Greinasafn fyrir merki: Fótbolti

Sigur í Postuladeildinni!

Fyrst ekkert varð af vinnufundum síðasta mánudagskvöld… þannig að þó heilsan væri ekki góð þá var frábært að ná lokakvöldi postulaboltans. Ég var með lítið forskot á Sævar en gaf mér svo sem ekki mikla möguleika, þreyttur og með strengi og eiginlega hálfaumur, kannski bylta í „landsleiknum“ við Rússana í Tallinn hafi nú ekki hjálpað. En það var ekki hægt að sleppa síðasta kvöldinu. Jafnvel þó ég hefði ekki mætt á venjulegu kvöldi, þá var hvorki hægt að horfa á aðgerðalaus á meðan Sævar hirti titilinn (einu sinni enn) og heldur ekki hægt að fá meðaltal og vinna án þess að spila.

En kvöld var sérstakt, eftir smá upphitun var ég klár í leik, ég var með Gústa, Magga og Tomma í liði og þrátt fyrir að tapa fyrsta leiknum unnum við fimm og töpuðum einum í viðbót. Sævars lið vann okkur einu sinni og þriðja liðið í öllum tilfellum.

Í síðasta leiknum vorum við að spila við lið Sævars. Okkur var tilkynnt af bekknum að mitt lið þyrfti að vinna til að ég næði titlinum, við vorum meira með boltann en gekk illa að skapa góð færi, Sævar og félagar sköpuðu sér svo góð færi en náðu ekki að skora. Undir blálokin náðum við boltanum í vörninni, ég (held ég) kom boltanum á Tomma sem átti eitraða sendingu á Magga sem afgreiddi boltann í netið. Síðast spyrna leiksins, síðasta spyrna kvöldsins og síðasta spyrna tímabilsins. Og tryggði mér titilinn.

Reyndar kom í ljós að „bekkurinn“ hafði reiknað vitlaust (eða ekki lesið ein úrslitin rétt), mér hefði dugað jafntefli.. það hefði óneitanlega verið fúlt að tapa leiknum við að rembast við að skora og fá á sig skyndisókn og tapa um leið titlinum.

En… þetta hafðist, annar postulatitillinn frá upphafi.

mark-2017-04-03

Postulauppskera

Eitt skemmtilegasta kvöld ársins – já, ég veit að ég nota þetta mikið, en það eru bara svo mörg skemmtileg kvöld á hverju ári – er þegar við Postular [fótboltahópur, ekki trúarhópur] höldum upp á úrslit síðasta tímabils.

Dagurinn byrjaði snemma, í Reykjavík Escape, þar sem okkar hópur fór langleiðina og leysti svo sem þrautina með einni vísbendingu 2-3 mínútum eftir að klukkutímanum lauk. Verst fannst okkur samt að heyra þegar stúlkurnar sem voru í tveimur öðrum herbergjum töluðu um „gömlu kallana“ 🙂

En þaðan í stuttan bjór í boði Tomma, til Matta í heitan pott, Preston-Arsenal, bjór, rauðvín, fljúgandi hreindýr, cogniac, kalkún, Sous Vide nautalund að hætta Kalla – þó Alli og Matti hafi nú eitthvað aðstoðað.

Arnar lagði spurningar fyrir hópinn, í þetta sinn að hluta til byggt á sögu hópsins, Sævar mætti með videó af síðasta tíma, hefðbundinn hringur var tekinn og skálað vel og vandlega fyrir hverju afreki – aðallega sigri Péturs.

Bæjarferðin endaði svo á Magma í skemmtilegu spili, en allt, allt of lengi fram undir morgun.postular-petur-1

Blikatap

Kíkti á Kópavogsvöll og sá Blikana tapa fyrir Fylki.. 0-1, ósanngjarnt, fúlt og ekki fótboltanum til framdráttar.

Jú, Fylkisliðið barðist vel, varnarleikurinn var vel skipulagður og þeir eru með mann sem getur skorað. En leikurinn gekk eiginlega þannig að Blikar spiluðu megnið af tímanum milli miðju og vítateigs Fylkis, en ekkert gekk þegar þangað var komið.. einhvers konar ráðleysi, of flókið og of margir háir boltar á sterka skallamenn í vörn Fylkis. Þess á milli lúðruðu Fylkismenn boltanum eitthvað, stundum í áttina að marki Blika, en alveg eins eitthvað annað, bara eitthvað. Ótrúlegt að horfa á fullorðna karlmenn spila eins og börn að mæta á sína fyrstu æfingu. Þeir fengu auðvitað nokkur dauðafæri úr spark-og-spretta tilburðunum.

En Fylkismenn komust líka upp með grófan leik, dómarinn missti þetta úr höndunum með því að grípa ekki strax í taumana og spjalda fyrstu hugsunarlausu árásina í upphafi leiks.

Blikabikartap

Kíkti með Arnari (Framara) á „Breiðablik-Fram“ í undanúrslitum bikarsins.

Fyrri hálfleikurinn var með þeim slakari sem ég hef séð til Blika í sumar, minnti óþægilega á leikinn við Fram í deildinni fyrr í sumar. Blikar voru engan veginn nægilega vakandi í fyrsta markinu, kannski treystu þeir á að aðstoðardómarinn hefði séð rangstöðuna og vítið er með þeim ódýrari sem ég hef séð. Fínn seinni hálfleikur dugði ekki til, markvörður Fram varði hvað eftir annað vel og varnarmaður bjargaði á línu þegar á þurfti að halda… aðeins eitt mark og Blikar úr leik.

En Hólmbert fær ósk sína uppfyllta að spila úrslitaleik bikarsins, frábært fyrir hann.

Þá er bara að slá Aktobe út úr Evrópukeppninni og vinna Íslandsmeistaratitilinn…

Annars ætlaði ég að skamma Blika fyrir að samþykkja þennan leiktíma, en sé á viðtölum að þetta var ákveðið af KSÍ í óþökk Blika, átta mig ekki á hvað er í gangi…