Greinasafn fyrir merki: Benalmadena

Benalmadena – Malaga – London

Þá heimferð, með millilendingu í London.

Flugum með RyanAir.. sem er kannski ekki besta flugfélag í heimi, en ódýrt er það. Við fengum „boarding“ upp fyrir tilsettan tíma, en ekkert „boarding“ var hafið. Þarna biðum við í um fimmtán mínútur áður en byrjað var að hleypa um borð. Þá var okkur hleypt í næsta gang og látin bíða þar í tæpar tuttugu mínútur. Þegar á leið sáum við að farþegar úr fyrra flugi voru loksins byrjaðir að yfirgefa flugvélina. Eftir þessa bið var okkur hleypt áfram, bara til að bíða í næsta gangi í drykklanga stund.

En við komumst að lokum til London.

Einhvern veginn tekur alltaf tíma að komast í miðbæinn og við vorum eiginlega ekki búin að koma okkur fyrir á hálf lélegu hótelinu fyrr en um fimm leytið.

En alltaf gaman að rölta á milli baranna í London á föstudagseftirmiðdegi. Byrjuðum á hverfisbarnum okkar, þaðan á Shakespears Head og enduðum á Charing Cross þar sem við sátum úti við í góða stund.

Við áttum borð á japanska Roka við Charlotte Street.

Þeir eru svo sem ekkert að gefa matinn þarna.

En mikið svakalegar er þetta flottur staður og góður matur. Einn sá albesti.

En þjónustan var svona og svona, vínið kom ekki fyrr en eftir tvo fyrstu réttina og ég þurfti að bíða dágóða stund eftir réttum „verkfærum“.

Það sem truflaði þó mest var hávær lyftutónlistin, einhvers konar teknó-drum-bass-wannabe.. allt, allt of há.

Hef ekki tekið eftir þessu áður í þau skipti sem við höfum borðað þarna, kannski sátum við á vondum stað. En, ef símarnir okkar hefðu ekki verið batteríslausir.. þá hefði verið þægilegra að spjalla saman með SMS en að reyna að tala saman.

London - Iðunn - 2

Læknisferð

Magnús var enn frekar veikur og þarf nú svolítið til.

Við „linntum ekki látum“ fyrr en hann fór til læknis, enda stutt að fara og ódýrt í leigubíl. Það kostaði reyndar nokkrar ferðir að sækja nauðsynleg skjöl, en á endanum komst hann í rannsókn og læknarnir komust að því að hann væri með bronkítis og sýkingu í lungum. Undarlegt að enginn læknanna heima skyldi sjá þetta eftir ítrekaðar rannsóknir í margar vikur. En hann fékk sýklalyf sem vonandi vinna á þessu. Hins vegar var verra að læknirinn ráðlagði honum að drekka hvorki áfengi né kaffi.. bara alls ekki.

Við Iðunn fórum aðeins á ströndina og síðan í mjög síðbúinn hádegisverð á hinum sjávarrréttastaðnum við ströndina. Sæbrimi í þetta sinn, grillaður og frábær fyrir mig. Iðunn hélt sig við „calamites“.

En kíktum svo yfir götuna á ítalska staðinn í alveg ágætis mat og svo að horfa á seinni hálfleik hjá Malaga-Barcelona.. leikur sem hafði freistað mín mikið.. en Magnús var lasinn og Iðunn ekki nægilega spennt – og einhvern veginn nennti ég ekki einn.

Arroyo og smábátahöfn

Kíktum með Magnúsi & Sylvíu til Arroyo, meðal annars í klippingu og á alveg ágætis ítalskan stað í hádeginu. Röltum í smábátahöfnina og fengum okkur pizzu á Pinocio, sem bauð upp á pizzur á 5 evrur á þriðjudagskvöldstilboði.

Það lagði nú eiginlega línurnar þegar þjóninn spurði hvort ég vildi ekki franskar með pizzunni. Enda hef ég nú oft fengið betri pizzu. En ágætis ganga heim um kvöldið, stöldruðum aðeins við að horfa á maraþon vítakeppni Liverpool og Middlesbrough.. en enduðum svo á svölunum í Whisky og vindli. Magnús enn frekar slappur.

Benalmadena - kvöld rölt - 2

Sylvía og Magnús mæta

Morgunmatur, strönd, steikur aspas á svölunum með mozzarella tómatasalati, foie gras, rauðvín..

Magnús & Sylvía voru í seinna fallinu en við fórum með þeim á kínverska New Ming í götunni.. allt í lagi kínverskur staður.

Stutt stopp á Crumbles, Terry enn lasinn, getur ekki staðið í fótinn – og svo Whisky smakk á svölunum..

Gaman að fá þau, en verst hvað Magnús var lasinn..

Smábátahöfn og Da Fano

Morgunmatur á svölunum…fórum í vínsmökkun á nýja rauðvínsstaðnum seinni partinn. Smá fótbolta gláp seinni partinn á Belfry. Náði ekki að veðja á Manchester City – Chelsea vegna þess að ég var staddur á Spáni.. ætlaði að setja á 1-1 nákvæmlega. Og leikurinn fór nákvæmlega 1-1!

Tókum strætó niður á smábátahöfn og fórum á Da Fano.. frábær matur hjá mér, en Iðunn minna hrifin. Röltum um smábátahöfnina og svo á Cherrys í götunni okkar, en Crumbles var lokaður.

Benalmadena - smábátahöfn - 2

Strönd, sardínur og steik

Létum morgunmatinn nægja heima í þetta sinn, kíktum á ströndina og í hádegismat á næsta veitingastaðnum.. ég fékk mér sardínur af gömlum vana, Iðunn „calamites“. Sardínurnar voru frábærar, en eitthvert óbragð var að trufla mig langt fram á kvöld..

Kíkti á Aston Villa – Arsenal á Belfry og ekkert sérstaklega leiðinlegt að sjá Arsenal í þessum gír. Rauðvín, ostar og skinka á svölunum seinni partinn.

Fórum á argentínska steikhúsið um kvöldið.. þeir áttu bara eina Kobe steik, 300 gramma þannig að við fengum okkur annað, og heldur betur frábærar steikur… og rauðvín í takt.

Kíktum svo á Crumbles við hliðina og sátum nokkuð lengi fram eftir að spjalla við Alex og Maite.

Benalmadena - sardínur - 1

Markaður og strönd

Byrjuðum á föstudagsmarkaðnum uppi við Tivolíið – þeas. eftir morgunmat í bakaríinu – og keyptum eitthvert smádót en ekki mikið.

Á ströndina eftir hádegi og ætluðum á Casino um kvöldið til að taka þátt í póker móti. Sættum okkur við nánast óæta hamborgara á írskum / enskum stað á leiðinni – og komumst að því að vefsíða Casinosins var ekki rétt, mótin eru bara fyrstu daga vikunnar. Peningaspiliið („cash game“) var rétt að byrja, en lágmarksinnkaup voru 100 Evrur sem við ákváðum að tíma ekki.

Nokkrir bjórar á Crumbles og svo til þess að gera snemma heim að sofa.

Benalmadena - Iðunn - 2