi á leiguskrifstofunni, fórum svo niður í bæ og hittum Alexöndru, sem var einmitt nýkomin í bæinn.
Ekki sátt við Craft bjór staðinn sem við byrjuðum á að prófa en Marriott hótel barinn var lokaður.
Svo að borða á Százéves, fín stemming, mikil lifandi tónlist, jafnvel full mikil, maturinn ekkert sérstakur og undarleg uppákoma í lokin þegar þau báðu um að við borguðum vínið í Evrum og gáfu okkur aðra í staðinn!

4. júlí – Sigling á Dóná

Talsvert að vinna fram eftir degi á leiguskrifstofunni, nýtti hádegið í smá búðarráp. En borðuðum á hótelinu og Alexandra fékk sér bita sjálf.
Fórum svo á siglingu á Dóná með Alexöndru, kannski aðeins of snemma til að skoða upplýstar byggingar í myrkrinu.
Budvar á torginu og horfðum á framlengingu og vítakeppni hjá KA – Breiðablik áður en við fórum að sofa.

5. júlí – Marriott barinn og Gundel

Aðeins að vinna, hittum svo Alexöndru á Marriott barnum, með þetta svakalega útsýni yfir ána, fína drykki, háværa tónlist og talsverðan hita.
Þaðan á Gundel sem bæði Þorsteinn Sæm. og Jóhanna höfðu mælt með. Rosalega skemmtilegur staður með frábærar veitingar og ekki spillti vel heppnuð vínpörunin fyrir. Það var reyndar líka veisla hjá pöddunum á staðnum og Iðunn illa bitin.

6. júlí – Vinna og rölt

Aðeins að vinna fram yfir hádegi, fórum svo á smá rölt frá hótelinu, fyrst meðfram ánni, svo inn að bæ, en fundum ekki mikið af stöðum, loksins þokkalegan bjór bar en svo fljótlega til baka.
Borðuðum á KHAN, asískum stað, frábær matur, en vorum ekki lengi.

7. júlí – Rólegur dagur og Breiðablik – Fylkir

Borðuðum á hótelinu um kvöldið, sem reyndist vera mjög svo óspennandi hlaðborð, horfðum á Breiðablik vinna Fylki 5-1, í frekar döprum útsendingar skilyrðum.

8. júlí – Westend og Nobu – og Póker

Fórum í verslunarmiðstöðina Westend, svo sem ekki mikil frægðarför en allt í lagi að dunda okkur þarna.
Svo á japanska Nobu á Kempinski hótelinu, frábær matur, sem stóð vel undir væntingum.
Loksins á Póker stað og spiluðum aðeins, ég byrjaði á að kaupa mig inn fyrir 10.000 HUF, tapaði öllu á fyrsta spili með tvær tíur á móti tveimur ásum, 5.000 í viðbót fóru fljótlega en síðasta 5.000 viðbótin skilaði rúmlega 40.000. Iðunn keypti sig inn fyrir sömu upphæðir og kom út með 23.000.

9. júlí – Margrétar eyja og Hoppá

Fórum yfir á eyjuna, Margit-Sziget, með geðvondum leigubílstjóra. En röltum um, eiginlega stór skemmtigarður með baðhúsi og strönd og vatnsorgeli. Bjór, skiptum djúpsteiktum Camembert með okkur og svo kaffi og Aperol Spits áður en við röltum upp á hótel, með einu bjórstoppi.
Fórum á Hoppá Bistro um kvöldið, fær meðmæli frá Michelin og stóð heldur betur undir væntingum, fékk alveg nýja sýn á Cordon Bleu.
En svo snemma að sofa, enda Iðunn að mæta eldsnemma á morgun.

10. júlí – Vinna, tannlækningar og Tapas

Tvær tannlæknaheimsóknir hjá Iðunni, ég vann á hótelinu.
Smá hreyfing í lok dags og svo á spænska Tapas veitingastaðinn Unomas, fínasti matur, en vorum ekki lengi.

11. júlí – Vinna, tannlækningar og Breiðablik

Iðunn aftur til tannlæknis, ég reyndi að nota skrifstofuaðstöðu við Lehe 14, var ekki að virka, ekki nothæfur skjár, óhreint, heitt og þungt loft.
Vann svo aðeins á hótelinu áður en við fórum í Arena Mall og kláruðum að mestu að kaupa það sem okkur „vantaði“.
Borðuðum á einföldum stað Firkasz, fínn matur og þjónusta en kannski ekkert merkilegt.
Horfðum á fyrri hálfleik Breiðabliks á útivelli á móti írskum meisturunum í Shamrock Rovers á staðnum, tókum strætó heim á hótel og kláruðum leikinn þar – og í strætó – frábær 1-0 sigur.

12. júlí – Aftur til Arena

Síðasta heimsókn Iðunnar í tannlækningar. Ég fór í klippingu og ekki vel heppnaðan rakstur.
En komið að því að fara aftur upp á Hótel Arena til að komast með leigubíl út á flugvöll.
Rammstein voru með hljómleika á íþróttavellinum um kvöldið, höfðu líka spilað í gærkvöldi, mikið um merkta áhangendur á hótelinu.
Fórum að klára innkaup, slepptum indversku búðunum, fundum litla ferðatösku eftir talsverða og ruglingslega leit – en svakalegur hiti var ekki að hjálpa. En fundum mjög álitlegt hverfi sem einhvern veginn hafði farið fram hjá okkur, gripum nokkra bjóra og kokteila í viðbót.
Fengum frábæran mat á Cyrano í hádeginu en létum súpu og snitsel nægja á hótelinu um kvöldið.

13. júlí – Heim og Jónatan

Loksins heim, fórum frekar snemma að sofa, en ég vaknaði um eitt og náði ekki að sofna áður en við fórum út á flugvöll.
Ágætt flug en náði ekki að sofna í vélinni.
Viktor sótti okkur og við sóttum Jónatan eftir að hafa skutlað Viktori heim.
Fengum okkur pylsur í hádegismat, skoðuðum kort af ferðalögum fjölskyldunnar og vorum aðeins að leika þar til Elina og Jonni sóttu hann á leiðinni til Keflavíkur, Elina og Jónatan að fara til Lettlands, Jurmala [ekki Riga, eins og Jónatan var með á hreinu].
En algjörlega búin á því og fórum að sofa upp úr níu.

11.0°C

Viktor, útskrift

Við kíktum með Viktori til Southampton til að vera viðstödd útskriftarhátíðina í tilefni af doktorsgráðunni, þó hún hafi nú tæknilega verið afgreidd fyrr – þeas. ég, Iðunn, Bergþóra og Alexandra.

Til Bournemouth

Fórum snemma í flug til London, laugardaginn 16. júlí – en Viktor og Bergþóra fóru degi fyrr – þeas. ég, Iðunn og Alexandra. Stutt kaffi á Heathrow og svo lest til Bournemouth. Kíktum á Aruba í bjór, en gekk lítið að finna veitingahús og við enduðum á Friday’s, sem var ekki gott val. En staðurinn virkar vel, samt lítið netsamband og mikið af Englendingum að skemmta sér – fram eftir nóttu.

Bournemouth, strönd á sunnudegi

Vorum eitthvað að vandræðast með að fara á ströndina.

Fengum okkur hádegis mat á Crab, fínn matur.

En okkur fannst full langt að fara í Sandbanks, sem stúlka sem við hittum á Aruba í gær hafði mælt með, þannig að við fórum seinni partinn á ströndina, allt fullt, engir bekkir – fólk almennt með eigin „græjur“. Náðum einum stól og Iðunn stal einum bekk og Alexandra notaði eitthvert teppi / handklæði, vorum smá stund seinni partinn.

Fórum svo á Crab um kvöldið, Alexandra var ekki hrifin en okkar matur var fínn.

Bergþóra & Viktor mæta

Við þvældumst um bæinn, morgunmatur uppi í bæ, smá rölt, og eitthvert hangs með tilheyrandi barrápi.

Bergþóra & Viktor mættu seinni partinn og við fórum á Mulligan, sérstakan íþrótta- veitingastað með enn sérstakari golfvelli.

Gripum pizzur og eitthvað létt með leik Íslands og Frakklands á EM, skemmtilegur leikur en úrslitin í öðrum eyðilögðu nú stemminguna.

Einn drykkur á 1812 barnum, hringdum í Kidda að óska honum til hamingju með daginn, en staðurinn lokaði snemma og við fórum snemma í háttinn.

Stonehenge

Fórum til Stonehenge, öll saman í bílnum sem Bergþóra & Viktor voru með.

Svakalegur hiti, 36 gráður, en þetta hafðist – og hefði ekki viljað sleppa þessu.

Fengum okkur pizzur á sérstökum og skemmtileg pizzastað, Nole í Salisbury á heimleiðinni.

Svo út að borða á Etna, ítölskum stað svolítið frá hótelinu.. frábær matur og mjög skemmtilegur og líflegur þjónn.

Til Southampton

Tókum rútu með Alexöndru til Southampton, gekk vel og Moxy hótelið fínt og þokkalega vel staðsett.

Röltum aðeins upp í gamla bæinn, kíktum á Duke Of Wellington barinn og hittum svo Bergþóru & Viktor og Dan og Jess(?) á Belgium and Blues barnum. Eitthvað lúinn staður, maturinn hálf dapur, amk. snitselið sem við fengum, eitthvað takmarkað úrval af bjór – en svo sem allt í lagi. En entumst ekki mjög lengi.

Útskriftin

Útskriftin var haldin á St. Mary’s, leikvelli Southampton og við höfðum bara miða fyrir tvo gesti, en Viktor fann einn fyrir mömmu þannig að Alexandra var ein um að missa af. Þetta dróst nú talsvert, það var byrjað að hleypa inn klukkutíma of seint og athöfnin var nokkuð löng.

Viktor kallaði á okkur þegar hann var búinn, vildi fá okkur út í bjór og skyndibita, hvað við gerðum við litla hrifningu annarra gesta sem kölluð okkur bölvaða dóna. Enda hafði Iðunn látið aðra heyra það sem fóru snemma, reyndar á íslensku.

Eftir bjór og einhvers konar pylsu fórum við upp á ‘Campus’ í mjög langri rútuferð, byrjuðum á bjór á Stags – þar sem við hittum ma. Will Jennings sem er einhvers konar stjóri yfir námi og verkefnum og greinarskilum hjá Viktori.

Eftir nokkra bjóra tók við smá rölt um svæðið og svo fórum við í áttina að nærliggjandi veitingahúsagötu. Við fundum reyndar þokkalegan stað rétt áður en við komum að þeirri götu, Ceno, og fengum fínan mat.

Þaðan svo yfir á Dolphin barinn þar sem hugmyndin hafði verið að hittast, en eitthvað var hópurinn farinn að þynnast.. 1-2 bjórar (kannski 3) og svo farið á bar, Bookshop Alehouse, en þangað var Dan var kominn, og að lokum yfir á The Cricketers.

Við vorum komin upp á hótel um eitt leytið, ansi soðin og lúin af labbi og hita. En mjög vel heppnað og gaman að hitta félaga Viktors.

Til London

Tókum lestina til London og komum okkur fyrir á Mimi’s, fínt hótel í miðborginni, með skemmtilegum bar en svakalegur litlu herbergi.

Eftir smá bæjarráp, ma. á The Yard, vangaveltur um að fara á söngleikinn Hamilton og tilfæringar á borðapöntunum fórum við að borða á BarShu, kínverskum Michelin veitingastað rétt hjá okkur, sem var svo sem fínn.

En entumst ekki lengi, frekar en fyrri daginn, einn drykkur á hótelbarnum og svo var þetta gott.

Camden Town á laugardegi

Laugardagur í London og kíktum upp í Camden eftir hádegi, smá rölt, kaffi, bjór og svo ítalskur staður Il Sugo áður en við skröltum aftur niður í bæ.

Matur á Ginza, Teppanyaki stað, fínn matur, en nokkuð dýr og minni „leiksýning“ en venjulega. Svo á sýningu Ara Eldjárns í Soho Theatre.. virkilega skemmtileg sýning, eins og við áttum nú von á – hittum hann stuttlega eftir sýninguna.

En bjór á barnum á Soho Theatre og annar á hótelinu og svo var þetta orðið gott.

Heim

Reyndum aðeins að nýta heilan dag í London, ráfuðum í talsverðum hita í Covent Garden, matur á Spaghetti House, sem vildu ekki leyfa okkur að vera í loftkældum kjallaranum. Svo upp á flugvöll, gekk mjög hratt að komast í gegn, smá snarl á sjávarréttabarnum – og svo fínasta flug heim.

Malagaferð

Fórum með Helga og Þóru og Ægi Mána til Malaga.

Aðal verkefni ferðarinnar var að reyna að greiða úr flækjum vegna dánarbús, en gekk nú eiginlega ekki.

En aukaverkefnið var að taka smá frí og njóta þess að vera í Malaga og það verkefni tókst heldur betur vel.

Til Malaga

Við lögðum af stað til Malaga 10. júlí til að hitta Helga & Þóru – í kannski ekki mjög skemmtilegum aðal erindagjörðum – Ægir Máni var líka og við stefndum á að gera okkar besta til að njóta tímans fyrir utan aðal verkefnið.

Við mættum í langa níunda-áratugar biðröð í Keflavík, það tók rúmlega einn og hálfan tíma að klára innritun í ellefu-faldri röð með löngum hala og fluginu seinkaði aðeins, við náðum samt bæði bjór og samloku.

Við höfðum svo aðgang að betri biðstofu á Arlanda, ég stökk reyndar frá til að kaupa snúru til að hlaða Sennheiser heyrnartólin, sem voru með tóma rafhlöðu og öll hleðslutæki í töskunum sem við ‘tékkuðum inn’.

Maturinn á biðstofunni kom skemmtilega á óvart, en við stoppuðum reyndar ekki lengi fyrir flugið til Malaga. Við vorum svo í betri sætum, fengum frábæran mat – ekki bara í samanburði við annan flugfélagamat – rýmri sæti og fría drykkir. Ég hafði reyndar aðallega gert tilboð í betri sæti vegna þess að ég var ekki viss um að það væri hægt að bóka töskurnar alla leið til Malaga, það var ekki mikill tími á milli flugferða og inni í þessu var forgangs innritun. En það hafði komið í ljós að það var ekkert mál að bók farangurinn alla leið.

Flugið til Malaga var fínt, en það tók nokkrar mínútur að finna töskurnar sem höfðu verið settar á sérstakt færiband vegna þess að þær voru innritaðar utan Evrópusambandsins,

En vorum mætt upp á hótel upp úr níu um kvöldið – NH Hotel, mjög fínt og vel staðsett – og eftir stutta innritun hittum við Helga, Þóru og Ægir Mána á La Cueva – og kynntumst uppáhalds-fúla-þjóni þeirra í borginni.

Við fengum okkur síðbúinn kvöldmat á Taberna del Pintxo, (muni ég rétt), tapas brauðréttir, vorum aðeins of stórtæk á köldu réttina og ekki búin að átta okkur á að þjónarnir komu reglulega með nokkuð girnilega heita rétt – en mjög fínt og svo smá rölt um borgina og einhverjir drykkir áður en þetta var orðið gott.

Sunnudagur

Við Iðunn röltum af stað eftir góðan morgunmat á hótelinu, ætluðum að kaupa vatn og smá hótelherbergisbirgðir, en flestar búðir lokaðar, amk. framan af.

En það var engin ástæða til að láta sér leiðast – keyptum kveikjara (ég hafði gleymt mínum heima þrátt fyrir vel skipulagðan tékklista) og appelsínugular andlitsgrímur – enda gengur appelsínugult með öllu, eins og Iðunn segir. Ægi Mána fannst það nokkuð fyndið.

Svo upp á hótel og settumst með þeim við sundlaugina á þakinu.. komin í góða slökun.

Svo í Hamman (á Hammam Al Andalusia?) fínt, en ekki til fyrirmyndar að hafa lítinn gosbrunn hálfpartinn grafinn í gólfið á aðal gönguleiðinni, Iðunn hrasaði illa en slapp með marbletti.

Það tók svo smá stund að finna stað fyrir kvöldmat, vorum með ítalskan á bak við eyrað en þeir sem fengu góð meðmæli voru pínulitlir og ekkert pláss fyrir fimm manns. Við enduðum á Bar La Bouganvilla og það vildi svo vel til að úrslitaleikur Englands og Ítalíu var í boði í sjónvarpinu. Þóra og Iðunn fengu þetta úrvals lasagna, sem var samt ekki líkt neinu lasagna, mauksoðið ‘uxahala’kjöt og engir tómatar.

Leikurinn endaði kannski ekki vel, en verst að staðurinn var með útsendingu langt á eftir öðrum þannig að við heyrðum úrslitin frá fagnaðarlátunum á nálægum stöðum, eða þóttumst geta lesið í þau. Og ekki hjálpaði að útsendingin datt út í síðustu vítaspyrnunum.

En létum þetta gott heita (minnir mig).

Mánudagur

Methiti, megnið af deginum, fór upp í 42 þegar verst lét.

Þannig að dagurinn var notaður til að fara í verslunarmiðstöð sem við heimsóttum stundum hér áður fyrr, Larios, var ansi lúin síðast þegar við kíktum, en búið að endurnýja. VIð fundum nú ekki mikið þar en El Corte Ingles bjargaði mér með einhverjar „áfyllingar“ á fataskápinn.

Svo var fundur með fasteignasalanum á hótelinu og hefði nú mátt ganga betur. Það hjálpaði ekki að Helgi veiktist illa rétt áður en hún kom og gat ekki verið með okkur. En að lokum var ákveðið að hún kæmi aftur að hitta okkur á föstudagsmorgun – og kæmi þá með öll skjöl, ekki bara myndir sem hún hafði tekið á símann af skjölunum á tölvuskjá!

Helgi var alveg frá og þau Þóra höfðu reyndar verið nokkuð veik allan daginn.

Við fórum án Helga á Los Mellizos og fengum nokkuð góða rétti, til dæmis fékk ég frábærar ansjósur í einhvers konar tómat/berjamauki. Ægir fékk túnisktarta, Iðunn skeljar og flestir aðrir réttir mjög góðir.

Við Iðunn gripum bjór og kokteil á Ibis hótelbarnum, rétt hjá okkar hóteli, en Þóra og Ægir fóru að sofa.

Þriðjudagur

Helgi var enn slappur en samt betri en okkur þótti réttara að fresta fyrirhugaðri Benalmadena ferð um einn dag.

Við Iðunn fórum á smá rölt, kaffi, búð, bjór, búð, matarmarkaður og svo meira ráp, kom okkur mest á óvart hversu vel fúli þjónninn hans Helga tók okkur, eldsnöggur að taka pöntun, afgreiða og koma með reikninginn.

Desigual búðin var mun minni en okkur minnti og enn minna spennandi. Við fundum samt eitthvað á rápinu og duttum svo inn á hótel sundlaugina þegar leið á daginn.

Fyrir kvöldmat hittum við svo Helga, Þóru og Ægi Mána á Sherlock Holmes bar, smá bar rölt og nauðsynleg barstopp – og svo á Mexíkóska staðinn, Alcasabar, fínn matur og kokteilar. Nokkrir drykkir á Mojito bar fyrir svefninn. Var aðeins meðvitaður um of marga drykki um nóttina.

Benalmadena

Góður morgunmatur og tókum svo lestina til Arroyo og röltum niður til Benalmadena. Margir staðir enn á sínum stað en aðrir lokaðir eða farnir, söknuðum Flying India. En fórum í hádegismat á gamla strandbarnum, ég gat ekki valið á milli sardína og „seabass“ [sæbrimi?] þannig að ég pantaði báða réttina. Og báðir stóðu undir væntingum.

Komum okkur svo fyrir á sólbekkjum í nokkra klukkutíma, létum fara vel um okkur með bjór og lesefni og fórum (mismikið) út í sjó.

Terry, sem hefur gjarnan verið okkur innan handar, svaraði hvorki skilaboðum né símtölum og við hittum svo sem engan. Það var ekki stemming fyrir strætó til Malaga, enda búin að kaupa lestarmiða báðar leiðir, þannig að næsta mál var að fikra sig til Torremolinos. Stutt stopp á írska barnum Shamrock, svo smábátahöfnin þar sem Da Fano var enn á sínum stað. Við breyttum skipulagningu og pöntuðum mat þar og þeir hafa engu gleymt, frábær matur.

Við löbbuðum til Torremolinos og komum okkur fyrir á bar hjá vingjarnlegum belgískum þjóni, sem talaði reyndar ekki mikla ensku, en var ekkert nema vingjarnlegheitin og gaf Iðunni nýjan bjór eftir að hennar fór niður í smá handapati og gaf Ægi Mána stóra vatnsflösku að skilnaði.

Þá var enn á dagskrá að finna lestarstöðina, sem gekk eitthvað brösulega, en hafðist á endanum, nægilega tímanlega fyrir síðustu lest til Malaga. Sú lestarferð var vel skipulögð og við fengum nýjan lestarstjóra til að keyra okkur frá næst síðustu stöðinni yfir til Malaga.

Eitthvað var ég orðinn þreyttur og aumur í fótunum og hafði verulegar áhyggjur af að morgundagurinn yrði erfiður, ef ekki ónýtur.

Við komum upp á hótel um tvöleytið, góð sturta og loksins komin „mini-barinn“ á hótelinu að gagni, flöskurnar hjálpuðu mikið við að kæla iljarnar.

Lokadagur

Síðasti heili dagurinn í Malaga, mikill léttir að fæturnir voru að mestu í lagi, Iðunn með auma tá, en Helgi átti góðan plástur og ég slapp að mestu, varla blaðra til að tala um…

Við Iðunn kíktum í Soho, sem átti að vera áhugavert hverfi en við sáum svo sem ekki mikinn mun á því og öðrum bæjarhlutum. Kaffistopp, bjórstopp, duttum ekki inn á Bar Malaga, sem var svona á bak við eyrað, en ekki nægilega mikið atriði til að við nenntum að leita [það er mjög erfitt að leita í Google Maps] og hittum svo hin á Mellizos í hádeginu, túnfisktartar og sjávarréttasúpa – allt of mikið í hádegismat eftir stóran morgunmat. En það var orðinn fastur liður í ferðinni!

Svo settumst við aðeins við hótel sundlaugina áður en við héldum af stað í síðustu kvöldmáltíð ferðarinnar.

Fyrsta stopp var bar með úrvali af „kraft“ bjór, fengum fínasta bjór áður en við héldum á japanska staðinn Ta Kumi.

Það voru allir klárir í matseðil kokksins og freyðivín, ýmist bleikt eða hvítt.

En þvílík veisla, við vorum svo stút full að við afþökkuðum síðasta rétt fyrir utan eftirrétt, Helgi náði ekki einu sinni að kyngja síðasta bita af næst síðasta réttinum.

Við fengum okkur einn drykk fyrir svefninn, en svo var þetta gott, enda heimferð á morgun.

Heimferð

Fasteignasalinn sem hafði ætlað að hitta okkur til að afhenda okkur öll skjöl um morguninn mætti ekki. Svo komu skilaboð um að hún væri komin á spítala með Covid-19.

En það var ekki mikið annað en að pakka, kíkja í snarl í hádeginu og taka lestina út á flugvöll.

Þar var nokkuð löng bið en gekk merkilega vel og við náðum einum bjór.

Og hittum Tomma (Hallgríms), sem hafð verið nálægt Marbella.

Fínasta flug heim, Viktor sótti okkur og eldaði svo lasagna fyrir okkur.. Alexandra og Bergþóra auðvitað með okkur – en við entumst bara hálfan Barnaby.

Hveragerðishelgi

Óskar er alveg að verða sextugur og það var tekin skyndiákvörðun um helgarferð til Hveragerðis, þau Brynja, Kristín & Þórður og við Iðunn.

Við ákváðum að gista á Frosti og Funa, staðurinn hafði fengið mjög góðar umsagnir frá vinum og þó hann væri nokkuð dýrari en jafnvel fimm stjörnu staðir á suðurlandi… en góðar umsagnir „trompuðu“ verðið.

Við komum seinni partinn á föstudag, komumst reyndar ekki upp að afgreiðslunni vegna þess að stórum bíl hafði verið lagt á miðjan veginn. Við fengum þær skýringar að þetta væri bara píparinn, hann leggði nú alltaf svona.

Við komum okkur fyrir á herberginu og svo sem ágætlega notalegt, en það óneitanlega ansi kalt. Í móttökunni var okkur bent á að hækka í ofninum og stilla gluggatjöldin rétt. Það var nú samt kalt. Eitt var líka nokkuð undarlegt, hurðin fyrir klósettinu var greinilega einstaklega listrænt hönnuð. En ekki mjög „notendavæn“. Það var ekki hægt að loka alveg, ekkert handfang innan á og var stöðugt að detta af óhefðbundnum „hjörunum“.

Það kom í ljós að við vorum ekki ein með kalt herbergi og „heiti“ potturinn frekar kaldur að sögn annarra gesta sem höfðu þorað að prófa.

Pöntunin á veitingastaðnum sem er tengdur hótelinu hafði ekki skilað sér þrátt fyrir að við hefðum pantað með þriggja daga fyrirvara. Það var heldur ekki hægt að fá borð kvöldið eftir nema við værum til í að mæta 18:00. Við mættum hins vegar sitja sein lengi og við vildum. Ekki átta ég mig á því hverju það breytir að fá borð 18:00 og sitja til 22:00 eða fá borð 20:00 og sitja til 22:00.

Svo sem ekkert mál. En það var nú kílómetri í næsta veitingastað og kalt og hvasst. Þannig að þá var bara að hringja á leigubíl. Sá neitaði að sækja okkur, sagði að það hefði greinst Covid-19 á staðnum og hann kæmi ekki þangað.

Auðvitað getur maður haft skilning á Covid ótta og fórum reyndar líka að hafa áhyggjur. Þannig að við spurðumst fyrir og í móttökunni var okkur sagt að þetta væri rangt með Covid, en leigubílstjórinn væri nú þekktur fyrir að vera svolítið sérstakur, eins og þetta væri eitthvað „krúttlegt“. Þau buðust til bjarga bíl frá Selfossi, sem við skildum nú þannig að við fengjum bíl og jafnvel á eitthvað betri kjörum. Þau hringdu svo nokkrum mínútum seinna, gáfu okkur upp símanúmerið á leigubílastöðinni á Selfossi, sem við vorum auðvitað búin að finna, en við þyrftum að hringja sjálf. Gott og vel, við fengum bíl frá Selfossi sem sýndi okkur skilning og gaf okkur ágætt, fast verð – fram og til baka.

Á Selfossi fórum við á Kaffi Krús, nokkur bið, sem getur svo sem verið skiljanlegt, fínn matur á þokkalegu verði og boðlegt rauðvín á góðu verði. Þjónustufólkið mætti vera aðeins meira að fylgjast með og minna að spjalla saman sín á milli, en svo heilt yfir ágætis matur og ekki ólíklegt að við dettum inn aftur við tækifæri.

Við vorum svo kannski sátt við að vera ekki lengi fram eftir, spurðum hvort við mættum setjast í sameiginlega rýmið fyrir framan veitingastaðinn. Svarið var þvert nei, það væru svo verðmætir hlutir þarna. Eitthvað vafðist fyrir okkur að sjá hvað væri svona verðmætt, ekki fannst okkur sérstaklega jákvætt að gestgjafarnir gerðu sjálfkrafa ráð fyrir að við myndum stela frá þeim um leið og færi gæfist. Við ákváðum að láta vera að benda á hversu auðvelt væri að taka þessa verðmætu muni ef þarna væri eitthvað sem við ásældumst og væri þannig innstillt að okkur þætti sjálfsagt að taka annarra manna hluti traustataki. Ég benti á þetta við uppgjör og var sagt að veitingastaðurinn væri sjálfstæður rekstraraðili og þau á hótelinu gætu ekki svarað fyrir eða borið ábyrgð á þeim. Gott og vel, en eftir stendur að hótelið býður ekki upp á neina aðstöðu aðra en herbergin.

Í öllu falli, við tókum nokkra bjóra og romm yfir spurningaleik inni á herbergi hjá okkur í nokkra stund áður en við fórum að sofa, svona til þess að gera snemma.

Morgunmatur daginn eftir var svona allt-í-lagi, ekkert að honum, en svo sem ekkert meira en það. Horfðum á hundleiðinlegan leik Southampton og Arsenal í enska bikarnum sem endaði svo sem ekkert sérstaklega vel.

Eftir leikinn fórum við á Ölverk, mjög skemmtilegur handverksbjórbar. Smökkuðum nokkra bjóra á bretti og skiptum með okkur pizzum, sem meira að segja Iðunni fannst góð, einhver ostasamsetning.

Það var auðvitað ekki hægt annað en að reyna heita pottinn, þó kaldur væri, 32 gráður í frosti og gaddi, mér verður enn kalt við að rifja upp þessar sekúndur sem ferðin úr pottinum inn á herbergi tók.

Við fengum svo borð á veitingastaðnum Reykr, klukkan 18:00. Gin og tónik hjá okkur Iðunni fyrir mat, nema Brynja lét Whisky duga. Flest okkar fóru í smakk matseðilinn sem var eiginlega alveg frábær – við höfum oft prófað svona á veitingastöðum, bæði hérlendis og erlendis og þessi fer alveg í minnisbókina með þeim bestu. Hvalurinn reyndar ekki fyrir mig, en aðrir voru sáttir við hann og annað mjög vel heppnað..

Skemmtilegir réttir úr einföldu hráefni, ekkert yfirdrifið og samsetning réttanna vel heppnuð. Ekki spillti fyrir að fá ágætis rauðvín á fínu verði, þó við kláruðum nú birgðirnar af einni.

En svo inn á herbergi í freyðivín og meira Whisky og bjór og Code Names og fleiri spurningaleiki. Það var loksins kominn hiti á herbergið þannig að það fór svo sem ágætlega um okkur.

Morgunmatur á sunnudegi og beint heim, hélt að við fengjum að vera til amk. 14:00 fyrst við fengum herbergið ekki fyrr en 15:00, en það var miðað við 11:00. Okkur var sagt að það væri ekkert atriði að fara á mínútunni 11:00, en einhvern veginn ekki stemming að slaka á. Við fengum smá afslátt vegna hitaleysisins.

Durham, Edinborg

Ferð til Viktors í Durham og svo með honum til Edinborgar.

Til Durham

Til Keflavíkur og flug 11:20 til Manchester. Lestarferðin féll niður og næstu seinkaði þannig að við náðum ekki til Durham fyrr en hálf níu.

Biðum á Radison hótelinu í bjór á meðan og þurfti að vinna fyrir ISAL á meðan.

Tékkuðum inn á fínt hótel, Townhouse, og drifum okkur á ítalska Spaghettata.

Frábært að hitta Viktor og ekki spillti að við fengum frábæran mat, þar sem forréttadiskurinn fór ansi langt með að „fylla“ okkur, þeas. af mat.

Svo á stúdentabar að fylgjast með niðurstöðum bresku kosninganna.

Durham

Heimsóttum Viktor eftir einfaldan morgunmat á ítölskum veitingastað, kastalinn verulega flottur og dómkirkjan all svakaleg.

Fórum 325 þrep upp í turninn, sem tók aðeins (heldur betur) í…

Svo þurfti Viktor að kenna, ég þurfti að vinna og Iðunn fór í augnháralitun.

Vinna fyrir ISAL dróst og ég náði ekki kynnisferð um kastalann, en Iðunn fór og hafði gaman af.

Þá að hitta samkennara og samstarfsfólk Viktors á einum barnum, Viktor dró okkur meðfram ánni, átti að vera betri leið – en reyndist rosalega löng og í myrkri.

En gaman að hitta félaga Viktors.

Fórum svo að borða á Court Inn, fengum einhvers konar jólamatarhlaðborð sem var svo sem allt í lagi.

Kíktum svo á bar í nágrenninu og gripum einn bjór fyrir svefninn.

Til Edinborgar

Morgunmatur á hótelinu og svo til Viktors að pakka með honum og út á lestarstöð. Lítið af leigubílum, allir nemendur bæjarins á leið heim í jólafrí.

En við náðum tímanlega til að komast að því að lestinni hafði seinkað um korter.

Fín lestarferð og að mörgu leyti mun skemmtilegra að ferðast með lest en flugvél.

Mættum til Edinborgar um hálf fjögur, tókum leigubíl upp í íbúð, sem var nokkuð fín, en í hreinræktuðu íbúðahverfi, hvorki kaffihús né sjoppa.

Fórum á jólamarkaðinn en það var eiginlega skítakuldi og við entumst ekki lengi, samt jólaglögg („mulled wine“) og pylsur og slátur.

Svo áttum við borð á La Piazza, fengum frábæran mat, gripum einn bjór á veitingastaðnum við hliðina, en létum gott heita.

Edinborg

Fórum í fínan morgun mat á The Brunch Company, svo að versla.

Það var búið loka dótabúðinni sem við höfum treyst á síðustu ár, en þeir höfðu bjargað einhverju dóti og við fundum eitthvað fyrir flesta.

Fengum þær fréttir að Ásgeir hans Sæma hefði dáið um morguninn.

Sendum Viktor upp í íbúð með árangurinn eftir einn bjór og héldum svo áfram. Fundum eitthvað af fötum, meiri bjór og svo í MS og þaðan yfir í „outlet“.

Hittum svo Viktor á barnum að horfa á Arsenal tapa illa fyrir Manchester City yfir barmat.

Röltum svo yfir í gamla bæinn en lítið opið og eftir einn bjór á White Hart Inn fórum við upp í íbúðina sem var orðin verulega mikið kynnt.

Svo á Rhubarb í Prestonfield.

Alltaf verulega sérstakt að koma þangað, ótrúlegt umhverfi, frábær matur og settumst upp í setustofu í drykk eftir matinn.

Heim

Það var kannski smá kúnst að pakka en þetta hafðist, einfaldur morgunmatur, við Viktor fengum okkur nudd og svo yfir í hádegismat á næsta bar.

Þá var kominn tími til að fara upp á flugvöll, tók smá tíma að skrá og skila töskum, náðum samt einum bjór fyrir flug, en náðum lítið sem ekkert að bæta við gjafakaupin.

Flugið heim fínt og ég náði í lokatímann í fótboltanum.

Doktorsvörn og fleira

Miðvikudagur – Stanwell

Ég hafði hugsað mér að reyna að vinna á Stanwell hótelinu, rétt hjá Heathrow í tvo daga, Iðunn kom upp úr hádegi og hafði af að mæta þrátt fyrir smá rugl með að panta Uber.

Var samt hálf lasinn, en náði að gera það sem lá fyrir.

Kannski er það dæmigert fyrir staðinn að TripAdvisor var með Annies Well sem „#1 of 2 things to do in Stanwell“ – og fékk bara þrjár stjörnur af fimm.

Það var lítið um bari í nágrenninu, sá fyrsti sem mælt var með var greinilega farinn hressilega á hausinn, Swan var allt í lagi en svo fundum við annan sem var með fullt af leikjum. Horfðum á meistaradeildarleiki og svo upp á hótel að borða.

Maturinn þar kom skemmtilega á óvart, fyrsta flokks veitingastaður.

Fimmtudagur – Stanwell

Meiri vinna en gekk vel og ákvað að láta það nauðsynlegasta nægja. Kíktum aðeins í verslunarmiðstöð seinni partinn yfir í nálægt þorp, svo á íþróttabarinn okkar að horfa á Arsenal – Standard Liege og aftur á veitingastaðinn á hótelinu.

Föstudagur – Wivenhoe, Helen & Tony – og Viktor

Við höfðum skipt um skoðun og ákveðið gleyma lestarmiðum frá Heathrow til Wivenhoe og taka bílaleigubíl í sex daga.

Þannig að við fórum upp á Heathrow sóttum bílinn og keyrðum til Wivenhoe, þar sem Tony & Helen búa.

Tony sótti Viktor upp á lestarstöðina, en hann var að koma frá Durham.

Það gekk óvenju illa að keyra, mér hafði gengið vel fyrir 30 árum að keyra í vinstri umferðinni, en einhver blanda af því að þurfa að skipta um gír með vintri hendi, bíllinn vildi helst ekki fara í annan gír og svo reglur um hringtorg sem ég er ekki vanur urðu til þess að það var engan veginn þægilegt að keyra.

En.. hvað um það.

Tony fór með okkur í gönguferð meðfram ánni og við hittum svo á Helen áður en við kíktum á bátinn hans Tony og fórum á uppáhaldsbarinn þeirra.

Eftir tvo bjóra var farið heim til Tony og Helen í frábæra böku sem Tony hafði undirbúið, mun betri en hefðbundin pöbbabaka.

Sátum svo að bjór og Whisky sumbli eitthvað fram eftir.

Laugardagur – Colchester, Southampton

Alvöru morgunmatur hjá Tony og Helen og svo á smá bæjarrölt.

Heimsóttum Essex háskólann og svo inn í miðbæ Colchester. Colchester kom skemmtilega á óvart, enda mikil saga og ekki spillti að Tony var einstaklega vel að sér og hafði mjög gaman af að segja frá.

Kaffi og svo pizza áður en við lögðum af stað til Southampton.

Það gekk svona og svona en hafðist undir kvöld.

Við létum hamborgara og svínarif duga í kvöldmat enda sein fyrir og þreytt og við Viktor hálf lasnir..

Sunnudagur, fótbolti og bjór

Það var engin leið að sjá Arsenal leikinn í sjónvarpi, við hættum við að fara á völlinn að sjá Southampton – Chelsea en kíktum á bar til að horfa á þann leik.

Þaðan á Unity brugghúsið þar sem við hittum nokkra vini Viktors frá Southampton og drukkum þennan fína bjór.

Það reyndist snúið að fara á Amalfi veitingahúsið, flest önnur reyndust lokuð en við fundum að lokum staðinn Harbar sem bauð upp á virklega góðan mat og frábæra aðstöðu. Það eina sem á skyggði var ótrúlegur dónaskapur barþjónsins við Iðunni þegar við ætluðum að panta drykki og sitja úti í ágætri aðstöðu með flottu útsýni.

Gripum einn bjór niðri í bæ, þar sem við hittum Elisu, fyrrum meðleigjanda Viktors í einum bjór fyrir svefninn.

Mánudagur

Við Viktor þurftum aðeins að vinna, en kíktum á smá bæjarrölt fundum jakkaföt fyrir Viktor og eitthvert smá dót.

Svo á sjávarsafnið í Southampton, aðallega Titanic hluta þess.

Hittum nokkra vini Viktors á mexíkóska staðnum Wahaca, frábært matur sem setti mexíkóskan mat í nýtt samhengi fyrir okkur Iðunni.

Einn bjór fyrir svefninn á skemmtilegum bar með fína útiaðstöðu.

Þriðjudagur – Doktorsvörn

Þá var komið að stóru stundinni, sjálfri doktorsvörninni.

Við fórum snemma af stað, á bílnum, Viktor þurfti að sækja dót sem hann hafði skilið eftir og síðan upp í háskóla í morgunmat.

Við Iðunn máttum ekki fylgjast með og sátum með morgunmat og kaffi og meira kaffi á meðan Viktor varði ritgerðina.

Það gekk vel og svo gripum við hádegismat með lykilfólkinu í náminu, og prófdómurum – frábær matur en salurinn eins og gufubað þar til mér datt í hug að biðja um að kveikja á loftræstingunni.

En virkilega gaman að hitta þá sem hafa verið leiðbeinendur og samverkamenn Viktors þessi ár.

Viktor var hins vegar hálf lasinn og fór að sofa eftir hádegismatinn. Ég reyndi að vinna aðeins en við sátum á hótelbarnum þar til komið var að því að hitta vini Viktors.

Viktor hafði boðað til hittings á háskólabarnum og þar mætti talsvert af félögum en einhverjir voru veikir og náðu ýmist ekki eða stoppuðu stutt.

Við Iðunn fórum svo á ítalska La Tavernetta en Viktor fór að sofa, enda alveg búinn á því.

Miðvikudagur – heim

Slakur morgunmatur á hótelinu og svo með bílinn upp á Heathrow. Við ákváðum að fara fyrst með töskurnar á brottfararstað og skila svo bílnum.

Það rétt hafðist að skila bílnum tímanlega eftir að villast um hringtorginu í kringum Heathrow í boði Google Maps.

Okkur Iðunni leist ekkert á að hanga á eina barnum fyrir framan öryggisleitina, þannig að við pöntuðum Uber og fundum alvöru bar í nágrenninu (auðvitað rétt hjá þeim stað þar sem við höfðum þurft að skila bílnum) og sátum þar í bjór og kaffi í nokkra tíma áður en það var kominn tími til að fara aftur upp á flugvöll.

Þar fórum við inn í flug og Viktor tók sína lest til Durham.

Flugið heim var fínt, fyrir utan þurrt loftið í vélinni, Alexandra sótti okkur upp á flugvöll… þreytt og lúin en gott að vera komin heim.

Októberfest í Munchen

Til Munchen

Þá var komið að Októberfest með Sval. Ég hafði frestað fluginu út vegna jarðarfarar Halla og hafði pantað flug gegnum Varsjá með mjög litlu svigrúmi.

Flugið átti að vera hálf eitt eftir miðnætti.

Það hjálpaði ekki að fyrra flugið var sett á hálftíma seinna en ég hafði gert ráð fyrir og seinkaði svo um annan hálftíma. Enda var þessi samsetning ekki í boði á venjulegum leitarsíðum vegna stutts tíma á milli. Vélin lenti 5 mínútum fyrr og það var 5-10 mínútna seinkun á seinna fluginu þannig að ég rétt náði að hlaupa upp á efri hæð og nánast út í enda.

Ég náði ekkert að sofa á leiðinni þrátt fyrir einbeittan vilja og var orðinn ansi þreyttur þegar vélin lenti í Munchen um níu leytið um morguninn.

Leyfði mér að taka leigubíl upp á hótel, ætlaði að taka Uber en sá fann mig ekki.

En ég náði morgunmat og fékk að leggja mig í tæpa tvo tíma áður en við lögðum af stað til Augsburg að horfa á heimamenn spila við Bayer Leverkusen.

Augsburg

Við fórum sem sagt á heimaleik Augsburg þar sem Alfreð var fyrirliði.

Í stuttu máli sagt þá var þetta með leiðinlegri leikjum sem ég hef séð erlendis, Augsburg mjög slakt og Alfreð, sem var fyrirliði, átti lítið betri dag en aðrir leikmenn Augsburg, sem töpuðu 0-3.

Svolítið sérstakt fyrirkomulag á sölu á mat og bjór.. það var hvorki hægt að greiða með peningum né kreditkortum… þess í stað þurfti að kaupa einhver sérstök greiðslukort sem krakkar með litla fána voru að selja út um allt. Síðan voru allir sölustaðir með sérstaka „posa“ til að taka við greiðslum. Við þurftum líka að setja 2 Evrur á hvert kort til tryggingar. Og til að fá trygginguna endurgreidda og það sem mögulega var eftir á kortinu þurfti að standa í langri biðröð.

Til að bæta um betur þá virkaði kortið hans Óskars ekki, fyrst var okkur sagt að það væri bara einn sölubásinn, en það virkaði heldur ekki á þeim næsta, þannig að ég þurfti að fara í þjónustuverið og fá annað kort.

Við misstum af fyrsta korteri seinni hálfleiks, ekki svo að skilja að mikið hafi gerst á meðan.

En við létum auðvitað ekki pirringinn trufla og keyptum bjór fyrir ónotaðar inneignir, hver okkar stóð uppi með 2-3 bjóra eftir leik.

Kvöldmatur

Um kvöldið mættum við í mat á nokkuð stórum veitingastað Augustiner, fínn bjór, allt í lagi matur.. frekar einfaldur samt, ég bauð upp á snafs í tilefni af fæðingu Jónatans Edvards.

Óskar heimtaði að ég færi upp á hótel fyrir miðnætti enda illa syfjaður. Mér tókst að grenja út að fá einn koktil hjá Valdimar á Brasilískar barnum rétt hjá hótelinu áður en Óskar „rak“ mig í rúmið um miðnætti.

Októberfest

Ég vaknaði í morgunmat, Óskar svaf hann reyndar af sér, en fór svo beint að sofa aftur.

Við sváfum til rúmlega tvö.

Við vöknuðum mis hressir, komumst að því að Tóti hafði sennilega drepið einhvern og dreift blóði vel og vandlega um herbergið þeirra Gísla.

En svo var haldið á hátíðina sjálfa. Fyrsta pylsan fór eitthvað illa í Óskar, kannski hjálpaði kokteilabarinn kvöldið áður ekki til.

En við áttum borð í einu stærsta tjaldinu (ef tjald má kalla) á Októberfest hátíðinni.
Ótrúlegt að sjá, að því er virtist, frekar „litla bóga“ karla og kvenna bera 10 líters bjórkönnur allt kvöldið.

Inni í verðinu vor tveir líters bjórar og hálfur kjúklingur… hálfur kjúklingur er bara hálfur kjúklingur, ekkert meðlæti.

Okkur var ráðlagt að leggja til 1,06 Evrur í þjórfé á hvern drykk og jafnvel eitthvað ríflega í fyrstu ferð.. sem við gerðum… en skondin upphæð!

Það koma um sex og hálf milljón ferðamanna á Októberfest og hver þjónn þénar um þrjár fjórar milljónir þessar vikur.

En… mjög gaman að koma og upplifa, en að einhverju leyti minnti stemmingin á þjóðhátíð, almennur samsöngur og dansað uppi á borðum… sem sagt ekki mikið fyrir mig.

Við Óskar fórum (og sennilega fleiri) upp á hótel um tíuleytið og til þess að gera snemma að sofa, amk. vel fyrir miðnætti.

Mánudagur

Morgunmatur og svo röltum við Óskar undir leiðsögn Júlla niður í miðbæ… slepptum Hop-On-Hop-Off ferðinni sem flestir aðrir mættu í…

Við Óskar gripum svo fínan hádegismat á ítalska OhJulia.

Mig vantaði eitthvað smádót en Óskar fór upp á hótel. Ég ákvað að kíkja í nudd enda hálf aumur, síminn dó, ég var týndur, fann nuddstofuna… frekar klént axla og baknudd, hefði betur gefið mér betri tíma til að velja, td. daginn eftir.

En svo fórum við á ítalskan stað um kvöldið, allt í lagi matur og svo upp á hótel að horfa á Manchester United – Arsenal.

Einhverjir drykkir eftir leik en ekki mjög lengi og lét ekki Gísla + Tóta draga mig á fætur um hálf þrjú um nóttina.

Þriðjudagur, til London

Aðrir úr hópnum áttu flug heim upp úr hádegi, en ég átti ekki flug fyrr en um kvöldið.

Enn hálf þreyttur og hálf lasinn, fékk tvo aukatíma á hótelinu, sem ég nýtti vel, smá rölt, og fann einhvern bar sem átti að vera frábær, Schiller Brau, allt í lagi bjór en mér leist ekki á matseðilinn þannig að ég fór á þýska veitingastaðinn, rétt hjá hótelinu. Þau sögðust vera með bestu svínaskanka í bænum, ég ákvað að prófa – frekar en að grípa snitsel eins og Iðunn hafði mælt með. Jú, jú, fínn svínaskanki, en svolítið yfirþyrmandi fitubragði þegar á leið.

Fínt flug með Lufthansa til London um kvöldið.

En svo var ekki hlaupið að því að fá leigubíl. Flestir venjulegu leigubílarnir neituðu að keyra mig á hótelið, sem var rétt hjá Heathrow, vegna þess að ferðin var of stutt. Að lokum fannst einn sem var til í að keyra mig gegn margföldu gjaldi en ég var orðinn fúll og ákvað að panta Uber. Síminn var með batterí í 14% þegar ég pantaði en ákvað að tæma batteríið um leið og ég var búinn að panta. Ég náði nú samt númerinu á bílnum og beið og beið, en hann kom ekki. Kom seinna í ljós að ég hafði ekki séð skilaboð um að hittast á öðrum stað.

Ég var auðvitað ekki með millistykki fyrir breskar innstungur, Iðunn var væntanlega með nokkur daginn eftir og ekki hlaupið að því að ná að hlaða.

Að lokum fann ég Costa þar sem USB tengi var í boði, keypti kaffi, náði að hlaða símann, panta Uber og var kominn upp á hótel tveimur tímum á eftir áætlun.

Amsterdam, IBC+ 2019

Ég bókaði flug og tók frá hótel með góðum fyrirvara þegar ég átti von á að eiga eitthvert erindi á IBC. Það fór reyndar þannig að ég átti lítið erindi, en við ákváðum að Iðunn kæmi líka og að við myndum kíkja til Amsterdam

Föstudagur

Við flugum í sitt hvoru lagi til Amsterdam, Iðunn klukkutíma á eftir mér, þannig að hún drakk aukabjór í Keflavík og ég drakk aukabjór í Amterdam.

Það tók smá stund að finna leigubílinn sem fylgdi hótelinu, fínasta hótel..
Svo yfir á Brouwerij ‘t IJ bjórgjarðinn í smakk og meiri bjór.

Svo niður í bæ, smá stopp á Dam, svo á De Wildeman og þá matur á Il Vecchio Pacioccone. fengum okkur fína forrétti, svo eina nautasteik saman sem við náðum ekki að klára.
En Iðunn var orðin lúin og ég þurfti að skipta um skyrtu eftir rauðvíns yfirhellingu.

Iðunn fór að sofa um tíu, ég fór á smá flakk, De Bekeerde Suster, „skrifstofuna“ þar sem ég hitti slatta af liði… svo í smá póker á Holland Casino þar sem ég tapaði 50 evrum í restina, frekar ósanngjarnt að mér fannst.

Laugardagur

Við byrjuðum daginn með morgunmat á hótelinu, reyndar smá rugl á pöntuninni, en svo yfir á IBC, svo sem ekki mikið spennandi, en BBC var með áhugaverða tilraunastarfsemi, flottir risa 8K skjáir, hitti RtSoftware.. en annars ekkert sérstaklega spennandi.

Þannig að ég dreif mig niður í bæ, fann Iðunni í bjór á Dam horninu, svo yfir í bjór á einni brúnni og annar á Proeflokaal Arendsnest.

Kíktum upp á hótel áður en við fórum á Mr Porter, með smá viðkomu á Kiterion, en maturinn frábær á Mr Porter, ma. nautasteik með Foie Gras, þjónustan til fyrirmyndar og umhverfið flott, en óþolandi hávær „teknó“ tónlist. Voum kannski aðeins of dugleg í kokteilum og Whisky drykkju.

En yfir á „skrifstofuna“ (Eruopub) þar sem við hittum aftur eitthvað af fólki, svo á barinn sem Rt Software sátu á, og sátum að sumbli fram eftir.

Sunnudagur

Ég var aðeins lúinn, en Iðunn fór snemma af stað, rétt náði flugi eftir að hafa verið í vandræðum með að borga leigubílinn.

Ég tók smá rölt um bæinn, fann nýtt brugghús, Prael, á besta stað, finn bjór og ótrúlegt að hafa ekki fundið áður. Tók reyndar einn Heineken við síkið áður.

Einn Kwak Cafe Belgique áður en ég fór upp á flugvöll, frekar tæpur á tíma en þetta hafðist.

Þurfti svo að bíða talsvert í Keflavík eftir Iðunni, vissi það reyndar fyrir, en fluginu hennar seinkaði þannig að biðin varð eitthvað lengri. Horfði á restina á Breiðablik-Valur í kvennaboltanum, í símanum, þar sem Blikar jöfnuðu á síðustu sekúndu.

Jónatan fær nafnið staðfest – Riga, Tallinn og Stokkhólmur

Riga

Þá var kominn tími á fjölskylduferð til Riga, Guðjón var mættur en við Iðunn, Alexandra og Viktor flugum út að kvöldi 31. júlí, rétt fyrir tíu og vorum lent fyrir fjögur um nóttina.

Við Iðunn áttum ekki pantað herbergi fyrr en á hádegi daginn eftir en hótelið bjargaði okkur ferðarúmi inni hjá Alexöndru og Viktori.

Okkar beið reyndar freyðivín frá Ilze en við lögðum ekki í að opna það um nóttina.

Fyrsti dagur

Þá var komið að því að hitta Jónatan í fyrsta skipti í meira en mánuð. Ilze var að vinna og dagurinn frekar rólegur. Ilze og Elina buðu svo upp á alls kyns góðmeti seinni partinn og svo fórum við á veitingastaðinn, Fazenda Bazar, þar sem Jonni vildi leyfa okkur að smakka bjór sem hann hafði hlakkað til að leyfa okkur að smakka, Valmiermuiža.

Þegar til kom þá var bjórinn ekki í boði á staðnum, en fengum að smakka á Klondaika Tex-Mex staðnum eftir mat. Það kom reyndar í ljós að við Iðunn höfðum einmitt fengið hann fyrr um daginn. Mjög góður, en ekki viss um að ég sé eins forfallinn og Jonni.

Eftir stutt spjall við hollenskan DJ og hljóðmann (Vengaboys) fórum við, til þess að gera snemma, að sofa.

Undirbúningur

Ilze var búin að panta Iðunni í „vinnustofu“ við að undirbúa matinn fyrir skírnina og Elina var með.

Við hin fórum á flakk með Jónatan, röltum í gegnum nálægan garð og niður í gamla bæ.

Þegar þangað var komið vildi Jónatan mat sinn og engar refjar, en við vorum ekki með neinn barnamat með okkur, Alexandra og Viktor settust með Jónatan á Garage (minnir mig) á meðan við Jonni hlupum fram og til baka að reyna að finna mat, fyrst út í buskann í boði Google, svo á apótek sem bauð ekki upp á neitt, svo matvöruverslun sem bauð heldur ekki upp á neitt og fundum svo loks í öðru og stærra apróteki. Jónatan fékk sitt að lokum, við pöntuðum smárétti og röltum til baka.

Þar beið okkar að smakka á sýnishornum og svo bauð Ilze upp á rif með kartöflum. Ieva og mamma hennar voru með okkur.

Skírnardagur

Við fórum út í búð eftir brauði og salti og mættum í loka undirbúning fyrir skírnina frekar snemma, svo upp í kirkjuna fyrir 11:00.

Athöfnin var stutt, sem betur fer, því við skildum ekki orð.

Síðan var haldið inn í garð nálægu safni tileinkað einu virtasta skáldi Letta.

Virkilega vel heppnað, við vorum um 20 í veislunni, Ieva skírnarvottur og Ilze héldu ræður, vinkona þeirra söng nokkur lög og einhver lög voru í almennum samsöng sem flestir gátu tekið undir, einhver leikur tengdur dansi („Ingeborg frænka“) og óska-hnútaband til Jónatans.

Veitingarnar voru frábærar og flestar með lettnesku sniði, kannski fyrir utan lax og silung sem við höfðum mætt með.

Þá var gaman að hitta Juris, pabba Elinu, og spjalla yfir góðum vindli.

Svo var meiri tónlist, Guðjón spilaði nokkur lög á ukulele og við fórum ekki til baka fyrr en langt var liðið á daginn.

Við Iðunn ákváðum að grípa drykk eftir að búið var að skila öllu heim til Ilze, duttum fyrir tilviljun inn á stórskemmtilegan kokteil bar, Cloud Nine, sem var að halda upp á þriggja ára afmælið sitt með ansi skemmtilegri dagskrá.

Um kvöldið fórum við með „börnunum“ á ítalska staðinn Portofino, frábær matur en Jonni var ekki að kunna við viðmótið hjá þjóninum. Við Iðunn fengum okkur trufflu og humar ravioli, hvort tveggja fyrsta flokks.

Eftir matinn kíktum við aftur á barinn Tex-Max Klondaika, Viktor fór „snemma“ heim, en við hin duttum inn á Beer Museum, stórskemmtilegan bjórbar í götunni okkar, þar sem Jonni var auðvitað skyldugur að kaupa bjórinn Trúbadúr Magma.

En komumst loksins heim að sofa, örlítið lúin.

Bogfimi og fótbolta áhorf

Eitthvað riðlaðist dagskráin á sunnudeginum (sem var nú hvort sem er óljós) þegar við fréttum að vinur Ilze væri alvarlega veikur á spítala og hún yrði hjá honum eitthvað fram eftir degi.

Elina varð eftir heima en við hin, þmt. Jónatan, fórum á flakk.

Börnin fengu sér smárétti á Riviera en við Iðunn létum kaffi nægja.

Við Iðunn og Jónatan röltum svo aðeins á undan í áttina að miðbænum, stoppuðum svo í kaffi þannig að þau myndu ná okkur.

Þá settumst við niður í bjór, Alexandra bauð upp á snarl og Jónatan fékk sinn „bjór“ til að hita upp fyrir bogfimina.

Ég náði besta skorinu í bogfiminni, eða minnst vonda, áður en Alexandra og Viktor röltu með Jónatan heim.

Við Iðunn og Jonni settumst á Kiwi barinn að horfa á „Liverpool – Manchester City“ spilaum samfélagsskjöldinn á Englandi.

Alexandra og Viktor komu svo til baka og eftir leik fórum við á Steiku Haoss, fínar steikur, en ekkert meira en það – aðallega eftirminnilegt hvað þjónninn, Jónatan, var stressaður þó honum gengi þokkalega vel.

Aftur á Kiwi barinn að horfa á „Arsenal – Barcelona“, sem tapaðist í lokin, nokkuð sem Iðunn tók óþarflega mikið nærri sér.

Guðjón benti þjóninum á að það mætti alveg misskilja skiltið „All Blacks Stand“ við litlar vinsældir og að lyktin á karlaklósettinu jaðraði við eiturefnaárás, við enn minni vinsældir.

Við ætluðum á vindla Whisky barinn Oak Lounge, en sá reyndist lokaður og enduðum á Cloud Nine þar sem allir (nema ég) voru fyrir sig hrifnir af einhverjum popp-salt-smjör kokteil. Við Iðunn fórum heim eftir einn drykk, Alexandra fljótlega eftir það en Guðjón og Viktor tóku djammið alvarlega, fóru á annan bar niðri í bæ og entust eitthvað fram undir morgun.

Búðarráp

Enn frekar óljóst hvernig dagurinn færi, Eric, vinur þeirra, enn mikið veikur. Einhver þynnka var að hrjá okkur, mismikil, en í réttu hlutfalli við endinguna kvöldið (nóttina) áður.

Við Iðunn og Alexandra fórum í verslunarmiðstöðina Spice þar sem við gerðum bara nokkuð góð kaup.

Við gripum smá snarl á Buberts seinni partinn, þeas. við Iðunn og Jonni, Alexandra kíkti undir lokin, allt í lagi snarl, Iðunn kannski óheppin.

Við buðum svo Ilze í mat á Riviera um kvöldið, frábær matur á mjög góðum stað, en við Iðunn áttum flug daginn eftir þannig að við entumst ekki lengi. Ég dró Iðunni og Viktor í að leita að bar sem sýndi „Huddersfield – Derby“ en fundum ekki (þrátt fyrir allt of langa leit) þannig að við enduðum inni á hóteli þar sem Viktor benti okkur á nokkur „hlaðvörp“ (PodCast) til að kanna.

Tallinn

Við Iðunn áttum flug með AirBaltic til Tallinn í hádeginu og þeir vöruðu okkur við að það væri vissara að mæta 3 tímum fyrir brottför vegna hugsanlegra biðraða.

Þannig að við tókum morgunmatinn snemma, kvöddum Alexöndru og Viktor og drifum okkur upp á flugvöll. Það tók kannski 15 mínútur að tékka inn, skila af okkur töskum og fara í gegnum öryggisleitina.

En okkur leiddist svo sem ekkert og komumst til Tallinn á tilsettum tíma.

Hótelið, Metropol Spa Hotel, var mjög flott, aðgangur að heitum pottum og fjórum tegundum af gufu.

Það var skilyrði að vera í sundfötum þannig að við drifum okkur í nálæga verslunarmiðstöð, keyptum sundföt og eitthvað meira áður en við komum okkur fyrir.

Reyndar datt ég óþægilega í einni gufunni en lifði það svo sem (augljóslega) af.

Við áttum svo borð á Olde Hansa, hafði smá áhyggjur af að Iðunn myndi ekki kunna að meta matinn.

En öðru nær, bæði var maturinn mjög góður, hentaði henni kannski betur en maturinn sem ég fékk þegar ég mætti með Postulunum fyrir tveimur árum – og hvort sem er stemmingin og umhverfið eftirminnilegt. Meira að segja undarlegur bjórinn smakkaðist vel og passaði vel við tilefnið.

Við kíktum á einn bar á Vana torgi fyrir svefninn en eitthvað lúin eftir flakkið og að vakna snemma.

Dagur í Tallinn

Fínn dagur í Tallinn, frábær morgunmatur, þurftum að skipta sundbol sem hafði reynst gallaður en röltum svo niður í bæ, gripum bjór og Iðunn fann snyrtistofu fyrir augabrúnir, en fékk ekki tíma í klippingu.

Ég fór í nudd á meðan, þurfti að bíða smá stund og þar sem „yfirhalningin“ gekk hratt hjá Iðunni fór hún að leita að bar sem ég hafði stungið upp á. En henni tókst að villast all hressilega, fór um hálfa borgina og var komin nokkuð langt frá miðborginni og eitthvað lengra en hótelið. Ég fann hana á endanum og við fórum aftur niður í bæ, fyrst á Ill Draakon, stórskemmtilegur bar í kastala á aðaltorginu í gamla bænum, sérstakur bjór, pylsur og gúrkur og fussandi og sveiandi afgreiðslukonur í stíl. Þar næst á Beer House í næsta bjór áður en við röltum upp á hótel, reyndar með viðkomu á Scotland Yard barnum, sem tekur þemað alvarlega, áður en við kíktum stutt í heitan pott og gufu á hótelinu.

Um kvöldið áttum við borð á Tabula Rasa á St. Petersburg hótelinu, Iðunn ekki heppin með mat og minn svo sem ekkert sérstakur. En bæði umhverfi og þjónusta var svo sem fyrsta flokks.

Það er líka Oak Lounge í Tallinn og við fórum þangað í Whisky og vindil og sátum þar eitthvað þar til tími var kominn á að segja þetta gott.

Ferja (skóverslun)

Skórnir mínir voru ónýtir, ég fann skóbúð sem selur einu skóna sem ég virðist geta notað, þannig að við tókum leigubíl örlítið út fyrir miðbæinn í svakalega verslunarmiðstöð, fundum skóbúðina og verulega gott verð á skóm, þannig að ég keypti tvö pör. Enda var afgreiðslustúlkan svo vingjarnleg að selja mér síðasta parið sem annar hafði pantað og borgað fyrir, hún fann sams konar par í annarri búð í Tallinn og hún ætlaði einfaldlega að sækja það! Frábær þjónusta. Það kom í ljós að hin búðin var reyndar í miðbæ Tallinn, þannig að við hefðum ekki þurft að fara svona langt..

En bjór á hótelinu, svo í ferjuna, alltaf sérstök stemming.

Við komumst að því að þó við hefðum pantað far frá Tallinn til Stokkhólms þá lá leiðin fyrst til Helsinki og skiltin bentu eingöngu á Helsinki… frekar löng og leiðinlegt bið í biðsal og fulla kerlingin sem var að áreita krakkana fyrir framan okkur var ekki til að gera biðina skemmtilegri.

En þetta hafðist, frekar þröngt, en fín aðstaða.

Það var svo sem ekki í boði að fara í land í Helsinki en höfum svona tæknilega séð komið þangað.

Við fengum okkur snarl á grillinu og svo í smökkunarmatseðil á No Name með „pöruðum“ vínum – frábær matur og eftir smá rölt um skipið, þar sem ég tapaði 20 Evrum í 21 gripum við lokadrykk á Lounge bar, þar sem Iðunn kolféll fyrir Ardbeg Whisky og ég fékk frábært finnskt gin, tengt bláberjum, Arctic Blue Gin.

Stokkhólmur

Ferjan lenti í Stokkhólmi um tíuleytið og eftir að Iðunn hafði ákveðið að taka áhættuna af að smygla hálfri Whisky flösku, með hjartsláttinn í 50% yfirkeyrslu – og aðeins til að komast að því að það var engin leit og öllum í rauninni sama – þá mættum við upp á hótel, flott hótel og vel staðsett, frábært rúm… en baðherbergið frekar undarlegt, mjög þröngt, vaskurinn svona einn fjórði af venjulegum vaski og svo blikkandi ljós við gólfið, sem hefði verið fullkomlega gagnslaust í besta falli, en var verulega pirrandi þegar það var að reyna að skynja hreyfingar – og gekk ekkert sérstaklega vel.

Við fórum niður á Gamla Stan, komumst að því að reykingafólk þarf að trufla ókunnuga 10 metra frá veitingahúsum og venjan er að henda stubbum á götuna, enda engir öskubakkar.

Grenjandi rigning, eitthvað var ég nískur á að kaupa regnhlíf og við fundum að lokum staðinn S:ta Clara þar sem við fengum okkur snitsel og bjór, Iðunn hafði séð mjög freistandi snitsel á öðrum stað og hugurinn kominn þangað.

Upp á hótel, náðum aðeins að sofna og hittum svo Eygló & Stefán í pöbbarölti og ítölskum skyndibita á Vapiano. Byrjuðum á uppáhaldsstaðnum þeirra, Omnipollos, svo upp á næstu hæð með flottu útisýni, þaðan á uppáhaldsbar Eyglóar og upp á bar á 25. hæð, Himlen (held ég), með frábært útsýni yfir borgina. Kom aðeins á óvart hversu mikið var af svörtum þökum, en Stefán skýrði (daginn eftir) að þetta væri mun hagkvæmara til að halda hita.

Þaðan niður á Gamla Stan, fyrst Whisky barinn Ardbeg Embassy – enda Iðunn komin í aðdáenda klúbb Ardbeg – svo undarlegan lítinn bar, Sjätte Tunnan sem var með þennan risakjallara, mun stærri en barinn sjálfur. Eins og Stefán lýsti þessu, ef það kviknar í, þá er bara að panta besta Whisky á staðnum og sætta sig við orðinn hlut.

En ég var eitthvað lélegur og lúinn og við vorum komin heim um eitt leytið.

Laugardagur í Stokkhólmi

Frábær morgunmatur á hótelinu og svo aðeins á rölt, sátum yfir góðum hluta af „West Ham – Manchester City“ áður en við hittum Rikka, sem var í stúdíó vinnu í Stokkhólmi. Eftir einn bjór við Hornsgatan var farið á Abba safnið, ekki minn fyrsti valkostur, en alveg til í að kíkja. Þetta tók hins vegar óratíma og við rétt náðum einum bjór eftir safnið áður en við þurftum að drífa okkur upp á hótel að skipta um föt og fara að hitta Árna og Maríu.

Eitthvað voru undarlegar og smásmugulegar reglugerðirnar farnar að síga í mig en að mörgu leyti heillandi borg og við þurfum að koma aftur og skoða betur.

En hittum svo Árna og Maríu á mjög góðum veitingastað, nokkurs konar hverfisveitingastaður, Tranan – besta nautasteikin í ferðinni og virkilega gaman að hitta þau. Við gripum svo nokkra bjóra á nálægum bar áður en við lögðum af stað í áttina að hótelinu. Einn kokteill og annar bjór áður en við fórum að sofa, en létum þetta gott heita um tvö..

Heim

Enn einn alvöru morgunmaturinn á hótelinu, tveir bjórar á sitt hvorum barnum og svo upp á flugvöll.

Það tók sinn tíma að komast inn og við fórum að leita að bar til að horfa á „Newcastle – Arsenal“. Írski barinn sem okkur hafði verið bent á og stærði sig af að vera besti íþróttabarinn var með frjálsíþróttamót á öllum skjám. Eitthvað leist okkur ekki á matseðilinn og ákváðum að fara annað. Við sáum að leikurinn var sýndur úti í horni á einhvers konar smárétta stað með þokkalegum bjór og frekar vondum mat.

En flugið heim óvenju þægilegt og stytti stundir að kaupa WiFi og fylgjast með gangi máli í enska og íslenska boltanum.

Viktor sótti okkur til Keflavíkur og – alltaf gott að koma heim – en óvenju vel þegið í þetta sinn, þrátt fyrir frábæra ferð.

Pollamót

Sú hugmynd kom upp í vor hjá fótboltahópnum, Postulunum, að senda lið á Pollamót Þórs á Akureyri. Við náðum reyndar ekki fullri mætingu og Sævar hafði verið með öðru liði, Innri fegurð, síðustu ár.

Það varð úr að liðin voru sameinuð í Postullega fegurð, þó í raun hafi Sævar og Einar verið einu mennirnir frá Innri fegurð. Einn félagi Matta frá fyrri árum úr utandeildinni bættist í hópinn, Gummi, en við ákváðum að láta þar við sitja. Lalli datt út rétt fyrir mót, Alli náði ekki að losa sig og Maggi var bókaður í veiði (eins og það sé einhver afsökun).

Fyrri mótsdagur

Við Iðunn, sem mætti sem stuðningsmaður, vöknuðum tímanlega og Viktor skutlaði okkur í flug kl. 7:10 á föstudeginum, 5. júlí.

Vorum svo mætt upp á Hótel Eddu upp úr átta, fengum okkur ágætan en allt of dýran morgunmat á staðnum og þurftum svo aðeins að bíða eftir herberginu.

Það kom í ljós að ég hafði pantað eins manns herbergi án baðherbergis. En það bjargaðist fljótt, þjónustan til fyrirmyndar og við fengum fína uppfærslu í alvöru herbergi á allt-í-lagi verði.

Matti sótti okkur upp á hótel og fyrst á dagskrá var liðsfundur kl. 11:00 uppi í Hamri, félagsheimili Þórs.

Fyrsti leikur var 12:00 inni í Boganum gegn Bjartar vonir vakna. Sævar skoraði fljótlega eftir að markmaður þeirra missti boltann. Svo komu þrjú mörk frá þeim, tvö ódýr en eitt af dýrari gerðinni. Sævar náði í – og skoraði úr – viti, en við náðum ekki að jafna og töpuðum 2-3.

Þá var tími á smá bjór og svo var næsti leikur utanhúss gegn Grímsey. Þeir skoruðu ódýrt mark snemma en Sævar jafnaði eftir að sækja og skora úr víti. Eitthvað af hálf-færum var það sem eftir lifði leiks í báðar áttir en leiknum lauk með jafntefli, 1-1.

Þá var komið að meiri bjór, kannski voru einhverjir okkar full duglegir. Síðasti leikur dagsins var innanhúss, gegn Ungmennafélaginu Óþokka. Sævar þurfti að fara í hálfleik, eftir að hafa skorað eitt mark. Á endanum töpuðum óþarflega stórt 2-7, Gummi með seinna markið eftir aðstoð Tomma og Einars og smá klafs. En allt of mikið af allt of ódýrum mörkum.

Kannski var skemmtilegasta augnablik helgarinnar þegar annar keppandi fékk staðfest hjá mér á barnum að ég væri tengdur Fræbbblunum og næst þegar ég kom á barinn var Bjór kominn á fullt og fín stemming í liðinu – skal játa að ég fór aðeins hjá mér! En veit ekki enn hvaða lið þetta var…

Við Iðunn náðum aðeins að slaka á uppi á hóteli, en fór um svo með hluta hópsins á Greifann, maturinn í góðu lagi og stemmingin mjög fín.

Þaðan yfir á Götubarinn þar sem við sátum eitthvað fram eftir, létum okkur hafa það að rölta upp (bókstaflega) á hótel.

Seinni mótsdagur

Við þurftum að taka daginn snemma og mæta KR hálf tíu um morguninn, tímasetningin í sjálfu sér næg afsökun fyrir slakri frammistöðu. Sævar kom okkur yfir snemma leiks en þeir jöfnuðu rétt fyrir hálfleik.

Seinni hálfleikurinn var engan veginn nógu góður, allt of mikið af ódýrum mörkum og við enduðum á að tapa 1-5, Ívar náði tveimur sem ég hefði nú átt að geta stoppað, svona á góðum degi, fyrir nokkuð löngu…

Það var svo smá hringl með stað og stund fyrir lokaleikinn við Huginn Fellum. Þetta var leikur neðstu liðanna í hvorum riðli, keppni um svokallaðan forsetabikar, sem er ekki til og ég veit ekki hvers vegna leikurinn er kallaður það!

Sá leikur gekk mun betur, Gummi skoraði fínt mark beint úr aukaspyrnu og þrátt fyrir að þeir hafi fengið eitt dauðafæri og átt einhverja möguleika þá áttum við mun fleiri og hefðum átt að skora fleiri, á góðum degi hefði eitthvað dottið inn frá mér, Sævari, Matta, Tomma, Einari, Pétri og/eða Dodda.

Eftir leikinn við sátum í góðum félagsskap fram eftir degi, með „stuðningsmönnunum“ Iðunni, Elvu, Önnu Karen og fleirum úr fjölskyldu Sævars. Við Iðunn drifum okkur upp á hótel seinni partinn, Iðunn lagði sig en ég lagði ekki í að fara að sofa og fór niður í bæ, einfaldur hamborgari og góður bjór til að halda mér gangandi.

Ég hélt að það væri verðlaunaafhending með tilheyrandi stemmingu klukkan 19:00, búinn að fá nóg af leigubílum og ákvað að rölta þetta, enda nýbúinn að fá mér hamborgara og bjór til að halda mér „gangandi“. Það tók talsvert meiri tíma en ég hafði gert mér grein fyrir og þegar þangað var komið greip ég í tómt, bókstaflega allir farnir. Reyndar greip ég ekki alveg í tómt, ég fann handklæði sem ég hafði gleymt!

Þá aftur upp á hótel og nú var Iðunn vöknuð og við klár í kvöldmat. Það gekk eitthvað illa að finna hvar hver var, þannig að við fórum og fengum fínustu steik á T Bone og ekki spillti fín þjónusta.

Við ákváðum að kíkja upp í Hamar á verðlaunaafhendinguna, væntanlega hafa leigubílstjórar bæjarins grátið þegar við fórum heim. Þar hélt bjórdrykkja áfram í góðum hóp og jafnvel Hendricks Gin með tilheyrandi. Pallaballið var að byrjaði svo eftir verðlaun en við Iðunn létum okkur hverfa fljótlega. Eins og ég kann vel við Palla, þá eigum við ekki mörg sameiginleg uppáhaldslög!

Við tókum aftur stefnuna á Götubarinn en Iðunn varalveg orðin gjörsamlega bensínlaus. Við hittum Óla Þ. Harðar og náðum smá spjalli en Iðunn var svo búinn á því að ég náði ekki að klára fyrsta bjór – og var nægilega þreyttur sjálfur til að nenna ekki að hanga einn eftir.

Heim

Við sváfum út á sunnudeginum, fengum okkur samloku í morgunmat á hótelinu um hádegið, byrjuðum reyndar að kíkja á Café Laut en leist eiginlega hvorki á verðlagið né vöru úrvalið.

Matti var einn á bíl og við fengum far í bæinn hjá honum.

Við stoppuðum nokkrum sinnum stutt, í Varmahlíð, Staðaskála og Borgarnesi og ferðin í bæinn gekk vel í góðum félagsskap.