2012

31. desember 2012

Enn meiri stúdíó vinna með Rikka, kláruðum lagið og gefum út strax eftir miðnætti á nýju ári.

Mættum svo í mat í Austurbrún, að venju, með humarhala og fengum lambahrygg og ístertu. Alltaf jafn flott útsýni á flugeldana á hæðinni fyrir ofan húsið, við tókum svo sem ekki mikinn þátt, en ég kaupi alltaf aðeins til að styðja hjálparsveitirnar, en sem sagt, alltaf gaman að vera þarna um áramótin.

Kvöldið endaði svo í partý hjá Guðrúnu Odds, vorum ekki lengi, en vel þess virði að fara á flakk og detta þarna inn.

30. desember 2012

Meiri stúdíó vinna með Rikka, nokkuð nærri endanlegri mynd að komast á lagið.

Áramót Iðunnar í Bridge, 9 pör mættu og alveg sérstaklega vel heppnað kvöld – eins og alltaf..

29. desember 2012

Smá stúdíó vinna með Rikka, unnum í „Judge A Pope Just By The Cover“.

Helgi & Þóra mættu svo degi of snemma í áramóti Bridge mótið, en kom sér vel, við tókum létta æfingu, veitt ekki af…

28. desember 2012

Jólaboð hjá Magga & og Þóreyju… mættum í seinna fallinu eftir að hafa nánast slegið þetta af eftir veðurviðvaranir. En mjög gaman, fullt af fólki sem við höfum ýmist ekki séð lengi, ekki hitt áður eða hittum reglulega.

27. desember 2012

Jólamót Jonna haldið í átjánda sinn, höfuðpaurinn náði fullu húsi og ég varð að láta þriðja sætið nægja, enda er maður ekki í nokkurri æfingu, svo afsakanarnar séu rifjaðar upp.

26. desember 2012

Jólaboð hjá „Iðunnar“ hluta fjölskyldunnar hjá Magnúsi & Sylvíu í Austurbrún. Það vantaði ekkert upp á gott kvöld, góður matur, vín og auðvitað, aðallega, fjölskyldan.

25. desember 2012

Jólaboð hjá „mínum“ hluta fjölskyldunnar hjá Kidda, fjórar tegundir af hangikjöt, Einifellskjötið hafði vinninginn þetta árið þó samkeppnin væri hörð. En nóg að éta og drekka – aldrei þessu vant – og frábæru kvöldi lauk á nokkrum leikjum.

24. desember 2012

Aðfangadagur, svona nokkuð hefðbundinn, ofninn hætti reyndar um tíma að elda kalkúninn, en þetta hafðist allt, graflax, kalkúnn, ísterta, rauðvín, kaffi, konfekt – skiptumst á nokkuð vel heppnuðum gjöfum – og spiluðum Heilaspuna.

23. desember 2012

Skötuveisla hjá Öggu, eða réttara sagt skötu- saltfiskveisla. Ákavítið heimakryddað og vel heppnað… annars sátum við eiginlega allt of lengi að bjór, hvítvíns og ákavínsdrykkju og lítið varð úr verkum þegar heim kom.

21. desember 2012

Friddi og Pálína kíktu í mat ásamt foreldrum Pálínu sem eru í heimsókn á landinu, frá Mexíkó. En fyrir utan bjórsmökkun og rifjasteik… fannst þeim fróðlegt að smakka svið.

16. desember 2012

Laufabrauðsgerð hér í Kaldaseli, fyrsta alvöru jóla samkoman. Gaman að fá tengdaforeldrana, Magnús & Sylvíu með.

10. desember 2012

Síðasti tími í Postuladeildinni, Arnar vann öruggan og sanngjarnan sigur, þrátt fyrir góðan lokasprett hjá Magga. Fórum í Pool eftir lokakvöldið, Maggi, Þorvaldur og Þórhallur náðu flestum vinningum.

7-9. desember 2012

Einifells ferð, alltaf jafn gaman að koma þangað. Aðalverkefni helgarinnar var að reykja silung og lax sem tókst bara nokkuð vel. Gaman að hitta Þór & Sísú og frábært að fara að velja jólatré. Annars leið helgin allt of hratt við matargerð, víndrykkju, át, bjórdrykkju, reykstúss og hefðbundið Einifells dútl.

7. desember 2012

Próf, eða „gráðun“ í Karate hjá Breiðablik. Við Iðunn náðum bæði appelsínugula beltinu. En við misstum af hittingi á eftir. Við misstum reyndar líka af matarboði hjá tengdaforeldrunum í Austurbrún og jólamatarboði Staka á „Við Tjörnina“ En við misstum ekki af Einifells ferðinni.

5. desember 2012

Óvænt, stutt og skemmtileg vínsmökunn frá Hafliða eftir vinnu.

1. desember 2012

Jólamatur Sambindisins í Skildinganesi, alltaf frábært að koma þarna. Byrjuðum í heita pottinum, horfðum á nokkra leiki í enska boltanum, síðan hver frábær réttur á eftir öðrum, spurningaleikur að hætti Tomma og kvæðagátur frá Hadda.

30. nóvember 2012

Við Fræbbblar fórum í stúdíó til Friðriks Helgasonar að klára nýja útgáfu af jólalaginu okkar, „Ótrúleg jól 2012“. Fæst á GogoYoko og lággæða myndskreytt útgáfa er á YouTube.

24. nóvember 2012

Nokkrir Postular mættu í spil hér í Kaldaseli.

17. nóvember 2012

Fyrsti dagurinn með þokkalega heilsu alla vikuna. Langur dagur með Goutons Voir. Byrjuðum í gufu á Mógilsá, svo til Krissa & Rúnu á „hústökustaðinn“. Frábærir réttir þar að vanda og svo í leikhús að sjá „Tveggja þjónn“. Í stuttu máli skelfilega vont leikrit, ófyndið og klárlega versta sýning sem við höfum séð eftir að við fóum að stunda leikhúsin reglulega. Þaðan á Lebowski bar en eftir tvo bjóra komumst við að því (a) að næði til að tala saman allt annað og meira (2) tónlistin í allt öðrum og betri klassa og (3) verðið á áfenginu miklu hagstæðara – einmitt hér í Kaldaselinu.

11.-16. nóvember 2012

Skæð hálsbólga sem ætlaði aldrei að ganga yfir, var mállaus dögum saman og hálf rænulaus af verkjum. Annað skiptið á árinu sem ég missi nokkra daga úr vegna veikinda… tók einmitt saman fyrr á árinu að ég hafði bara misst úr tvo vinnudaga samtals á tímabilinu 2006-2011. Kannski jafnast þetta svona út…

10. nóvember 2012

Árshátíð Vantrúar – eftir að við Viktor fórum í gufu og heita potta – skemmtilegt kvöld og vel heppnaður matur, sérstaklega humarinn sem entist miklu lengur en sem forréttur. Ágætis tapas réttir, en kannski full mikið af þykku og þurru brauði.

9. nóvember 2012

Bjórsmökkun í Staka, smá pool, svo yfir í Poolstofuna, Lágmúla, þaðan yfir á Thorvaldsen í nokkurs konar kveðju partý hjá Mílu. Gaman að hitta Mílu fólk, en svefnleysi síðustu daga fór að segja til sín og fór frekar snemma heim. Enda skelfileg, hávær, diskótónlist frá áttunda áratugnum tekin við.

8. nóvember 2012

Iðunn farin til Stokkhólms yfir helgina að heimsækja Maríu, með Berglindi og Siggu.

7. nóvember 2012

Mál Adda er farið til Mannréttindadómstólsins, vonandi tekur þetta ekki of langan tíma, en þetta eru víst alltaf einhver ár.

4. nóvember 2012

Kaffiboð hjá Öggu í tilefni af því að mamma hefði orðið 95 ára á morgun.

3. nóvember 2012

Hljómleikaflakk um kvöldið, þvældist um í kuldanum á milli staða (sem aftur voru vel heitir) og svona mismunandi spennandi atriði. Enda hluti af stemmingunni. Ojba Rasta voru frábær að vanda, hinn Kanadíski WoodPidgeon var fínn og Sindri Eldon (& The Ways) kom(u) líka mjög skemmtilega á óvart. Og ekki gleyma Croisztans, íslensk/dönsk hljómsveit sem spilar einhvers konar balkan punk, flottir. En gaman að sjá hljómsveitir þróast og breytast.

2. nóvember 2012

Kíkti á Guðjón og félaga í Dizzy Ninjas á Reykjavík Backpackers Hostel, mjög fínir hljómleikar.

Við Fræbbblar spiluðum svo á Bar 11 hjá GogoYoko, Extravaganza hljómleikar. Gekk einfaldlega mjög vel, amk. eins og til stóð.

Morðingjarnir voru skemmtilegir, að vanda, á eftir. Og Vaccines frábærir í Listasafninu um kvöldið. Annað sem ég kíkti á var kannski minna spennandi.

27. október 2012

Nýttum okkur gjafabréf á Lækjarbrekku eftir Popppunktsþátttökuna, fínn matur og þjónustu. Við enduðum svo á Esju þar sem einhvers konar grímuball var í gangi. Mættum afmælispartýinu hans Viktors þegar við komum heim um þrjú leytið, þá voru þau að fara af stað í bæinn.

20. október 2012

Madridarhópurinn hittist hjá Helgu og Steinari. Gaman að hitta þau aftur og ekki spilltu frábærar veitingarnar – Steinar að mestu ábyrgur fyrir þeim.

13. október 2012

Mætti í Silfur Egils að ræða kosningar um þjóðkirkjuákvæði í stjórnarskrá.

Síðan í afmæli hjá Sæunni, ekki að spyrja að veitingunum frekar en fyrri daginn..

Og svo á kertafleytingu til minningar um Rasmus Rasmussen, náðum ekki að sitja alla athöfnina á eftir.

12. október 2012

Vantrúarhittingur á Kex og svo Svarta kaffi, alltaf skemmtilegir „hittingar“.

10. október 2012

Var frummælandi hjá Stjórnarskrárfélaginu í Iðnó í umræðum um þjóðkirkjuákvæðið í stjórnarskrá. Við Siggi Hólm vorum á móti, en Agnes biskup, Dögg stjórnlagaráðsmaður og Hjalti Hugason prófessor voru talsmenn kirkjunnar. Þetta gekk mjög vel (held ég), áhugaverðar umræður, en mér fannst talsmenn kirkjunnar ekki svara almennilega lykilatriðum.

5-7. október 2012

Árleg sumarbústaðaferð Sambindisins, í þetta sinn í Úthlíð, skemmtilegur staður. Hryggur á föstudagskvöld og Raclette á laugardegi.. eða í stuttu máli, fyrirtaksmatur og drykkir í góðum félagsskap. Smá golf á skemmtilegum velli í Úthlíð, póker, skrafl, heitur pottur, gufa, tónlist – eiginlega nákvæmlega eins og svona helgi á að vera.

4. október 2012

Útgáfuhljómleikar Ojba Rasta. Með skemmtilegri hljómleikum sem ég hef séð lengi, frábær tónlist hjá stórskemmtilegri hljómsveit – spilagleðin ósvikin og smitaði út í salinn.

29. september 2012

Sá Blika tryggja annað sæti í deildinni og Evrópusæti á næsta ári. Munar heilmiklu að vera í Evrópusæti á næsta ári.

Svo til Assa & Stínu í hljómsveitareldamennsku. Ekki ónýtt þegar bæði afbrags atvinnu- og áhugamenn í eldamennsku leggja saman í matseðill. Og ekki spillir að hljómsveitarhittingar eru talsvert skemmtilegri síðustu ár, ekki bara spilamennskan sem hefur stórbatnað.

28. september 2012

Postular og gestir mættu í spil, Iðunn, Arnar og Maggi unnu mótin.

22. september 2012

Afmæli hjá Laufeyju Rós, síðbúinn hádegismatur í Fögrubrekkunni. Frábær matur og skemmtileg tilbreyting.

Fórum svo á „Alvöru menn“ með Assa & Stínu í Austurbæ. Byrjuðum reyndr að fá okkur mat á Harry’s á Rauðarárstígnum, fínn matur að Filipískum hætti. Sýningin svona og svona… Leikararnir (og Pálmi) stóðu sig frábærlega, mjög vel gerðar senur og leikhústalandinn, sem á það til að trufla mig var ekki til staðar. Hins vegar er innihaldið ansi rýrt og brandararnir flestir frekar þunnir. Kannski virkuðu þeir enn verr vegna allra þeirra sem sátu nærri okkur og kútveltust af hlátri yfir hverju sem var, áður en „brandarinn“ var búinn og þess vegna í alvarlegu atriðunum.

21. september 2012

Ráðstefna Staka um rafræna viðskiptaferla. Vel heppnuð ráðstefna, Felix góður sem ráðstefnustjóri og ákveðinn klassi að fá Bjössa Thor til að spila í lokin.

20. september 2012

Breiðablik – Fylkir, sá reyndar bara seinni hálfleikinn, sem var frekar slakur, en Blikar náðu að jafna.

17. september 2012

Fótbolti, eins og alltaf á mánudögum. Síðan í útgáfuteiti Ojba Rasta á Faktorý.

16. september 2012

Afmæli hjá Rakel og Andra. Súkkulaðikakan hennar Góu klikkar ekki frekar en aðrar veitingar á þeim bæ.

15. september 2012

Hluti Sambindisins kom í fótbolta, bjór, eldamennsku og átveislu. Svona kvöld geta ekki misheppnast.

14. september 2012

Starfsmannafundur hjá Staka, Tapas / Sushi hjá Jóni á eftir með tilheyrandi drykkjum frá Hafliða. Þaðan í Pool mót Staka sem Jón „rúllaði upp“. Svo aftur í Staka, í þetta sinni í póker sem Gummi vann.

13. september 2012

Vinnufundur sviðstjóra hjá Staka og matur á „Við Tjörnina“ á eftir. Frábær matur, svartfugl og gellur, að vanda og ekki verra að grípa rauðvín á vínbarnum fyrir og eftir.

7.-12. september 2012

IBC sýningin í Amsterdam, eina ferðina enn. Alltaf gaman að koma til Amsterdam og alltaf sérstök stemming í kringum sýninguna. Bjórverðið er enn úti á túni á EuroPub, 8 evrur, en orðið viðráðanlegt víðast hvar annars staðar. Annars svona ekkert stórt í gangi þar, OTT fyrirferðamesta „fyrirbærið“.

En var duglegur að heimsækja uppáhaldsbarina, In De Wildeman, De Bekeerde Suster og Café Belgique klikka ekki og tveir nýir bættust við, báðir í hliðargötu við eina aðal verslunargötuna Kalverstraat.

Af veitingahúsunum datt Vasso endanlega út af verð-að-heimsækja listanum, ofeldað sjávarréttapasta með humri sem var búið að elda í tætlur, amk. fjórum sinnum og það fyrir mörgum dögum. Savini klikkaði ekki, kálfasteikin í meðallagi en trufflusveppa risottóið frábært sem og Carpacio. Fín nautasteik á Cau, en ömurleg teknó músíkin varð til að ég gat ekki beðið með að gleypa matinn í mig og flýja út. Sogno lítur ágætlega út en aðalrétturinn svona lala..

Alli kíkti til Amasterdam og við fórum á smá flakk á laugardagskvöldinu. Meðal annars í Holland Casino, þar sem ég var á sléttu fyrsta kvöldið, en fór út með 570 Evrur í vasanum annað kvöldið. Ég hef alltaf verið stífur á að kaupa inn fyrir ákveðna lágmarks upphæð, hef lítið á það sem tapað fé sem greiðslu fyrir skemmtunina. Síðasta kvöldið leyfði ég mér að kaupa mig tvisvar inn, enda heildar niðurstaðan í mjög góðum plús.

1. september 2012

Fimmtugsafmæli Helga í Austurbrún. Frábærar veitingar og stútfullt hús af skemmtilegu fólki. Eins og við var að búast.

31. ágúst 2012

Postulahittingur til upphitunar fyrir komandi tímabil. Gekk reyndar illa að púsla þessu saman en á endanum byrjuðum við að fá okkur að borða á Gandhi, mjög fínn indverskur matur. Þaðan í Pool í Lágmúlanum og kvöldinu lauk á Kojack í póker. Ekki spillti að bæði Poolið og pókerinn gengu ágætlega.

28. ágúst 2012

Vetrarstarf Sambindisins undirbúið hjá Tomma yfir bláberjaböku og öðrum kræsingum.

24. ágúst 2012

Horfði á úrslitaþátt Popppunkts með Viktori yfir pizzu. Alli, Kalli, Maggi og Þórhallur kíktu í spil. Mjög fínt kvöld. Fyndið að sjá sumar athugasemdir á Facebook þar sem menn eru móðgaðir fyrir hönd átrúnaðargða sinna að nafn á einhverju lagi hafi verið stolið úr okkur.

22. ágúst 2012

Iðunn fjörutíu og sex ára. Vá. En við fórum á Friðrik V., ég nýtti mér boðsbréf eftir popppunkt. En maturinn frábær og þessi framsetning alveg einstaklega skemmtileg, sbr. bloggfærslu.

20. ágúst 2012

Fram – Breiðablik. Ef það var eitthvað jákvætt við þennan leik þá var það að Hólmbert náði að skora. Blikarnir að spila langt undir getu (vona ég), Framarar sennilega líka, en svo sem fimm mörk. Svo er þetta undarlega dómarahappdrætti, það er endalaust verið að toga í peysur andstæðingsins, innan og utan vítateigs. Kannski er allt í lagi að taka á þessu og dæma alltaf, það kostar reyndar fimmtán víti í leik… En ég er ekki alveg að átta mig á því að sleppa nánast öllu peysutogi en dæma svo allt í einu víti, svona einmitt þegar ekkert er að gerast.

18. ágúst 2012

Menningarnótt. Alltaf stórskemmtilegt fyrirbæri. Við Fræbbblar spiluðum á tónleikum á Dillon. Annars kíktum við Iðunn á myndlistarsýningu Rúnu á Loka, yfir á Dillon, smábjór á Laugaveginum, aftur á Dillon, svo að hlusta á Rikka á Myrkum Músíkdögum í Hörpunni (sem kom þægilega á óvart), reyndum að komast til Helga & Þóru í kjötsúpu en samgöngukerfi borgarinnar var lamað og fljótlega útséð að við kæmumst ekki úr Hörpu yfir í Mávahlíð og aftur á Dillon á innan við klukkutíma. En við gripum súpu á Laugaveginum, svo á Dillon að spilum, biðum svo heillengi eftir að heyra Jonna spila með nýju hljómsveitinni, en kristilega fólkið sem auglýsti sig fyrir hvað þau elskuðu alla, var ekki nægilega elskulegt til að leyfa þeim að nota græjurnar sínar. Svo í kaffi (enn á Laugaveginum), þaðan á ellefuna að sjá Geira Sæm koma fram með Kiriama Family (Agent Fresco voru þrælgóðir á undan, en náðum reyndar bara 4 lögum). Svo á Arnarhól að kíkja á flugeldasýninguna, en hún var eiginlega vitlausu megin – ja, eða við vorum vitlausum megin – og sáum lítið. Létum þetta gott heita. En það voru óneitanlega margir viðburðirnir sem við ætluðum að ná sem einfaldlega gekk ekki upp.

12. ágúst 2012

Breiðablik – FH… leikurinn tapaðist með einu marki á fyrstu mínútu. Var lengi að vonast eftir jöfnunarmarki sem aldrei kom. En að mörgu leyti lítur Blika liðið vel út og betur en fyrr í sumar. Samt of mikið af erfiðum sendingum og ég er ekki enn að átta mig á hugmyndinni að dæla stöðugt háum boltum inn í teiginn, FH eru jú með nokkuð sterka miðverði og þar fyrir aftan er markvörður (Gunnleifur) sem hirti flesta boltana auðveldlega.

11. ágúst 2012

Tvöfalt fertugsafmæli Hrundar & Skarpa. Haldið að Þrándarholti í gömlum bragga, verulega skemmtileg stemming. Við gátum sem betur fer grenjað út innigistingu, en margir á tjaldsvæðinu og áður en partýið sjálft hófst í bragganum. Ég var með þeim lélegri og hætti um fjögur / hálf-fimm en Iðunn stóð vaktina til hálf-sjö.

10. ágúst 2012

Við Fræbbblar (Gummi, Steini, Assi, Iðunn og ég) spiluðum á opnun myndlistarsýningar Rúnu á KexHostel. Gaman að hitta marga gamla MK-inga – og auðvitað alla aðra sem mættu. Spilamennskan gekk, að ég held, bara nokkuð vel þrátt fyrir myrkur á sviðinu. Einhverjum fannst við full lágt stemmdir framan af..

En flott sýning og mæli eindregið með henni. Við röltum svo á Ölstofuna að fá okkur Bríó fyrir svefninn.

9. ágúst 2012

Fyrsta Fræbbblaæfing í nokkurn tíma, alltaf jafn gaman að æfa, í þetta skipti aðallega að undirbúa spilamennsku á KexHostel á morgun.

4. ágúst 2012

Kíktum á Öggu & og Magga (og Rakel og Andra) í Móa á heimleiðinni. Vöfflur með öllu hugsanlegu góðgæti og kaffi.

2.-4. ágúst 2012

Einifells ferð með GoutonsVoir, fyrra kvöldið gekk út á leikna morðgátu („Kampavínsmorðin“), nokkuð skemmtileg tilbreyting. En Einifellsferðirnar eru nú einhverjar skemmtilegustu ferðirnar okkar. Fiskisúpa á fimmtudagskvöld að ógleymdum ostum, hráskinku, freyðivíni, bjór, rauðvíni, hvítvíni og einhverju sem ég er örugglega búinn að gleyma. Hrossa- og lambakjöt á föstudagskvöldið með spínat, feta, kartöflurétti og salati. Assi & Stína unnu paramótið í Petanque, Auður einstaklingskeppnina og ég golfið, ef golf skyldi kalla. Og, já, ekki gleyma heimareyktu hangikjötinu sem Einifellsbúar þurrkuðu frá síðustu jólum, kokteilunum og vindlunum. Myndir komnar í Picasa möppuna.

18. júlí – 1. ágúst 2012

Ferð til Benalmadena (Costa del Sol) í íbúð tengdaforeldranna… þetta er að verða hálf partinn heimilislegt að koma þarna. Reyndar aðeins farið að fækka börum og veitingahúsum í götunni og þeir sem eru eftir eru allir (eða flestir) til sölu. En mjög fínn staður, allt til staðar sem þarf án þess að allt sé krökkt af ferðamönnum (eins og okkur). Halli, Steina og Sölvi komu með en fóru heim þremur dögum á undan okkur.

Annars var hitinn tiltölulega mátulegur og þetta snerist nánast eingöngu um að liggja í leti, borða góðan mat og drekka góð vín. Og nokkra bjóra. Da Fano er enn með langbesta matinn fyrir minn smekk, en þjónustan brást reyndar svo illa að það lá við að við færum áður en maturinn kom. Angus steikarhúsið er að vanda pottþétt og Appelsínutréið skemmtilegur nýr staður. Og jú, nýr ítalskur staður í götunni var bara nokkuð góður. Svo var hefðbundin heimsókn á Sabatini – þar sem flestir aðrir en ég fengu bara fínan mat – sardínur og ‘SeaBass’ grilluð við ströndina, heimsókn á gamla vínbarinn í Malaga og tapas barinn „okkar“ á móti Idhunn húsinu.

Svo auðvitað nokkrar minigolf ferðir, ein Tivoliferð og ferð í vatnagarðinn – en við slepptum Torremolinos og Fuengirola að þessu sinni. Smáslys með kyndilinn minn truflaði reyndar lestrar áformin. Við Iðunn stoppuðum eina nótt í London nálægt Stansted í bæ sem heitir Thaxted og virðist hafa frosið í tíma fyrir 40 árum. Við rétt náðum að gista, borða feitan enskan morgunmat og fá okkur bjór áður en við flugum heim.

Og síðasta daginn á Spáni fékk Iðunn húðflúr með Fræbbblamerkinu og nokkrum fígúrumyndum af hljómsveitarmeðlimum.

14. júlí 2012

Matur hjá Gulla & Kristínu, með Bryndísi… byrjuðum í garðinum á fordrykk og forrétt – svo tók hver gæðarétturinn og drykkurinn við af öðrum. Svo eru alltaf sérstaklega skemmtilegar umræður í þessum hóp og dugar ekki kvöldið til..

8. júlí 2012

Kiddi sextíu og fimm ára, rétt bráðum.. eru þetta ekki ellimerki að bæði systkynin séu orðin hálf sjötug? En flott veisla og Fiskidagsferð komin aftur upp á borðið…

7. júlí 2012

Frábært brúðkaup hjá Katý og Óla, eitt af þessum ógleymanlegu kvöldum. Ekkert að matnum, veitingunum yfirleitt, skemmtiatriðunum né öðrum liðum eins og myndatökunni. En kannski eftirminnilegast hvað brúðhjónunum sjálfum fannst þetta gaman…

5. júlí 2012

Agla Margrét 4ra ára (í gær, reyndar), eitthvað seinn í garðpartýið eftir vinnutörn, en veitingarnar sviku ekki frekar en fyrri daginn.

3. júlí 2012

Kíkti í stutt viðtal í Harmageddon vegna spurninganna til Hæstaréttar.

2. júlí 2012

DV birti nokkrar spurningar til Hæstaréttar í opnu bréfi, verður fróðlegt að fá svör.

1. júlí 2012

Dagurinn að mestu í vinnu, félagar Viktors og Jonni kíktu í grill og úrslitaleik EM.

30. júní 2012

Fengum okkur hádegissnarl seinni partinn úti á palli, svo til Helga & Þóru í mat. Þar klikkar hvorki eldamennskan né félagsskapurinn.

23. júní 2012

Viktor Orri útskrifaðist með ágætiseinkunn í stjórnmálafræði frá HÍ. Fjöldskylda og vinir (sem voru ekki á einhverju flakki) kíktu í síðdegissushi og freyðivín. Vinunum fjölgaði svo þegar EM leikur Frakka og Spánverja byrjaði. Við Iðunn kíktum til Halla Reynis sem var líka að útskrifast, sem kennari, og náðum ör hljómleikum með Herði Torfa og samkennurum Halla. Svo aftur heim og auðvitað stóð fjörið sem hæst, þannig að við slógumst í hópinn. Kvöldið endaði reyndar á leiðinlegri nótum því Addi náði að skera sig illa í fingurinn.

15.-17. júní 2012

Einifellsferð og ekki klikka þær. Nýveiddur skötuselur á föstudagskvöldinu og andalæri á laugardagskvöldinu. Að ógleymdu öllu meðlætinu sem fékk jafnvel enn meiri athygli og kostaði enn meira dútl en oft áður. Iðunn brenndi reyndar hendina á heitapottsstrompinu, rétt þegar hún var farin að hrósa slysalausri helgi. En, jú, ekki gleyma bjórnum, Whiskyinu, rauðvíninu, hvítvíninu, ostunum, pylsunum og … jú ég er örugglega að gleyma einhverju.

10. júní 2012

Elvis Costello í Hörpunni. Hann var alveg magnaður, ótrúlegt hvað hægt er að gera með einni rödd og gítar (eða píanói). Ekki spillti að hann spilaði hátt í þrjá tíma. Það vantaði reyndar eitthvað af lögum sem við vorum að vonast eftir, „Indoor Fireworks“ og „Poison Rose“ svo eitthvað sé nefnt. En hann hefði reyndar þurft að spila fram undir morgun til að ná öllu sem okkur langaði að heyra.

9.-10. júní 2012

Heimsókn til Júlíu & Orra í bústað í Úthlíð. Bjór, tónlist, hvítvín, heitur pottur, rauðvín, gufa, freyðivín, grill, fótbolti og Whisky. Og eins og það væri ekki nóg, frábær félagsskapur, gaman að kynnast Álfheiði & Óla.

2. júní 2012

Söng á Jazz og blúshátíð Kópavogs í Salnum með hljómsveit Björns Thoroddsen, þe. Bjössa, Gunnari Hrafns, Scott McLemore og Sunnu Gunnlaugs. Óttar Felix Hauksson og Sigurður K. Sigurðsson sungu nokkur lög, tríó Sunnu tók nokkur lög og Bjössi sína syrpu, ótrúlegur. Verulega gaman að taka þátt og skemmtileg samsetning af atriðum.

Kíktum svo aðeins að Kringlukrána þar sem PZ Myers var að efast með íslenskum „efurum“. Og Óttar Felix að spila seinna. Var aðeins að forvitnast hjá PZ Myers um þetta tal um hvort hógvær ríkiskirkja væri til bóta, en eitthvað var hann farinn að þreytast, mundi þó eftir rannsóknum sem sýna að þetta litlu.

Endaði kvöldið á pöbbarölti með Arnari, Braga, Þórhalli og Jóa – sem var í stuttri heimsókn á landinu.

31. maí 2012

Keppti í Popppunkti í einhvers konar lífsskoðunarliði með Davíð Þór Jónssyni og Hilmari Erni Hilmarssyni. Mótherjarnir ekki árennilegir, Örn Ævar gettubetur spurningahöfundur, Siggi Hlö útvarpsmaður og Villi Naglbítur tónlistarmaður og jú, spurningahöfundur. Mjög spennandi leikur samt..

Leikhús með Auði & Steina og Assa & og Stínu um kvöldið á „Svari við bréfi til Helgu“ í Borgarleikhúsinu. Síðasta leikhúsferð í áskriftarseríu vetrarins. Og svei mér þá ef ekki besta sýningin.

29. maí 2012

Fyrirlestur hjá PZ Myers í Háskólanum í boði Siðmenntar.

27. maí 2012

Skírnarveisla fyrir Hildi, dóttur Góu & Helga í Álfatúninu. Þriðja glæsiveislan á tólf tímum og ekki laust við að það væri farið að reyna á úthaldið í lok dags.

26. maí 2012

Ásta Lovísa stúdent og glæsileg veisla í Hrauntungunni að hætti Assa & Stínu.

Þaðan til Auðar & Steina að halda upp á að Lovísa var orðin stúdent og ekki klikkaði veislan þar frekar en við var að búast. Gerðumst reyndar nokkuð þaulsætin en ekki annað að sjá en að gestgjöfunum líkaði vel.

25. maí 2012

Stutt æfing með Bjössa Thor og félögum til að undirbúa þrjú lög fyrir jazz- og blúshátíð Kópavogs.

24. maí 2012

Við Fræbbblar spiluðum á Rokk í Reykjavík 2.0 með fullt af frábærum hljómsveitum og gekk eiginlega alveg svakalega vel, með betri hljómleikum okkar, held ég…

19. maí 2012

Hákon, Orri og Tommi kíktu í grill, Meistaradeildarúrslitaleik og tónlistarhlustun. OjbaRasta nokkuð fyrirferðarmikil í tónlistinni. En alltaf vel heppnuð kvöld hjá okkur.

16. maí 2012

Sjóstangaveiði hjá Staka á Eldingunni, náði einum þokkalegum, svona stemmingarinnar vegna. Enduðum á Pool stofunni í Lágmúla.

15. maí 2012

Sá Breiðablik vinna Val 1-0 í Pepsídeild karla, að mörgu leyti álitlegt Blikalið í sumar.

14. maí 2012

Matur í Austurbrún hjá tengdaforeldrunum, ekki að spyrja að matseldinni á þeim bænum – smá tölvu / tengingastúss.

11.-13. maí 2012

Uppskeruhátíð Postulanna, í þetta sinn í Minni borgum, sem er nokkuð skemmtileg aðstaða, smáhúsa þyrping og eitt mini „félagsheimili“. Smellpassaði fyrir okkur. Matur, pottur og póker á föstudagskvöldið. Golf á Kiðjabergi á laugardeginum í ekkert sérstaklega góðu veðri. En við Sævar unnum Texas scramble mótið en Sævar átti óneitanlega aðeins stærri þátt í sigrinum. Eitthvað var úthaldið minni á laugardagskvöldið en skemmtilegt að ná síðustu umferð í ensku deildinni í Hveragerði. Það er að segja eftir að við Bragi unnum spurningakeppnina. En fínn matur, frábær félagsskapur og fyrirmyndardagskrá. Ótrúleg elja í Arnari að skipuleggja helgina.

10. maí 2012

Gráðun í Karate skilaði gulu belti..

6. maí 2012

Tuttugu og níu ára brúðkaupsafmæli hjá okkur Iðunni. Og tengdaforeldrarnir eiga gullbrúðkaup.

4. maí 2012

Vor hátíð í vinnunni hjá Iðunn, skemmtilegt kvöld og eftir partý fram eftir… hefðum kannski betur hætt örlítið fyrr.

3. maí 2012

Við Fræbbblar fluttum æfingahúsnæði, amk. til bráðabirgða.

30. apríl 2012

Síðasti tíminn í Postulaboltanum á vorönn – ekkert sérstaklega leiðinlegt að ná loksins titlinum.

29. apríl 2012

Kíkti á Magga og félaga í Karlakór Kópavogs í Salnum, flottir tónleikar og mikil breyting á kórnum frá því í fyrra. Ekki spillti fyrir að sjá að nokkur kunnugleg andlit hafa bæst í hópinn.

28. apríl 2012

Nonni hélt upp á fertugsafmælið, flott veisla og skemmtileg. „Eitís“ þemað kannski ekki alveg fyrir mig, en fín stemming og einhvers konar útgáfa Lands og sona hélt uppi stemmingu.

26. apríl 2012

Kíkti við hjá Hákoni og samstarfsaðilum hjá Gekon. Svo á hinn frábæra Forréttabar með Viktori. Og þaðan á frumsýningu Lónbúans hjá þeim „Markelum“, flott mynd.

20. apríl 2012

Við Fræbbblar spiluðum á SPOT á einhvers konar árgangsballi. Ekki mikil mæting þegar við spiluðum og kannski eins gott, höfum oft verið betri.

15. apríl 2012

Pönnukökukaffiboð hjá Öggu í tilefni af afmælinu á föstudag. Komið allt of langt síðan við hittum (megnið af) fjölskyldunni.

14. apríl 2012

Sambindið mætti (að mestu) í vel heppnað morgunkaffi.

Glæsileg veisla hjá Siggi fimmtugum og ekki síður skemmtileg, enda annað varla hægt með þessum hóp.

13. apríl 2012

Pöbbarölt og pool með Alla og Kalla, skemmtilegt kvöld en fundum engan stað til að enda kvöldið á póker.

5. apríl 2012

Fórum á Forréttabarinn með Assa & Stínu, frábær matur og topp þjónusta eins og áður. Örstutt á Ölstofuna og svo á Sólon þar sem tveir kórar voru að syngja, Flugfreyjukórinn og Vokalkomagniet.

1. apríl 2012

Hildur Elísabet, dóttir Ellenar & Hadda fermdist, flott veisla og gaman að hitta fjölskylduna.

31. mars 2012

Aukaaðalfundur Sambindisins hjá Hákoni. Nokkrir Postular komu í heimsókn um kvöldið.

30. mars 2012

Keila hjá Staka, fylgt af póker, pool og pílu. Og svo flakk á bari bæjarins.

24. mars 2012

Matur á Við Tjörnina. Við Fræbbblar fórum út að borða með Halla Reynis og Ojba Rasta ásamt „viðhengjum“, Þóra var reyndar lasin. En mjög vel heppnað kvöld, fínn matur og gaman að hitta þau utan dagskrár. Við Iðunn fórum með Arnari og Helga á Ölstofuna, þar sem Brio er orðinn skyldudrykkur. Svo á „Næsta bar“, þar sem er meira að segja hægt að tala saman. Ætluðum að kíkja á Arnljót og félaga á Faktorý með Reggae kvöld en gáfumst upp á tuddaskapnum í fólki sem tróð sér stöðugt fram fyrir með aðstoð dyravarða.

17. mars 2012

Afmæli hjá Sóleyju, flott veisla eins og við var að búast og ekki var félagsskapurinn síðri.

8. mars 2012

Sambindið fór í bíó á „Svartur á leik“. Eða réttara sagt, við reyndum. Hver af öðrum datt út og við Tommi fórum tveir. En mjög vel heppnuð mynd, kom skemmtilega á óvart.

3. mars 2012

Tefldi í deildakeppni Skáksambandsins á Selfossi fyrir Bridsfjelagið. Náði jafntefli við heldur sterkari andstæðing, Jón Jóhannesson. Alltaf ákveðin stemming í deildakeppninni en tímasetningin var ekki góð og staðsetningin afleit.

Eftir hádegi tók við GoutonsVoir matar, drykkjar og átveisla. Við byrjuðum á Mógilsá í alvöru Sauna með Sushi frá Krissa & Rúnu. Síðan stutt heimsókn til Agga & Benediktu að skoða Gabríelu og skála í Perelada freyðivíni. Þaðan í Kaldaselið í enn eina ógleymanlega átveisluna, margir forréttir og smáréttir áður en Steini eldaði kjúkling úr söltuðum sítrónum. Svo, ótrúlegt en satt, dundi þessi líka eðal punk tónlist fram eftir nóttu.

2. mars 2012

Fór á barinn á Hilton hóteli með Guðjóni, Heiðari og Sigga eftir vinnu. Gaman að ná þeim utan dagskrár, en Siggi sveikst um og drakk bara kók.

Postularnir kíktu svo í póker um kvöldið, sem hefði svo sem mátt ganga betur.

29. febrúar 2012

Sáum Eldhaf í Borgarleikhúsinu. Flestir voru sáttir og að mörgu leyti fín sýning. En tilgerðarlegur leikhústalandinn og hálf hallærislegar tilraunir höfundar við uppskrúfaðan texta skemmdu talsvert fyrir. Á móti kemur að sagan var fín og hélt athygli.

25. febrúar 2012

Lilja Karen var skírð Lilja Karen í Hjallakirkju. Veitingarnar sviku ekki hjá Gunnu & Kidda og Nonna & Þóru Kötu og mömmu Nonna og fleirum…

Árshátíð hjá Staka og Mílu. Fordrykkur hjá Staka og svo Súlnasalur. Maturinn mjög góður, sérstaklega af svona hópmat að vera. Gulli Helga veislustjóri, skemmtiatriðin heimatilbúin og Páll Óskar sá um tónlistina. Flott kvöld en eins og Páll Óskar er flottur þá er tónlistin sem hann spilar ekki minn tebolli. Þannig að seinni hluti kvöldins leið að mestu á Mímisbar, enda bjór af krana og meira Whisky úrval.

Þetta dugði engan veginn og við fórum með Brynju & Kalla á Ölstofuna að hitta Kristínu..

18. febrúar 2012

Bryndís, Gulli, & Kristín og Eygló & Stefán kíktu í mat. Og Whisky. Og forrétti. Og bjór. Matarklúbbur sem hittist allt of sjaldan.

11. febrúar 2012

Rólegt kvöld enda heilsan ekkert sérstök. Auður og Steini kíktu samt þegar leið á kvöldið og „björguðu“ okkur frá tveimur dauðum helgarkvöldum!

8. febrúar 2012

Fimmtíu og þriggja ára, hálfslappur enn og engin hátíðahöld.

7. febrúar 2012

Lagðist beint í einhverja pest eftir heimkomuna. Hef ekki verið svona illa haldinn í mörg ár.

6. febrúar 2012

Vinnudagur. Fórum með Bússa og Tómasi til RtSoftware að skoða tOG kerfið. Gekk mjög vel og ekki annað að heyra en að þetta sé allt á réttri leið.

6. febrúar 2012

Vinnudagur. Fórum með Bússa og Tómasi til RtSoftware að skoða tOG kerfið. Gekk mjög vel og ekki annað að heyra en að þetta sé allt á réttri leið.

5. febrúar 2012

Fórum á hinn ítalska Sale E Pepe í hádeginu að tillögu Jóns, með Höskuldi, Sirrý og Jóhönnu að sjálfsögðu. Staðurinn er stórskemmtilegur ítalskur staður með syngjandi þjónum og kokkum. Ostrurnar voru fínar og ég fann (eitthvað sem ég vil kalla) perlu í einni. Aðalrétturinn okkar Iðunnar var minna spennandi en aðrir voru sáttir.

Við Jón fórum að horfa á seinni hluta Chelsea-Manchester United á meðan Iðunn og Jóhanna gerðu sitt besta til að drepa sig með því að labba fyrir rútu á fullri ferð.

Um kvöldið fórum við á Bar Boulud sem er nokkuð góður franskur veitingastaður í Knightsbridge. Anna Sigga og Óli, sem við höfðum hitt á flugvellinum komu og hittu okkur á barnum á eftir og við fórum með þeim á Victoria Casino, sátum lengst af á barnum en spiluðum svo nokkra stund. Aftur í einhverjum plús en frekar eftirminnilegt að sjá Royal Straight Flush á borðinu mínu. Ekki bara einu sinni þetta kvöld heldur tvisvar. Og tvisvar komu fjórar drottningar upp á borðinu.

4. febrúar 2012

Vallarferð hjá okkur Höskuldi og Óla syni hans. Arsenal-Blackburn var frábær leikur, átta mörk. Og ekki spillti fyrir að ég veðjaði á að Van Persie myndi skora, Henry skoraði síðasta markið og að leikurinn endaði 7-1. Henry skoraði síðasta markið á fjórðu mínútu í uppbótartíma. Þá var farið gufu á hótelinu enda gegn kaldir eftir vallarsetuna. Iðunn og Sirrý voru aftur í brúðarkjólaleit og gekk nokkuð vel. Fórum svo með Óla og Katí og bróður hennar Kristjáni á Punch Bowl um kvöldið. Einhvers konar bar en samt veitingastaður, mjög skemmtilegur. Jón og Jóhanna kíktu svo á okkur í lok kvöldsins og fórum þaðan í snjókomunn á Connaught hótelið vegna þess að við vorum ekki búin að læra af verð reynslunni þar kvöldið áður.

En það snjóaði og snjóaði og allar samgöngur féllu niður. Ég þrjóskaðist við að labba heim á hótel en á endanum var ekki annað í boði. Ég átta mig ekki á hvað þetta tók langan tíma, sennilega um þrjú korter og frekar illa haldin þegar við náðum inn á hótel. Vorkenni enn stráknum sem þurfti að fara nálægt Wembley, var búinn að bíða í þrjá tíma að reyna að ná í bíl, kærastan sat fúl í anddyrinu og vildi bara að hann „fixaði þetta“. Annað par pantaði herbergi á hótelinu.

3. febrúar 2012

Helgarferð til London, byrjuðum á síðdegisverði á hinum kínverska Princess Gardens, svo niður í Soho að skoða Whisky í Vintage House og á hinn Belgíska Belgo um kvöldið. Alltaf skemmtileg stemming þar og bjórinn góður. Kvöldið fór svo í bar rölt, nokkuð dýran bar á Connaught hótelinu og annan nálægt sem ég man ekki hvað heitir. Við Iðunn fórum svo á Victoria Casino að spila póker. Gjafarinn kunni lítið að meta þegar við gleymdum okkur og töluðum íslensku. En einhver smáplús í heildina, aðallega hjá mér á kostnað Iðunnar.

28. janúar 2012

Postular (reyndar frekar fáir) og fleiri kíktu í spil.

27. janúar 2012

Staki fluttur í Ármúlann, smá innflutningspartý og pókermót, menn entust nú samt ekki lengi.

20.-22. janúar 2012

Sambindishelgi í Ensku húsin í Borgarnesi. Flottur staður og frábær helgi. Kíktum í Landnámssetrið á laugardeginum, fengum góða kynningu, mjög vel heppnað safn / sýning. En frábær helgi, maturinn í hæsta klassa og félagsskapurinn ekki síðri.

15. janúar 2012

Tengdamamma, Sylvía Briem, sjötug á þriðjudag. Ótrúlegt. Vona að við Iðunn verðum svona ung og hress þegar, og ef, þar að kemur. En flott veisla fyrir fjölskylduna, ekki vond að fá „pot-luck“ þegar fjölskyldan hittist.

13. janúar 2012

Vinnustaðapartý hjá Iðunni hér heima. Fullt af skemmtilegu fólki í heimsókn og afleiðinging stórskemmtilegt partý. Þurfti að sinna Viktori þegar leið á kvöldið, sem var að glíma við bankarugl, og ákvað að láta seinni hlutann liggja á milli hluta, enda mikill dagns hafinn undir frekar lítið spennandi tónlist.

12. janúar 2012

Prófuðum að mæta í Karate tíma hjá Breiðabliki.

8. janúar 2012

Matur hjá Brynju og Kalla. Ekki að spyrja að eldamennskunni á þeim bænum. Að mestu leyti gamaldags lambahryggur en einhver heimasmíðuð handtök sem gerðu þetta einstaklega vel heppnað.

7. janúar 2012

Sambindisfundur hjá Hadda í hádeginu, Borgarfjarðarferð skipulögð.

Postula uppskeruhátíð hjá Þórhalli, byrjuðum á póker um fjögur leytið. Fínn matur, óvenju lítið þrasað um reglugerðar breytingar, hringurinn á rólegu nótunum og svo meiri póker. Lét ekki tilleiðast að fara í bæinn á eftir, enda klukkan orðin hálf fjögur.

6. janúar 2012

Kíktum í Bridge til Sæma og spiluðum við þá Guðlaug. Kannski við stöndum við gefin loforð að spila meira á árinu.

2. janúar 2012

Fyrsti dagur í fótbolta á nýju ári.

1. janúar 2012

Letidagur. Svínabógur. Ofninn bilaður. Út að grilla.

2011

31. desember 2011

Fastir liðir eins og venjulega á gamlárskvöld, matur hjá tengdafjölskyldunni í Austurbrún. Þetta var óvenjufjölmennt kvöld, Palla og Sæunnarfjölskyldur mættu báðar og að sjálfsögðu Hafsteinn, Jóna, Bjarni og Hafdís – Þóra mætti svo þegar leið á kvöldið.

30. desember 2011

Áramót Iðunnar að venju daginn fyrir gamlársdag. Þetta er hefðbundið bridgemót og að þessu sinni mættu 10 pör. Alltaf skemmtileg stemming enda mæta flestir gestanna með eitthvert snarl. Ekki spillti að við Iðunn unnum mótið, hvernig sem það má nú vera.

29. desember 2011

GoutonsVoir matarklúbburinn hittist hjá Auði & Steina. Ákveðið að hafa léttari veitingar en oftast áður eftir allt jóla átið. En ostrur, hreindýrapaté, tvíreykt kindainnralæri, kavíar, . Og svo frábær fiskisúpa hjá Steina. Að venju. Smökkuðum Octomore Whisky og sátum fram eftir, aldrei þessu vant, bara orðin nokkuð drukkin. Rifjuðum upp eðal tónlist fram eftir nóttu.

27. desember 2011

Árlegu jólamóti Jonna í skák frestað vegna veikinda og fjarveru nokkurra fastagesta.

26. desember 2011

Jólaveisla með tengdafjölskyldunni í Austurbrún, pörusteik og bridge eitthvað fram eftir kvöldi.

25. desember 2011

Jólaveisla hjá minni fjölskyldu í Kaldaselinu, hangikjöt í aðalhlutverki og keppnin milli Einifells og sauðakjötins að norðan hnífjöfn. Spiluðum svo eitthvað fram eftir kvöldi.

24. desember 2011

Hefðbundinn jólagrautur, nema hvað mandlan fannst ekki og sagan af Jonna var ekki rifjuð upp. Graflax, kalkúnn og hnetusteik í kvöldmat. Það er af sem áður var að strákarnir gátu ekki beðið eftir að opna pakkana, nú voru svo miklar umræður í gangi að við foreldrarnir þurftum nánast að reka þá til að sinna gjöfunum.

23. desember 2011

Árleg skötuveisla hjá Öggu & Magga, frændfólk frá Dalvík mætti, Kiddi & Herdís og fjölskylda. Ég lét skötuna vera af gömlum vana enda saltfiskurinn frábær. Smá bæjarrölt og svo aftur í Þverholtið í kaffi, smákökur og líkjör.

17. desember 2011

Árlegt jólamatarboð – í þetta sinn hjá Kristínu. Sólarhring seinna er ég enn pakksaddur eftir ótrúlega matarveislu. Hverjum datt eiginlega í hug að vera að standa í svona rétt fyrir jól?

15. desember 2011

Hljómleikar á Dillon, sennilega þeir slökustu í langan tíma. Tókum samt nokkur lög af Namminu sem við höfum ekki spilað lengi og svo nokkur glæný lög.

12. desember 2011

Síðasti postula tíminn í fótboltanum, Sævar stal þessu með rosalegum lokaspretti af gömlum vana. Stuttur póker á eftir.

11. desember 2011

Laufabrauðsgerð hjá Gunnu & Kidda – ekki verra að enda daginn á frábærri mexíkó súpu – sem afmælisbarnið Marissa vildi nú ekki kannast við frá Mexíkó.

10. desember 2011

Afmæli hjá Önnu-Lind, Skúla tókst að halda þessu leyndu allan ótrúlega lengi en eitthvað veður fékk hún af fyrirætlunum síðasta daginn. Við næstum því Fræbbblar spiluðum nokkur lög, Steini leysti Helga af hólmi, Retro Stefson og Jakob Frímann spiluðu líka – en verulega skemmtilegt afmæli, eins og við var að búast.

9. desember 2011

Guðrún Odds og Margrét kíktu í heimsókn við afmælisundirbúning.

2.-4. desember 2011

Einifellsferð. Alltaf frábært að koma þarna. Auður, Steini og Elín mættu okkur með kyndlum í snjónum á föstudagskvöldið. Fiskisúpa á föstudagskvöldið, sennilega sú besta. Vélsleði á laugardeginum, gaman að sjá Einifellið frá þessu sjónarhorni. Halli & Steinunn kíktu við seinni partinn. En aðal „verkefni“ ferðarinnnar var að halda gangandi reyknum á kjötinu sem Auður & Steini eru reykja – eða réttara sagt horfa á Steina halda honum gangandi.

1. desember 2011

Hljómleikar með Halla Reynis á Rosenberg, mjög skemmtilegir og nýja efnið hljómar vel.

30. nóvember 2011

Andrés Helgi tapaði meiðyrðamáli í héraðsdómi, fáránleg niðurstaða.

27. nóvember 2011

Jólalag Fræbbblanna, „Trúlaus jól“, kom út.

26. nóvember 2011

Jólamatur Sambindisins, líbönsk matargerð, verulega skemmtilegur og góður matur. Spurningaleikur að hætti Tómasar og setið að sumbli fram eftir.

25. nóvember 2011

Útgáfupartí hjá Hannesi Hólmsteini Gissurarsyni í tilefni „Íslenskir kommúnistar“.

Jólahlaðborð Staka. Hafliði mætti með freyðivínskynningu og forréttirnir voru fínir, annars frekar slakt veisluborð.

20. nóvember 2011

Jonni & Marissa kíktu í mat og svo mættu Brynja og Kristín í „meðferð“.

19. nóvember 2011

Póker með postulunum á Kojak. Vann tvö mót af þremur, sátum svo að sumbli eitthvað fram eftir.

18. nóvember 2011

Kveðjupartí Mílu sem eru að fara að flytja úr Stórhöfðanum. Skemmtilegt kvöld og nóg af veitingum, við Andrés (ekki Helgi) fórum samt á miðju kvöldi yfir á SPOT að horfa á Gunnar Jónsson keppa um að vera fyndnasti maður Íslands. Hann var það svo sem í okkar huga, en þriðji að mati nefndarinnar.

17. nóvember 2011

Kláraði fyrsta jólalag í sögu Fræbbblanna með upptöku meistaranum Friðriki Helgasyni. Allra handa snillingurinn Gunnar Jónsson spilar á bjöllur sem gestur.

12. nóvember 2011

Matur hjá Helga & Þóru, gaman að hitta Árna & Ástríði og Buggu & Erp (aftur). Skemmtilegt kvöld og ekki þarf að kvarta undan matnum í Mávahlíðinni frekar en áður..

11. nóvember 2011

Whisky smökkun hjá Staka þar sem Bruichladdich var í aðalhlutverki. Gaman að prófa allar þessar tegundir og sú síðasta, Octomore, alveg ný vídd í Whisky smökkun.

Fræbbblar spiluðu svo um kvöldið í tilefni ellefta ellefta ellefu á Bar 11 klukkan ellefu með Örför og Morgan Kane.

5. nóvember 2011

Löng leikhúsferð með Assa & Stínu og Auði & Steina. Rúna mætti með okkur í smá rölt upp í áttina að Esjunni, síðan ekta alvöru gufa í boði Assa á Mógilsá, með bjór, vindlum, salati og grilluðum pylsum frá Kjötpól.

Þaðan lá leiðin í Borgarleikhúsið á „Nei, ráðherra“. Kannski er þetta ellimerki – Stína vildi meina að þetta væri dæmi um reynslu – en flestir brandararnir mjög svo fyrirsjáanlegir. En svo sem ekkert leiðinleg sýning.

Eftir þetta duttum við á Forréttabarinn hjá Gumma. Rosalega er það vel heppnaður veitingastaður. Sátum þar fram eftir, ætluðum á smá röl eftir lokun en urðum hálfpartinn úti í grenjandi rigningu, duttum í Guinness á Dubliner en Assi dró okkur svo heim í þurrk við arineld.

29. október 2011

Agga, Maggi, Kiddi, Sævar, Agga og Viðar komu í mat, einhvers konar mini heimatilbúinn fiskidagur til að bæta upp fyrir fjarveruna í sumar. Skemmtilegt og vel heppnað kvöld eins og til stóð.

28. október 2011

Með The Validators á Faktorý. Gekk held ég bara nokkuð vel, Taugadeildin flott og FiveBellies jafn skemmtilegir og alltaf. Og ekki spillti stór skemmtileg Validators.

26. október 2011

Spiluðum nokkur lög á 25 ára afmæli Krýsuvíkursamtakanna, Assi komst reyndar ekki en Rikki hljóp í skarðið.

21-22. október 2011

Punk 2011 hátíðin, rosalega skemmtileg hátíð með haug af stórskemmtilegum hljómsveitum.

14-16. október 2011

Sambindisferð í Úthlíð. Sérstaklega vel heppnuð ferð, fínn bústaður með gufu og heitum potti. Gaman að kíkja við á Gljúfrasteini á leiðinni. Litum svo á Liverpool – Man Utd í þjónustumiðstöðinni, gaman að hitta Hjördísi & Þorstein.

11. október 2011

Við Fræbbblar kláruðum að taka upp og mixa lagið Immortal, fer í spilun í næstu viku.

8-10. október 2011

Vinnuverð til Oslóar, mætti degi fyrr til að ná smá borgarskoðun með Alla, og styrkja norsku barina. Fórum á Leningrad Cowboys á laugardagskvöldinu en ekki mjög gaman. En Ölfestival, pöbbarölt á laugardeginum, indverskur á laugardagskvöld og ítalskur veitingastaður á sunnudagskvöld. Og nóg af bjór. En verðlagið, eða réttara sagt, gengið á norsku krónunni.

6. október 2011

Tvær æfingar fyrir Punk 2011 kvöldið.

2. október 2011

Afmæli í Fögrubrekkunni hjá Laufeyju Rós, veitingarnar frábærar að hætti fjölskyldunnar.

30. september 2011

Bjórskólinn hjá Ölgerðinni með vinnufélögum Iðunnar, en fyrst matur hjá Berglindi og Gumma. Nokkuð skemmtilegt kvöld og aldrei nóg af fróðleik um bjór.

29. september 2011

Fyrsta leiksýning vetrarins, „Fólkið í kjallaranum“, svo sem ágætlega leikið en einhvern veginn fannst mér sagan og persónurnar óáhugaverðar.

Svo náðum við seinni hluta af hljómleikum Halla Reynis á Rosenberg, alltaf flottur, vel heppnaðir hljómleikar.

28. september 2011

Önnur æfingin fyrir Punk 2011 hljómleikana.

24. september 2011

Kristín að flytja, eina ferðina enn, í þetta sinn á Freyjugötuna, hún kíkti í mat með Öglu, Brynju og Kalla – sátum svo (auðvitað) frameftir.

22. september 2011

Við Fræbbblar fluttum í annað æfingahúsnæði og byrjuðum að undirbúa Punk 2011.

20. september 2011

Jonni & Marissa kíktu í kvöldmat, eldaði arabískan pottrétt sem varð á endanum eiginlega fullsterkur fyrir minn smekk.

17. september 2011

Athafnastjóri við nafngjöf Unnsteins Magna, sem er sonur Arnars og Unnar.

Annars óvenju róleg helgi, sem er svo sem fínt eftir IBC helgina í Amsterdam.

8-12. september 2011

IBC sýningin í Amsterdam – sjötta árið í röð. Alltaf fróðlegt og gaman að kíkja. Og fullt góðum félagsskap. Toppurinn þegar Alli kom frá Osló og við náðum einu verulega góðu kvöldi.

Annars duglegur að heimsækja bestu bjórbarina, In De Wildeman, Café Belgique og De Bekeerde Suster. Whisky barinn LB varð heldur ekki útundan. Og matur á Vasso, Gaucho og Savini stóðu allir undir væntingum en gríski Zorba vonbrigði.

Og þrjár heimsóknir í Holland Casino, ekki vera að ná hátt í 200 Evrur í plús.

4. september 2011

Afmæli hjá Rakel og Andra… ekki klikka veitingarnar hjá Góu frekar en fyrri daginn.

3. september 2011

Matur hjá Bryndísi – með Birni, Gulla, Kristínu og Kristínu. Frábær matur og ekki síðri félagsskapur.

2. september 2011

Pool mót staka, fyrst reyndar heim til Jóns í bjór, vín og veitingar. En tapaði úrslitaleik Pool mótsins fyrir Friðbirni. Svo til Alla í póker sem hefði getað gengið betur.

31. ágúst 2011

Sambindisfundur, labb á Helgafell og svo kaffi og meðlæti hjá Hadda.

28. ágúst 2011

Fjölskyldan í spaghetti í tilefni af afmæli Iðunnar, einstaklega vel heppnað kvöld, enda ekki annað hægt með svona skemmtilegu fólki.

27. ágúst 2011

Smá upphitun fyrir fótbolta vetrarins. Golf á Bakkakotsvelli, gekk eiginlega alveg þokkalega. Svo til Þórhalls í smágrill og póker.

20. ágúst 2011

Menningarnótt. Dagurinn fór aðeins fyrir lítið í undirbúning fyrir spilamennsku kvöldins. Við Fræbbblar spiluðum með Halla Reynis og Ojba Rasta á bak við veitingastaðinn „Við Tjörnina“. Sennilega slökustu hljómleikar okkar í meira en ár, byrjuðu þó vel og sérstaklega vel heppnað að spila „A Message To You, Rudy“ með hálfri blásarasveit OjbaRasta og fá stuðning í „White Man In Hammersmith Palais“.

Svo í afmæli hjá Guðrúnu Odds, gullrottufélaga Iðunnar, verulega flott veisla og gaman að hitta þennan hóp aftur.

19. ágúst 2011

Halli Reynis og Steinunn buðu okkur í mat, alvöru nautasteik, en innbyrti helst til mikið af rauðvíni og heilsan hálf döpur daginn eftir, í fyrsta skipti í nokkuð langan tíma.

13-14. ágúst 2011

Einifells ferð með Gout-On-Va. Náðum ekki að mæta fyrr en á laugardeginum, sem nýtist aldrei vel svona hálfur. En maturinn alltaf í sama hágæða klassa, nýveiddur smálax sashimi, kartöflu ansjósu réttur, grillaður humar, heimatilbúið pestópasta, grill steikar salat En framkvæmdir á Einifelli ganga ótrúlega vel, skil samt ekki hvernig þau nenna þessu. Og ekki má gleyma að við Krissi og Elín unnum Petanque mótið.

12. ágúst 2011

Brúðkaup hjá Elsu og Guðna. Frábær veisla í Þróttarheimilinu, ekki að spyrja að veitingunum og allt á floti í gæðavínum og bjór. Ari Eldjárn góður. Gaman að hitta marga úr Madridar hópnum, þeas. sem við fórum með til Madrid 2007.

11. ágúst 2011

Jarðarför pabba Magga, mágs míns, fín athöfn og glæsileg erfidrykkja.

Fræbbblaæfing og myndataka um kvöldið. Síðan á hljómleika hjá Coral á Faktorý. Mikið svakalega eru þeir góðir. Kæmi ekki á óvart þó þeir yrðu næsta íslenska hljómsveitin til að ná athygli í útlandinu.

7. ágúst 2011

Kláraði að syngja fyrsta lagið af nýju Fræbbbla plötunni, vinnutitillinn „Hnetur“, endanlegt heiti sennilega „Jésu, Séra Jesú eða Jón“. Iðunn kom og söng bakraddir og við Friðrik mixuðum lagið. Á eftir að heyra viðbrögð annarra meðlima. Líkast til setum við lagið í spilun og sölu í næstu viku.

6. ágúst 2011

Röltum í bænum með Stínu, Brynju & Öglu – ótrúlega flott og fjölmenn Gay Pride ganga, vonlaust að komast upp á Arnarhól, fórum á Thorvaldsen í staðinn í rjómaútlandablíðu. Og svo heim að grilla, éta árangurinn og röfla fram eftir kvöldi.

1. ágúst 2011

Pabbi Magga, mágs mín, lést í morgun, 94 ára, eftir nokkra sjúkralegu. Stórskemmtilegur sögumaður og baráttumaður gegn alkóhólisma sem margir eiga mikið að þakka.

31. júlí 2011

Tengdapabbi, Magnús Pálsson, sjötíu og fimm ára. Og auðvitað Sæmi, tvíburabróðir hans. Glæsileg veisla í Austurbrún að hætti þeirra Sylvíu, gaman að hitta bræðurna, konur þeirra og Sæunni og Friðjóni. En nokkurð margir fjölskyldumeðlimir á ferðalagi. Eiginlega alveg sérstaklega vel heppnað kvöld, sátum fram eftir nóttu. En bestu fréttir dagsins sneru nú að heilsunni.

29. júlí 2011

Alli, Brynja, Friðjón, Kalli, Kristín og Þórhallur kíktu í spil, heimavöllurinn virkaði vel. Er enn að reyna að sjá Sæunni fyrir mér að reykja.

26. júlí 2011

Við Fræbbblar hlustuðum á hálf unnar upptökurnar og vorum bara nokkuð sáttir, spurning hvort við höfum textana alla á íslensku?

23. júlí 2011

Einhvers konar sameiginlegt minni háttar afmælisgrill fyrir þá fullorðnu hjá Kidda og Magga, vinyl hlustun gamla fólksins fram eftir nóttu.

22. júlí 2011

Brynja & Kalli & Agla og Kristín kíktu í grill og röfl og létta bjór- og víndrykkju.

18. júlí 2011

Kíkti til Kidda í óformlegt, fyrirvaralaust sextíu og fjögurra ára afmæliskaffi.

29. júní – 18. júlí 2011

Sumarfrí. Nýttum fáránlega góð tilboð og fórum í gott sumarfrí – tveir dagar í Amsterdam, tveir í Rotterdam, níu dagar á siglingu frá Rotterdam til New York með viðkomu í Southampton. Og aukastopp í Boston á heimleiðinni. Slatti af myndum hér, aðallega fyrir okkur og lika fyrir okkar, nokkrar lifandi myndir
hér.

29. júní – 18. júlí 2011

Sumarfrí. Nýttum fáránlega góð tilboð og fórum í gott sumarfrí – tveir dagar í Amsterdam, tveir í Rotterdam, níu dagar á siglingu frá Rotterdam til New York með viðkomu í Southampton. Og aukastopp í Boston á heimleiðinni. Slatti af myndum hér, aðallega fyrir okkur.

Amsterdam

Mættum seint til Amsterdam, tókum bíl með Dóru og Jóa og náðum á Savini um kvöldið, frábær trufflu sveppa Risotta. Hittum þau aftur seinni partinn á smá pöbbarölti, svo á hinn franska og frábæra Van De Kaart áður en við fórum Holland Casino þar sem Iðunn vann meira en ég tapaði. En margar pöbbaheimsóknir, „In De Wildeman“, „Café Belgique“ og „De bekeerde suster“ fyrir utan 1.200 Whisky tegunda barinn.

Rotterdam

Fleiri bjórprófanir áður en við tókum lest til Rotterdam, hótelið okkur full fjarri miðbænum og 20 mínútna gangur að næsta lífvænlega svæði. Duttum inn á spennandi ítalskan veitingastað sem var kannski aðeins of mikið að vera „trendy“, enginn matseðill heldur þuldi þjóninn upp hvað var í boði, rauðvínið borið fram í vatnsglösum.. en flottur matur.

Rifum okkur upp til að mæta snemma í skip fyrir siglinguna. Vingjarnlegur eldri maður tók á móti okkur og bætti við eftir smá spjall að við værum snemma á ferðinni. Jú, ferðaskrifstofan ráðlagði okkur að mæta snemma sagði ég, klukkan er sjö og skipið fer níu. „Já, níu í kvöld!“. Röltum um tóma Rotterdam í nokkra klukkutíma áður en við fengum svo mikið sem kaffibolla. En fundum markað og flott Víetnamskt veitingahús, LiLV.

Southampton

Þriðji dagur siglingarinnar var reyndar í Southampton, ekkert sérstaklega eftirminnileg borg. En dagurinn engu að síður ógleymanlegur, því Jonni hringdi og sagði að þau Marissa hefðu trúlofað sig kvöldið áður. Frábærar fréttir.

Sigling

Siglingin tók níu daga, allur matur fylgdi með, í góðu lagi. Fórum á nokkrar vínkynningar, almenna kynningu, nýi heimurinn borinn saman við þann gamla, kampavín með Dom Perignon og Cristal. Sommelier kvöldið frábært, alltaf gaman að prófa nýja samsetningu á mat og víni.

Meiri sigling

Annars var frekar lítið spennandi veður í siglingunni, fyrsti dagur reyndar sólbaðsdagur, en svo brjálað veður á miðvikudegi, 6 metra öldur og frekar óþægileg vist á skipinu. Annars hlýtt, sólarlaust, hvasst og jafnvel þoka. En dagarnir snerust um mat og vín og Casino… pókerspilamennskan gekk þokkalega, náðum verðlaunasæti (fyrsta eða öðru) í átta mótum af níu. En töpuðum aðeins í peningaspilinu.

En kynntumst mikið af skemmtilegu fólki, í spilamennskunni sátu Johnny – „with a c“, allir hétu eitthvað hjá honum með einhverjum undarlegum staf. Og frasinn hans „This changes everything“ fór frá því að vera undarlegur yfir í hallærislegur og svo yfir í ómissandi hefð. Johnny er vélvirki hjá bandaríska hernum, hefur verið í Írak og Afganistan, fer á eftirlaun á næsta ári og er búinn að kaupa leyfi til að reka olíuskiptaþjónustu í Las Vegas, „Jiffy Loop“ ef ég man rétt. Hefur verið að gera góða hluti á verðbréfa markaðinum. En gaman að spjalla við hann yfir vindli eftir spilið, var með fjölskylduna með sér, eldri sonurinn að fara í nám og Johnny búinn að kaupa bíl fyrir hann. Svo lá kappanum á úr skipinu, hann var að opna viðskiptin á Wall Street í beinni útsendingu.

Tom var hátt á áttræðis aldri, moldríkur að sögn („I’ve got no respect for money“), eldhress og spilaði póker til að vinna, en var svo sem ekkert fúll þó hann tapaði. Konan hans lasin lengi framan af ferðinni, en hann minnti einhvern veginn á Fossie Bear, gaman að sigla með honum inn til New York, „That’s my city“ sagði hann stoltur við mig þegar við vorum að nálgast Manhattan.

Ekki gleyma Patrick sem kennir póker og hefur áhuga á að gerast atvinnumaður, vann reyndar aðra siglingu í bingói. Mike er flugmaður á eftirlaunum sem þurfti að hætta styrktargöngu yfir eyðimörk eftir að annað hnéið gaf sig. George var hress ungur Rúmeni, David kom frá Ísrael, þóttist lítið kunna að spila en missti nú eitt og annað út sem sagði að hann hefði talsverða reynslu. Kevin var slökkviliðsmaður frá Californiu (San Bernadino?) sem hafði unnið sig upp í góða stöðu. Hann mætti með undarlegan dýrafót síðasta kvöldið og rakaði auðvitað saman peningunum. Bob var hæglátur fastagestur frá Californiu ef ég man rétt og Stewart kom frá Isle of Man. Og svo duttu nokkrir inn stöku sinnum..

Í matsalnum kynntumst við skemmtilegri samsetningu, mæðgin frá Indianapolis sem voru aldeilis hissa að við vissum ekki allt um kappakstrana þar, prófessorar (ekki „kennarar“) frá Noregi, hjón frá Isle of Man, hollenskur víninnflytjandi sem var að mestu hættur en hafði sérhæft sig í þýskum og portúgölskum rauðvínum. Hann treysti sér ekki til að mæta í vínkynningarnar, sagðist ekki geta stillt sig um að leiðrétta kynninn þegar hann færi ekki rétt með. Þarna voru líka Ric og Liz frá Virginiu sem við hittum á öllum vínkynningum, sögðu að það væri fullt af góðum vínum þarna sem aldrei færu út fyrir fylkið. Eitt kvöldið sátum við með skipslækninum sem hann hinn skemmtilegasti viðræðu. Og ég man ekki nöfnin á tvennum hjónum sem voru mjög „sigld“. Höfðu mikla reynslu af siglingum og skipafélögum, önnur sögðust hafa hætt að telja eftir 50 siglingar.

Þá má ekki gleyma Joyce og Dick, eldri hjón sem áttu dóttur á Írlandi og fóru alveg eins í siglingar vegna þess að það var ódýrara en að fljúga, Dick reyndar að byrja að fá Alzheimer. Don kenndi bridge og notkun myndvinnsluforrits frá Microsoft á skipinu og konan Patricia. Eitt kvöldið sátum við til borðs með fjórum mönnum frá Salt Lake City og Boston sem líkast til voru tvö pör, án þess að ég viti, eða það skipti máli, en mjög skemmtilegir borðfélagar.

Svo man ég helst eftir frönsku hjónunum vegna þess að eiginmaðurinn heitir Marc. Þetta var fyrsta kvöldið og herbergisþjónninn hafði kynnt sig fyrr um daginn og spurt okkur að nafni. Ég endurtók „Val“ nokkrum sinnum (datt ekki í huga að reyna meira) og hann endurtók alltaf „Mark“. Við vorum eitthvað að velta fyrir okkur hvernig mismunandi tungumál verða til að hljóð sem okkur finnast allt önnur hljóma alvega eins fyrir ókunnugum. En svo hittum við Marc hinn franska og hann var búinn að segja nafnið sitt fjórum sinnum og Iðunn heyrði alltaf „Val“ áður en hún náði því rétt.

New York

Innsiglingin til New York var ógleymanleg, siglt fram hjá frelsisstyttunni og alla leið inn í miðja Manhattan. Iðunn svaf þetta af sér að mestu leyti, var með vitlausa klukku og hélt að skipið væri komið í höfn, hafði sagt kvöldið áður að hún væri þreytt og hefði engan sérstakan áhuga…

Sennilega eru fimm dagar í New York svipaðir og fimm mínútur af handahófi af þriggja tíma bíómynd. Stutta útgáfan er að það var frábært að koma þarna en mér liggur ekkert sérstaklega á að mæta aftur, margar borgir hafa heillað mig meira. Við slepptum safnaheimsóknum en röltum mikið um, hitinn hjálpaði auðvitað ekki, fólkið ýmis yfirmáta kurteist eða upptrekkt og stressað og vinnur við að svindla á manni (sjá nánar á eftir). Og geisladiskabúðirnar nánast horfnar. Ég fann amk. enga í neðri hluta Manhattan á laugardeginum.

Hótelið okkar var í einskismannslandi í Queens, enginn bar þar eða veitingastaður og ekkert í nágrenningu þannig að við þurftum að taka lest til Manhattan í 10-20 mínútur til að komast „til byggða“.

Fyrstu dagarnir voru nánast í 40 stiga hita og miklum raka. Ég hef sjaldan verið eins feginn að komast inn í búðir og á þessum tíma. Fyrsta kvöldið duttum við inn á frábæran ítalskan stað í litlu Ítalíu, Babaloosta. Annað kvöld var frátekið fyrir Carmines, ítalskan stað sem sessunautur minn á leiðinni til New York hafði mælt með fyrir nokkrum árum. Carmines er ítalskur staður sem heldur fjölskyldu yfirbragðinu þrátt fyrir að vera nokkuð stór. Og talandi um að vera „stór“, matarskammtarnir eru svo stórir að þegar við höfðum pantað sitt hvorn forréttinn bannaði þjónninn okkur að panta meira en einn aðalrétt. Porterhouse steikin var kíló þannig að við prófuðum kálfasteik. Og við náðum ekki að klára nema annan forréttinn og áttum aldrei möguleika á að klára aðalréttinn þó hann væri bara fyrir einn. Ég er enn að reyna að átta mig á hvers vegna ég pantaði eftirrétt… sá hefði auðveldlega verið nógu stór fyrir fimm.

Þar fyrir utan fórum við á Keens og fengum okkur Porterhouse steik, mjög fín, en svo sem ekkert spennandi, Spigolo, Gatto Azzuro sem báðir voru með topp ítalskan mat. Við létum snarl nægja í flest skiptin í hádeginu, prófuðum þó víetnamskan stað í Chinatown..

Annars fóru dagarnir að mestu leyti í að ráfa um… búðir og bjór til skiptist. Central Park er ótrúlegur garður, svona að minnsta kosti miðað við staðsetninguna. Við fengum frímiða í WaterTaxi en sá var útrunninn og við rétt misstum af bátnum og tímdum ekki öllum deginum.

Fimmtudagskvöld byrjaði á BlueNote, jazzklúbbi sem margir höfðu sagt okkur að við yrðum að heimsækja, þó ekki væri nema stemmingarinnar vegna. Við vorum frekar óheppin með atriði, Airto, og þetta var ekki gefið. Iðunn bjargaði sér með því að slökkva á heyrnartækjunum á meðan við sturtuðum rándýrum bjórnum í okkur. Og svo á stutt pöbbarölt í Greenwich Village.

Á föstudagskvöldið fórum við á uppistandaraklúbbinn Comic Strip og vorum nokkuð ánægð með dagskrána, fjórir af sex „grínurum“ voru mjög góðir og hinir tveir alveg þokkalegir.

Okkur buðust miðar á Paul McCartney á Yankee Stadium á þokkalega góðum kjörum. Ég ólst auðvitað upp við Bítlana en hef svo sem ekkert verið sérstaklega hrifinn af því sem hann hefur gert eftir það. Iðunn var enn minna spennt en við slógum til og mikið rosalega kom hann skemmtilega á óvart. Lögin auðvitað mis mikið spennandi, en hann spilaði í tæplega þrjá og hálfan tíma, mörg frábær lög. En aðallega gerði hann þetta mjög vel, lítið um tilgerð og stæla eða „svindl“ á söngum, hann var einfaldlega með hljómsveit að spila lög sem hann hafði greinilega gaman af að spila. Gamli naglinn sem sat við hliðina á Iðunni (þeas. hinum megin) táraðist stöðugt seinna hluta hljómleikanna. Og það var eitthvað sérstakt að heyra þessi lög flutt í fyrsta skipti af höfundinum, Hey Jude, Yesterday, Paperback Writer, Let It Be, Obladi…

Og mér var neitað um að kaupa bjór vegna þess að ég var ekki með skilríki. Bölvað piss sem þeir voru að selja, Miller’s Lite, þannig að ég var nokkuð sáttur við vatnið. En viðmiðunin er að spyrja alla um skilyrði sem ekki eru augljóslega þrítugir, þannig að ég hlýt að bera aldurinn vel.

Videotökuvélín sem ég fékk í fimmtugsafmælisgjöf gaf upp öndina í vor, líkast til eftir að detta, og rétt eftir að ábyrgðin rann út, en ég fékk hana að mestu bætta úr tryggingunum. Ég ákvað að kaupa nýja í New York og fann ágæta vél en ákvað að leita áfram. Í næstu búð, sem var reyndar lítil hola á 5th Avenue, bætti sölumaðurinn við alls konar dóti og seldi okkur vélina. Þegar við komum upp á hótel kom í ljós að vélin var ekki HD eins og hann hafði sagt, annað hvort skipti hann um vél eftir söluna, hann sýndi okkur báðar tegundir, eða laug allan tímann. Að minnsta kosti fengum við vél sem hægt var að fá auðveldlega á hálfvirði annars staðar. Við höfðum samband við Visa / Valitor og þeir lofuðu að hjálpa til við að fá greiðsluna bakfærða en gátu engu lofað. Við fórum aftur í búðina og ég náði upptöku af sölumanninum að fullyrða að hann hefði látið okkur fá HD vél og svo þegar framkvæmdastjórinn kom fullyrti hann að hann hefði aldrei sagt þetta. Það er samt ekki víst að sú upptaka nægi. En við ákváðum, að ráðum Valitors, að skila vélinni og reyna að fá færsluna bakfærða. Þeir neituðu að taka við henni en við skildum hana eftir, ég sneri við og ákvað að taka líka ljósmynd en hún var horfin einhverjum sekúndum seinna og þeir könnuðust ekki við neitt. En þeir eru greinilega sjóaðir í að fara illa með viðskiptavinina. Lítill handskrifaður miða upp á vegg segir að ekki sé hægt að skila vörum. Og við vorum greinilega ekki fyrstu viðskiptavinirnir sem kvarta, viðbrögðin voru mjög sjóuð og vel „rútíneruð“.

Heimferðin gekk svo ekki andskotalaust. Við keyptum flug frá New York til Keflavíkur af IcelandAir, en vorum sett í JetBlue flug frá New York til Boston og þaðan heim. Vélinni til Boston seinkaði aftur og aftur sem varð til þess að við misstum af vélinni heim, rétt svo. Það hjálpaði ekki að okkur var vísað í vitlausa byggingu en við hefðum samt ekki náð. Og það sem verra var, við fengum engar upplýsingar. Ekkert nema símsvari hjá IcelandAir heima. Við gátum grafið upp númer hjá þeim í Boston en sama saga, símsvari sem bauð okkur að hringja daginn eftir. Að lokum höfðum við af að sækja upplýsingar eftir krókaleiðum, fórum upp á flugvöll og þá hafði vélinni seinkað um þrjá tíma. Við komum til landsins ellefu tímum eftir áætlun og sólarhringurinn kominn í tóma vitleysu. En í millitíðinni fórum við inn í miðbæ Boston og fengum krækling, ostrur og humar. Og fullt af bjór.

25. – 26. júní 2011

Einifells heimsókn, Petanque, heitur pottur, frábær matur, spennandi vín, nóg af bjór.. sem sagt allt eins og það á að vera á Einifelli. Og heljar framkvæmdir í gangi, ótrúleg seigla hjá Einifellsbúum.

19. júní 2011

Halli, Steinunn og Sölvi kíktu í grill og svo skiptumst við á að hlusta á nýjar upptökur. Halli með fullt af mjög góðum lögum.

18. júní 2011

Útskriftarveisla hjá Benediktu og sumarpartý í Reynihvamminum. Flott veisla og skemmtilegt fólk eins og við var að búast.

17. júní 2011

Kíktum í grill til Kidda, nokkur vel heppnuð lambalæri og skemmtilegt kvöld.

11. júní 2011

Útskrift hjá Ásgerði, glæsileg veisla hjá Höskuldi og Sirrý að vanda..

10. júní 2011

Systkini Iðunnar og makar mættu í mat, virkilega vel heppnað kvöld eins og svo oft áður, fórum að sulla í mismunandi Whisky tegundum þegar leið á kvöldið.

7. júní 2011

Æfing og síðan undanúrslit í poppspurningakeppni á Dillon, duttum inn eftir að ein hljómsveitin forfallaðist, enda töpuðum við í bráðabana síðast. Mættum án varamann í þetta sinn og ekkert til að skammast okkar fyrir þó við sætum eftir með 39 stig, hinir með 40, 41 og 46 stig af 50.

6. júní 2011

Útifótbolti með Gústa og félögum á Tungubökkum, fór illa með ökklann…

4. júní 2011

Kalkúnn hjá Helga & Þóru, ekki hefðbundinn sumarmatur, en eðalkokkar og virkilega skemmtilegt kvöld.

1. júní 2011

Við Iðunn fórum á pöbbarölt með hinum finnska Jari Pekka Laito Ramone sem rekur umfangsmestu Ramones vefsíðuna. Hann var að koma frá afmælis hátíð Joey Ramone þar sem hann hitti nokkra eftirlifandi meðlimi. Gaman að hitta hann eftir 12 ára tölvupóstsamskipti og gaman að spjalla við hann. Enduðum á Dillon hjá Andreu og komum ekki að tómum Ramones kofunum hjá henni.

31. maí 2011

Jonni og Viktor kepptu með okkur Helga í spurningakeppni hljómsveita á Dillon. Gekk þokkalega miðað við hversu margar spurninganna voru ekki beinlínis á okkar tímabili, en duttum út í bráðabana.

29. maí 2011

Brynja & Kalli & Agla kíktu í mat, gamaldags heimilispottrétt frá Iðunni.

28. maí 2011

Nokkrir postular kíktu í pool og Barcelona – Man Utd – frábær leikur – og kíktum svo með Iðunni í spil til Arnars & Unnar.

27. maí 2011

Jón Eyfjörð fimmtugur, virkilega flott veisla, fórum svo á pöbbarölt með Hirti Howser, Hafliða og.

26. maí 2011

Fórum að hlusta á Jonna og Gunnba heiðra Dylan á Dillon, mjög vel heppnaðir hljómleikar hjá þeim.

25. maí 2011

Sambindisganga upp á Helgafell, Haddi, Höskuldur og Tommi – óneitanlega viðráðanlegra en Esjan.

22. maí 2011

GoutOnVa mætti í Kaldaselið í samlokupartý fyrir Borgarleikhúsferð. Sáum Húsmóðurina, fín sýning og hélt vel, en kannski ekki mikið meira.

21. maí 2011

Kíktum til Brynju & Kalla með Kristínu í grill og sumbl… íbúðin að taka á sig mynd.

18. maí 2011

Sambindisganga upp á Esjuna, Haddi, Hákon & Orri. Ég komst ekki mjög langt en gaman að prófa.

13-15. maí 2011

Sambindis sumarbústaða helgarferð. Alltaf frábærar helgar, maturinn fyrsta flokks og félagsskapurinn ekki síðri.

9. maí 2011

Jarðarför pabba Krissa Gísla í Kópavogskirkju. Þaðan í stúdíóið hjá Friðriki að taka upp „Positively 4th St“ fyrir Dylan koverlagakeppni Rásar2. Heppnaðist bara nokkuð vel að okkur fannst…

7.-8. maí 2011

Postula uppskeruhátíð í Grímsborgum. Dagurinn byrjaði snemma, póker og bjór með brauði, hádegismatur í boði Arnars, golf, fótbolti, matur, landakynningar, bjór, pottur, meiri póker, morgunmatur (smá svefn í millitíðinni), meiri pottur, fótboltaáhorf, bjór, hringur… Frábær matur og morgunmatur í verulega flottu umhverfi. Og ekki spillti vel undirbúin hátíð hjá Arnari.

6. maí 2011

Tuttugu og átta ára brúðkaupsafmæli. Fórum á Dill í Norræna húsinu. Virkilega flottur staður og skemmtileg uppsetning. Man því miður ekki matseðilinn. Kíktum við á Ölstofunni á eftir.

1. maí 2011

Kíktum á Gandhi með Jonna, Marissu og Viktori, virkilega góður matur og ekki í síðasta skipti sem við mætum þangað.

30. apríl 2011

Flott fertugsafmælisveisla hjá Hauki vinnufélaga Iðunnar.

22. apríl 2011

Bingó Vantrúar á Austurvell, sennilega það fjölmennasta til þessa. Brynja & Kalli, Kristín og Hekla kíktu í mat um kvöldið.

17. apríl 2011

Virkilega flott fermingarveisla á Bifröst hjá tvíburunum Magnúsi Nóa og Hlöðver Skúla, sonum Bryndísar og Hákonar. Mættum beint frá Einifelli enda heimsóknin þangað skipulögð með þetta í huga.

16. apríl 2011

Einifells heimsókn, alltaf jafn gaman að koma þangað, heitur pottur, Petanque, frábær matur, bjórsmökkun, vínsmökkun – en félagsskapurinn auðvitað toppurinn.

15. apríl 2011

Við Fræbbblar spiluðum á Ranarokki í Þorlákshöfn..

14. apríl 2011

Kíkti á Magga og félaga í Karlakór Kópavogs í Salnum, komu skemmtilega á óvart, fer þeim eiginlega betur að vera einir, kom skemmtilega á óvart að sjá að Maggi er að semja mikið af textum fyrir þá.

13. apríl 2011

Þá er Agga systir orðin sextíu og fimm ára – hélt upp á með allsherjar matarboði á BanThai fyrir stórfjölskylduna, kvöldið hefði mátt enda betur, en best að geyma fyrri hlutann frekar í minningunni.

9. apríl 2011

Auka aðal þing Postulanna, virkilega vel heppnað kvöld, þó ekki væri full mæting – mætingin var að minnsta kosti að mestu leyti full.

2. apríl 2011

Árshátíð Staka með Mílu, fín stemming og verulega góður matur. Bjórinn á barnum reyndar ekki gefinn og tónlistin þegar á leið hálf lítið fyrir okkar smekk.

1. apríl 2011

Strýhærði Pétur í Borgarleikhúsinu, skemmtileg sýning og mæli með. Vissum ekki fyrirfram um hvað sýningin var – og í sjálfu sér ekki eftir hana heldur.

Síðan heim í Kaldasel að setjast að snæðingi og sumbli að hætti GoutOnVa. Ferðasaga Assa & Sínu frá New York og Chile.

26. mars 2011

Matur hjá Gulla & Kristínu ásamt Bryndísi. Alltaf skemmtileg kvöld og kínverska þemað steinlá. Eini gallinn er hversu hratt tíminn líður, vorum rétt að byrja að spjalla þegar klukkan var orðin þrjú.

18-20. mars 2011

Sumarbústaða (eða gamals-bóndabæjar-) ferð í Neðri dal með Helga & Þóru, Bryndísi & Palla og Friðjóni & Sæunni. Elda, éta, drekka, spila, liggja í heitum potti… ef ég tryði á endurholdgun þá væri ég sannfærður um að hafa verið hafa verið Rómverji í fyrri tilvist. Nokkrar myndir

12. mars 2011

Gunnar & Ragnheiður buðu okkur í mat, erum búin að tala um það í fleiri fleiri ár að við verðum nú að fara að gera eitthvað í að hittast. Þannig að loksins tóku þau af skarið, þorskur að hætti Perúbúa í forrétt, einhvers konar heimatilbúið afbrigði af Tælenskum kjúkling og jarðarber með hvítu súkkulaði í eftirrétt. Eitthvað smávegis af víni og jafnvel bjór. Og ekki spillti fyrir að kynnast Finni og Herdísi. Frábært kvöld með góðum mat og skemmtilegu fólki.

11. mars 2011

Viktor með stjórnmálafræðinemum til Washington og New York, heimsækir Hvíta húsið og Pentagon. Hálfur postulahópurinn kom í póker um kvöldið.

6. mars 2011

Missti af morgunverðarhádegismat („brunch“) í Austurbrún… vinna. En fórum seinni partinn á tónleika Sinfóníuhljómsveitar Æskunnar og Háskólakórsins, verulega flottir.

5. mars 2011

Tefldi fyrir Hauka á Íslandsmóti taflfélaga, átti einhvern veginn aldrei möguleika á móti öruggum andstæðingi, Magnúsi Pálma.

Kíktum til Rúnu og fjölskyldu og vinkvenna um kvöldið í stutt bjór / rauðvínssull. Fínt kvöld en við sátum ekki lengi.

4. mars 2011

Matur hjá Hákoni og Hjördísi, virkilega skemmtilegt kvöld.

3. mars 2011

Minni háttar verslunarferð, hamborgari, bjór og bíó, King´s Speech, fín en einhvern veginn nákvæmlega eins og ég átti von á…

26. febrúar 2011

Matarboð hjá frænkunum Öggu og Ellu, frábær matur, humarsúpa og nautalundir og eftirréttir. Og ekki síður skemmtilegur félagsskapur.

19. febrúar 2011

Hljómsveitareldamennska hjá Auði & Steina. Nokkuð brottfall og endaði sem Íslandsdeild GoutOnVa í matnum en Rikki kíkti með eftirrétt. En maturinn klikkaði ekki, kampavínsfordrykkur, kræklingur, humarpasta og arabískur kjúklingaréttur – fyrir utan allt sem með fylgdi. Rifjuðum upp Sex Pistols myndbönd og svo nokkur lög á hljóðfærin í húsinu.

18. febrúar 2011

Snóker í Austurbrún með Kidda, Magga og Magnúsi [svona til aðgreiningar]. Bjórinn var nú óneitanlega betri en spilamennskan.

14.-15. febrúar 2011

Upptökur á nýrri Fræbbblaplötu, grunnarnir komnir fyrir 17 lög.

11.-13. febrúar 2011

Helgarferð til London, alveg sérstaklega vel heppnuð. Fluginu út seinkaði vegna veðursins og við vorum ekki komin fyrr en undir fimm, en náðum einum pöbb… svo á hinn Belgíska Belgo í Covent Garden, mjög skemmtilegur staður með ágætis mat og verulega flottu úrvali af bjór. Þaðan í flott Casino, fengum að detta inn sem gestir þar sem lágmörkin voru full há og árgjaldið 200.000. Spiluðum aðeins og gekk misvel. Þaðan á barinn á Hilton Park Lane og sátum þar við kokteiladrykkju fram eftir nóttu.

Laugardagurinn fór í Arsenal-Wolves hjá okkur verri helmingunum, flottur leikur og frábær stemming þó ég hefði viljað sjá fleiri mörk. Gufa á leiðinni heim var vel þegin. Svo í fordrykk á Texture, vonlaust að fá borð og jafnvel vonlaust að komast að í kokteil, en náðum að kjafta okkur inn. Svo á Rules, sem er elsti veitingastaður í London… flott stemming og fínn matur, reikningurinn óneitanlega hærri en á Belgo, en vel þess virði. Við Iðunn duttum aðeins inn í Casino að spila póker með ágætis árangri.

Sunnudagurinn var svo rölt um borgina, við Iðunn fengum okkur snarl á Eathai Busaban og duttum inn í Whisky búðina á Old Crompton Street.

9. febrúar 2011

Síðasta Fræbbbla æfing fyrir upptökur á nýrri plötu. Mikið helv.. verður hún góð.

8. febrúar 2011

Orðinn spilastokksgamall. Iðunn bauð mér á Humarhúsið og alltaf jafn frábær maturinn hjá þeim. Fórum svo á Rosenberg að hlusta á Halla Reynis með Öggu & Magg og Kidda & Gunnu. Flottir hljómleikar hjá honum þrátt fyrir að veðrið héldi einhverjum gestanna frá.

4-5. febrúar 2011

Tókum þátt í „Mænd geyms“, þeas. keppni í brids, kotru, skák og póker. Við vorum svona uppfyllingarlið og fengum að skipta inn á laugardeginum gegn því að geta ekki unnið mótið. Bridsið var skrykkjótt, greinilega ekki nóg að spila einu sinni á ári, nokkur góð spil, en fleiri vond. Iðunn hafði aldrei spilað kotru en vann einn leik annars lenti Gísli í að verja heiður liðsins. Skákin gekk þokkalega hjá mér, vann allar nema eina, enda á öðru borði – og í pókernum náði ég þriðja sæti.

29. janúar 2011

Verulega flott boð hjá tengdaforeldrunum, Magnúsi og Sylvíu, í Austurbrún, allur systkinahópurinn og makar mættu. Hvað vill maður hafa það betra, frábær matur, meira en nóg að drekka og skemmtilegt fólk.

27. janúar 2011

Við Fræbbblar fluttum okkur milli herbergja í æfingahúsnæðinu, nokkuð klárir í upptökur á nýrri plötu, samt tvær, þrjár æfingar eftir.

26. janúar 2011

Vinnufundur hjá Staka, fórum á Caruso á eftir, stendur alltaf fyrir sínu.

25. janúar 2011

Sambindið hittist hjá Hákoni, flottur matur, leikur, Ísland-Frakkland, sem var eiginlega alltaf tapaður.

23. janúar 2011

Brynja & Kalli að flytja, ég fæ hroll við tilhugsunina um draslið hjá okkur þegar við flytjum.

22. janúar 2011

Flottur seinni dagur í uppskeruhátíð Postulanna. Byrjaði reyndar í GoKart sem sumir tóku sem klessubílaakstur, mér amk. til lítillar gleði – enda kannski hvort sem er ekki að skilja þetta.

Síðan í heitan pott og þaðan í pílukast, bjór og enskan bolta á barinn „okkar“ Classic í Ármúla. Flottur bar hjá þeim hjónum, verst að einn starfsmaðurinn er alltaf hálf fúll.

En svo var farið í hamborgara og Ísland-Þýskaland í Keiluhöllina. Lítið að segja um leikinn en tókum keilumót eftir leikinn.

Þaðan til Þórhalls í skinku í boði Arnars, með hjálp frá Þorvaldi og Alla. Spurningakeppni frá Arnari og svo endaði „Hringurinn“ endaði með dæmalausum leiðindum.

Lét draga mig í bæinn en gafst upp á frekjunum sem tróðust fram fyrir í biðröðinni á Ölstofuna.

En mjög flottur dagur og vel skipulagður hjá Arnari.

21. janúar 2011

Flutningsdagur hjá Staka með bjór og póker. Svo fyrri hluti uppskeruhelgarhátíðar Postulanna, líka bjór og póker. Við Arnar unnum sitt hvort mótið.

8. janúar 2011

Systkinamatarboð hjá Bryndís & Palla, virkilega skemmtilegt kvöld eins og alltaf, þó Þóra væri lasin heima, og ekki spilltu veitingarnar.

1. janúar 2011

Einhver þreyta situr í okkur og slappleiki, ekki afleiðing af drykkju eins og einhver gæti haldið. Brynja & Kalli kíktu í kaffi með Öglu.

2010

31. desember 2010

Áramótin með tengdaforeldrunum að venju, í Austurbrún með Bjarna Þór, Hafsteini, Jónu og Siggu frænku Magnúsar. Iðunn náði að slasa sig lítillega á blysi þannig að partý áform voru slegin af en sátum í góðu yfirlæti með MacAllan whisky fram eftir nóttu. Ekki má gleyma frábærum mat, humar, nautalundir og eftirréttur sem ég kann ekki að nefna og ekki vantaði vín til að skola veitingunum niður með. Við höfum alltaf fagnað áramótunum með Magnúsi og Sylvíu, alveg sérstaklega gaman.

30. desember 2010

Árlegt Áramót Iðunnar í Bridge, Hallgrímur og Hallmundur unnu í þetta sinn, sjö pör mættu til leiks.

29. desember 2010

Afmæli hjá Assa, verulega flott veisla hjá honum (og Stínu), GoutOnVa matreiðsla eins og hún gerist best..

27. desember 2010

Árlegt Jólamót Jonna í skák, Guðmundur Kjartansson vann.

26. desember 2010

Jólaboð í Austurbrún með tengdafjölskyldunni eins og venjuleg á annan í jólum, alltaf jafn gaman að hitta fjölskylduna, smá bridge til upphitunar, frábærar veitingar og skemmtilegir leikir.

25. desember 2010

Jólaboð hjá minni hlið fjölskyldunnar eins og venjulega á jóladag, nokkrar hangikjötstegundir og svo sem nóg af veitingum, popppunktsspil og „actionary“.

24. desember 2010

Vel heppnað aðfangadagskvöld, kalkúnninn sennilega aldrei betri, ekki klikkuðu rauðvínin og mjög þægilegt fjölskyldukvöld – engir gestir að þessu sinni.

23. desember 2010

Skötu- og saltfiskveisla hjá mínum hluta fjölskyldunnar í boði Öggu. Komum ekki að tómum matar- eða drykkjakofunum hjá Öggu frekar en fyrri daginn. Fórum svo á smá flakk niður (upp?) Laugaveginn með Öggu & Magga.

18. desember 2010

Laufabrauðsgerð í Kaldaseli með stórfjölskyldunni minni, smákökur, hvítöl, jólalög, útskurður, steiking og skýring á því hvers vegna þau kláruðust svona snemma í fyrra, fundum dall með 30 ársgömlum laufabrauðum.

17. desember 2010

Árlegt út-að-borða-fyri-jólin, fórum á Caruso, mis mikið ánægð, sumt mjög fínt, annað í lagi, enginn óánægður – ekki frá því að þetta sé með betri stöðum miðað við verð og hafa haldið ágætis „standard“ nokkuð lengi..

13. desember 2010

Síðasta postulatíminn, tapaði endanlega þó síðasti tími hafi kannski verið sá sem skipti máli. Svekkjandi, en ekki hægt að neita að Sævar var bestur og átti titillinn skuldlaust.

11. desember 2010

Næsta jólamatarboð, Iðunn hressari og Brynja & Kalli og Halli & Steinunn og Kristín og Siggi kíktu í og komu með mat. Grafin nautalund með döðlusósu, andabringur með appelsínusósu, grísasteik með Waldorf salati, svínalifur, PannaCotta í eftirrétt.

10. desember 2010

Sambindis jólamatur hjá Hadda & Ellen, Iðunn reyndar lasin, en mjög vel heppnað, skemmtileg matarsamsetning og ekki síst félagsskapurinn.

3.-5. desember 2010

Einifells ferð, alltaf jafn gaman. Aðeins að skoða reykingarnar hjá húsráðendum, lambalæri, bjúgu, lax, ostur, brauð og mandarínur. Svo var aðeins étið og drukkið, einn, tveir ostar, rauðvín, bjór, hvítvín, freyðivín, heimabakað brauð með trufflu olíu, svo útigrillaður humar og nautalundir í kvöldmat. Tvær pottferðir, ótrúlega tilkomumikil stjörnusýning með alvöru „stjörnuhrapi“.

3. desember 2010

Við Viktor mættum í síðdegisútvarp Rásar2 að spjalla um fréttir vikunnar, stjórnlagaþing og WikiLeaks.

Jólamatur hjá Mílu, fínn matur en stoppaði stutt enda á leiðinni í sveitina.

2. desember 2010

Jesú litli í Borgarleikhúsinu, kann alltaf betur við svona litlar sýningar en stórar uppsetningar – bjór hjá Auði & Steina á eftir.

30. nóvember 2010

Úrslit í stjórnlagaþingskosningunni kynnt. Hvorugur okkar Viktors komst inn. Frekar fúlt, ekki vegna þess að ekki væri nóg af góðu fólki, heldur vegna þess hversu margir fóru fram sem lítið erindi eiga lítið höfðu fram að færa eða eiginlega skilning á verkefninu. En svona fór það…

27. nóvember 2010

Stjórnlagaþingskosningar. Undarlegt að sjá þetta litla mætingu. Brynja kíkti á okkur um kvöldið..

26. nóvember 2010

Eyddum kvöldinu í að skoða hverja við ættum að kjósa á Stjórnlagaþingið. Eiginlega nokkuð gaman, en við erum auðvitað „nördar“. Kvöldið fyrir kosningar og í Kastljósinu er…. Gunnar í Krossinum?!?

25. nóvember 2010

Greinaskrif og sendingar fyrir stjórnlagaþingsframboðið, aðeins að skoða hverja á að kjósa.

23.-27. nóvember 2010

Stjórnlagaþingsframboðsundirbúningur.

20. nóvember 2010

Við Viktor vorum samferða í spjall hjá Rúv til að kynna framboðið okkar til Stjórnlagaþings.

19. nóvember 2010

Jólamatur Staka, fórum á „Við Tjörnina“, fínn matur og vel yfir meðallagi, en kannski ekki alveg eins svakalega flottur og venjan er hjá þeim. Minni háttar pöbbarölt á eftir.

15. nóvember 2010

Iðunn farin til San Francisco á ráðstefnu.

13. nóvember 2010

Iðunn að útskrifast frá Endurmenntun HÍ, Hugræn Atferliðmeðferð, nám sem jafngildir annarri Masters gráðu, héldum upp á um kvöldið með bara þó nokkuð vel heppnaðri veislu.

12. nóvember 2010

Enron í Borgarleikhúsinu, ekki slæm sýning, en kannski ekki mikið nýtt.

Og svo til Assa og Stínu í frábæran Víetnamskættaðan mat.

6. nóvember 2010

Sumarbústaðahelgarferð Sambindisins styttist í einn dag og fór fram í Skerjafirðinum. Vel heppnað kvöld (og dagur) þó ekki væri full mæting og endingin misgóð hjá mönnum. Og ekki klikkuðu veitingarnar hjá Höskuldi frekar en fyrri daginn.

30. október 2010

Árshátíð Vantrúar í Friðarhúsi, gaman að hitta Vantrúaða og frábær matur, í fyrsta sinn sem ég fæ hvalkjöt sem er ekki amk. kosti með smá keim af lýsi. Og humarinn…

Síðan á hljómleika Fræbbbla og Q4U, við byrjuðum og spiluðum í hálftíma, Q4U komu svo og við tókum seinni hlutann ásamt nokkrum annarra manna efnis lögum.

En mætingin frekar döpur og kannski eigum við ekki lengur erindi á pöbbana að spila, þurfum sennilega að finna nýjan vettvang.

23. október 2010

Matur hjá Öggu og Magga, Foie Gras og Kampavín, bláskel frá Hrísey, grillaður skötuselur, hvítlauks lambalæri, eftirréttartilraun, whisky…

22. október 2010

Móttaka í vinnunni hjá Iðunni, gaman að hitta fólkið, skemmtilegur salur í Slippnum („nema“) og smá pöbbarölt (eða pöbbrölt) en týndum hinum á leiðinni. Komum heim í lokin á fjörugu og fjölmennu afmæli Viktors

17. október 2010

Kíkti á nokkrar hljómsveitir á Sódómu, fínar.

16. október 2010

Spiluðum á Airwaves á Amsterdam um hálfníu, gekk bara nokkuð vel, eiginlega þræl vel. Svo beint í fertugsafmæli Sæunnar, flott veisla og það sem sem meira máli skiptir, skemmtilegt fólk.

15. október 2010

Vinnustaðakveðjuhóf og poolmót, Viðar að hætta og vann mótið eins og hefðir hjá Staka segja til um. Skemmtilegt Airwaves rölt á eftir, Obja Rasta kom rosalega skemmtilega á óvart.

14. október 2010

Fór með Assa á Airwaves, hittum Gumma og Helga á Nasa, draumur að sjá endurkomu SH Draums, enduðum á frábærum Jan Mayen á Amsterdam.

13. október 2010

Fundur hjá Stjórnarskrárfélaginu.

12. október 2010

Síðasta æfing fyrir Airwaves.

10. október 2010

Setti upp sérstaka síðu fyrir framboð til stjórnlagaþings..

9. október 2010

Afmæli hjá Laufeyju Rós, og svo Kötu og Tuma í leiðinni. Klassinn á veitingunum fer ekkert niður á við með þessari kynslóð.

6. október 2010

Búinn að skila formlega inn öllum gögnum fyrir framboð til stjórnlagaþings.

3. október 2010

Kíktum til Sæunnar & Friðjóns í síðdegiskaffi, svo á æfingu og Öggu & Magga um kvöldið.

2. október 2010

Kíktum til Sigga Örlygs á vinnustofuna og svo í að sækja myndir. Gaman að sjá vinnustofuna og margar eigulegar myndir, full stórar þær sem eru í vinnslu núna eru samt full stórar. Brynja og Kalli kíktu og elduðu með okkur.

29. september 2010

Sambindisfundur hjá Hadda, vetrarstarfið skipulagt..

25. september 2010

Breiðablik Íslandsmeistari í fótbolta. Loksins. Loksins. Flott lið stráka sem eru að mestu uppaldir og spila skemmtilegan fótbolta. Við Viktor fórum á leikinn og vorum tiltölulega rólegir, eða þar til síðustu þrjár mínúturnar þegar Blikarnir ákváðu að halda jöfnu. Kíkti svo á Players um kvöldið að fagna með Blikum.

24. september 2010

Alli, Friðjón, Hólmbert, Kalli og Maggi kíktu í spil, Iðunn í Gullrottusumarbústaðaferð.

19. september 2010

Vinna og á völlinn að sjá Breiðablik – Selfoss, 3-0 og aðeins einn leikur í meistaratitilinn, svei mér þá ef þetta hefst ekki, liðið virðist amk. nógu gott.

18. september 2010

Brúðkaupið hjá Kötu og Nonna, fín athöfn og rosalega flott veisla.

16. september 2010

Alltaf gaman að fara á völlinn þegar Blikar vinna, ekki leiðinlegt að vinna KR og það á útivelli. Og toppurinn var auðvitað að halda efsta sætinu.

10.-14. september 2010

IBC sjónvarpssýningin í Amsterdam. Aðeins að verða þreyttur á okrinu í borginni þessa helgi. Í sjálfu sér ekki mikið nýtt á sýningunni en alltaf einhver þróun. Sýningin skilaði svo sem því sem stóð til.

Veitingahúsin stóðu ekki alveg undir væntingum, Vasso reyndar góður, Van de Kart lokaður, fann ekki Whisky barinn og komst allt of sjaldan á bjórbarina.

9. september 2010

Frændfólk frá Dalvík Kiddi, Herdís, Sædís, Haukur og Ólöf kíktu í mat með Öggu, Magga og Kidda.

6. september 2010

Postuladeildin í fótbolta hefst.

4. september 2010

Greip í tómt að kíkja á Leikni – HK, aftur að hlusta á Gæðablóð sem spiluðu klukkutíma fyrir auglýstan tíma og svo á Kotrumótið sem var akkúrat í matarhléi.

3. september 2010

Iðunn í sumarbústaðaferð, Alli, Kalli, Venni og Þórhallur kíktu í landsleik og spil.

28. ágúst 2010

Málþing um stjórnarskrána í Skálholti. Brynja & Kalli og Kristín og Helgi & Þóra kíktu í mat um kvöldið.

27. ágúst 2010

Snóker með Magga og Kidda í Austurbrún.

26. ágúst 2010

Fyrsta Fræbbblaæfing í margar vikur. Eins og við hefðum æft síðast í gær.

23. ágúst 2010

Sá Breiðablik tapa óvænt fyrir Haukum. Svekkjandi.

22. ágúst 2010

Iðunn fjörutíu og fjögurra ára, hálflasin og nenntum ekki kaffi.

21. ágúst 2010

Fastur í vinnu fram eftir degi. Mættum á úrslit Þrassins, ræðukeppni, í kulda og trekki og stöku flugvél að fljúga yfir úrslitakeppnina í porti Miðbæjarbarnaskólans. En Viktor og félagar unnu keppnina. Fengum okkur kaffi á Kaffitári til að þýða mesta frostið úr okkur, svo smárölt upp og niður Laugaveginn og enduðum á English Pub.

Fórum á Tapas barinn um kvöldið með Brynju, Kristínu og Þorsteini. Maturinn var svo sem allt í lagi en þeim fer fækkandi veitingastöðunum sem keppa við matarklúbbana okkar. Svo á kjólaball í Iðnó hjá heimilistónum, skemmtileg stemming og hitti mikið af fólki sem ég hef ekki hitt lengi. Samt kannski ekki alveg mín deild og megnið af tímanum á annarri hæðinni að kjafta.

Tókum Reykjavíkurborg á orðinu með Strætó og gripum í tómt þegar við fórum heim, þrátt fyrir loforð um að þeir myndu ganga eins lengi og þyrftu.

17. ágúst 2010

Sambindisfundur hjá Höskuldi, vetrarstarfið skipulagt.

15. ágúst 2010

Fjölskyldumorgunhádegisverður í Austurbrún, gaman að hitta fjölskylduna þó ekki væri full mæting að þessu sinni. Og ekki sveik maturinn.

14. ágúst 2010

Hófum daginn á málverkasýningu hjá Sigga Örlygs, mikið af flottum myndum, 224 og fórum heim með þrjár.

Fjölskylda Marissu, kærustu Jonna, kom í síðbúinn kvöldmat. Mamma hennar er reyndar í Mexíkó og elsta systirin komst ekki. En verulega skemmtilegt að hitta þau, gott kvöld og þó við segjum sjálf frá, góður matur.

6. – 8. ágúst 2010

Agga, Maggi og Kiddi sóttu mig á Einifell á föstudagsmorgun og eftir stutta kynningu á Einifell lögðum við í Fiskidaginn. Súpan virtist í boði á heldur færri stöðum en áður og biðraðirnar því lengri. Eftir góða tælenska súpu og frábærar súpur hjá Val frænda duttum við inn í íbúð. Kiddi var hálfslappur og rétt þegar hann var búinn að tala okkur niður fór hann að æsa sig af stað, við ákváðum samt að vera aumingjar þetta kvöld og taka laugardaginn almennilega.

Það er eiginlega alltaf jafn gaman á Fiskideginum, atriði hæfilega stutt og fjölbreytt, maturinn betri en áður, ég er alltaf svolítið veikur fyrir saltfiskbollunum, bláskelin frá Hrísey var frábær, en biðröðin í Sushi hjá Humarhúsinu og Friðrik fimmta allt of löng og hreyfðist of hægt. Þegar við ætluðum loksins að láta okkur hafa það var hengt á næstu manneskju á undan að hún væri sú síðasta sem fengi skammt.

Við fórum svo í flottan kvöldmat hjá Kidda frænda um kvöldið en frænkurnar Agga og Elín áttu víst nokkurn þátt í boðinu. Þaðan lá leiðin niður á bryggju í skemmtidagskrá og flugeldasýningu og svo til Vals í Stroh og meiri bjór. Kvöldinu lauk á Sunnuhvoli í „boði“ afkomenda og ættingja Rúnars Júl, Þóris Baldurs og fleiri..

Sunnudagurinn fór að mestu í heimferð, en áður heimsóttum við Hafstein í Miðkoti og ótrúlega flott plötusafn hans. Já og eiginlega miklu meira en bara plötur. En það var bæði gaman að sjá þetta og spjalla við Hafsteinn og stutt heimsókn tók tvo tíma.

4. – 6. ágúst 2010

Einifells heimsókn… Assi, Stína og Ásta Lovísa komu með Svisslendinga í heimsókn sem töluðu ekki annað en frönsku. Okkur tókst samt að ná ágætis Petanque leik og ná þokkalegum árangri gegn andstæðingum sem hafa sennilega spilað miklu lengur en við. Frábær nautasteik um kvöldið, RibEye, á nýja útigrillinu, eða úti eldhúsinu. Við sátum svo fram undir morgun í heitum potti að spila tónlist og sötra gæðavín og bjóra… held að klukkan hafi verið orðin rúmlega átta þegar við duttum út af.

Við Steini tókum golf á Einifells lóðinni á fimmtudag, settum laxaflök í reyk og síðan hófst alvöru Petanque mót, sem náðist heldur ekki að klárast. Lambalærið sem ég hafði keypt var orðið úldið en nægur var maturinn og frábær kvöldmatur. Við náðum ekki að endurtaka vökuna þessa nóttina.

19. júlí – 1. ágúst 2010

Tveggja vikna ferð til Costa del Sol, vorum í íbúðinni sem Magnús og Sylvía eiga á Benalmadena. Stutt stopp í London á heimleiðinni. Einhverra hluta vegna snúast allir punktarnir um mat.. Nokkrar valdar myndir hér. Við flugum til London á mánudegi, stoppuðum nokkra tíma á Gatwick og vorum komin á Benalmadena um hálftíu. Ágæt tómatsósulaus pizza á Strombóli en Iðunn ekki sátt við pastað. Kíktum í Arroyo að ná okkur í netsamband, raunasagan í samskiptum við Movistar rakin seinna, en fórum á sjávarréttastaðinn við ströndina um kvöldið. Frábær matur en ekki alveg gefinn.

Flakk til Malaga á fimmtudag, heimsókn í vínkjallarann og fylgdumst með Blikum á móti Motherwell í símanum á heimleið. Vondur matur á Sabatini um kvöldið, en það hefur skylda að mæta þar einu sinni í ferð. Sú skylda hefur nú verið aflögð.

Lítið spennandi markaður á föstudagsmorgni og hinn frábæri indversk-ítalski „Flying India“ um kvöldið.. Hittum Terry og Maitie reyndar fyrr um kvöldið. En þessi veitingastaður er með þeim betri sem ég þekki til. Enda þegar saman fer gott hráefni, spennandi krydd, frumleg samsetning og matnum ekki drekkt í kryddi, tja, hvað þarf maður meira?? Terry og Maitie buðu okkur í mat á laugardagskvöldið. Sunnudagurinn var rólegri, fórum á Casino og veskið talsvert þykkara þegar við fórum út eftir pókerinn.

Fórum á „litlu systur Októberfest“ í kastala í Fuengirola á þriðjudagskvöldinu. Þetta var auglýst sem bjór og rokk en „rokkið“ samanstóð af (annars ágætri) lúðrasveit að spila „Viva Espana“, ellilífeyrisþega sem jóðlaði með skemmtara og undarleg samsetning af Bubba Morthens (útlitslega) og Ragga Bjarna að syngja „Volare“ og fleiri „brekkusöngslög“. [Ekki misskilja að ég hafi neitt á móti Bubba eða Ragga, blandan var einfaldlega stórskrýtin]. Þetta var svo auglýst þannig að barmmiklar kraftalegar konur bæru fram bjórinn með fjögur glös á hvorum armi og eitt á hvoru brjósti. Þetta gekk reyndar ekki alveg eftir enda flestir þjónarnir pervisnir ungir drengir. Bjórinn var hins vegar fínn, maturinn vondur og skankarnir stóðust engan veginn samanburð við matreiðsluna hjá Helga og Þóru. En þetta kvöld var eitthvað sem þurfti annað hvort að taka eins og það kom af kúnni eða fara heim. Við drukkum fullt af bjór og Iðunn dansaði megnið af kvöldinu uppi á borði.

Fórum vil Tangier í Marokkó á fimmtudag. Vissulega gaman að hafa komið þangað en samt svona hálfgerði tímasóun. Löng ferð fram og til baka í rútu og ferju, meiri rúta á staðnum þar sem farastjórinn sagði okkur hvaða hverfi tilheyrði hvaða þjóð, tók átta sinnum fram að þarna mættust Atlantshafið og Miðjarðarhafið, leiddi okkur þegjandi um öngstræti borgarinnar inn á veitingastað þar sem við vorum fóðruð, síðan vorum við teymd í teppasölu, þá í kryddsölu og þaðan aftur heim.

Fórum aftur á „Flying India“ á föstudagskvöldi og er ásamt hinum frábæra ítalska „Da Fano“ við smábátahöfnina uppáhaldsveitingastaðurinn okkar þarna.

Flugum til London á laugardagskvöld með Ryanair (ripoffair) sem rukka um hvert handtak og leggja meira á drykkina um borð en ÁTVR…. En gistum á Stansted á Radisson tókum rútu þaðan í miðbæinn á sunnudag, röltum og fengum okkur mat á Busaba Eathai sem klikkaði ekki frekar en áður.

18. júlí 2010

Afmæli hjá Kidda, stórfjölskyldan í annað sinn í grilli á þremur dögum. Aðeins í skugga þess að Garðabæjargranninn gekk í skrokk á Brynju og Kalla með aðstoð sonarins.

17. júlí 2010

Afmæli hjá Kristínu, fullt af fólki og mjög gaman.

16. júlí 2010

Frændfólkið frá Kanada kom í heimsókn í Kaldaselið í grill ásamt stórfjölskyldunni, sérstaklega vel heppnað kvöld, skrýtið samt að vera með hangikjöt um hásumar.

15. júlí 2010

Stórskemmtilegir hljómleikar á Sódómu, „Nei, við nauðgunum“, Assi og Helgi voru fjarverandi en Rikki og Steini hlupu í skarðið – og Jonni í nokkrum lögum. Rosaleag skemmtilega kvöld og spillti ekki að spilamennskan gekk framar vonum.

13. júlí 2010

Síðasti vinnudagur fyrir sumarfrí, Viktor kom heim. Og frændfólkið frá Kanada kom í morgun.

11. júlí 2010

Úrslitaleikurinn á HM, Alli og Brynja og Kalli og Magnús og Sylvía horfðu á leikinn með okkur. Frábært að liðið sem spilaði fótbolta skylda vinna. Gaman fyrir Viktor að vera á risa nautaatstorgi í Malaga með tugþúsundum Spánverja.

9. júlí 2010

Afmæli í vinnunni hjá Iðunni, hluti af samkvæminu kom í partý til okkar eftir að hefðbundnu afmæli lauk, alltaf jafn gaman að hitta þennan hóp.

8. júlí 2010

Bryndís og Gulli & Kristín komu í matarklúbb þar sem hver kom með sitt. Næstum því allir með lax en átveislan svo mikil að við náðum ekki að klára síðasta réttinn.

7. júlí 2010

Brynja & Kalli kíktu í mat og frábæran undanúrslitaleik á HM.

6. júlí 2010

Magnús & Sylvía kíktu í grill og undanúrslitaleik á HM.

4. júlí 2010

Agla Margrét tveggja ára, kaffi-, vöfflu- og pönnukökuveisla í Aratúni að hætti hússins.

3. júlí 2010

Alli, Arnar & Unnur, Bynja & Kalli & Agla og Kristín kíktu á Argentínu – Þýskaland með okkur eftir hádegið, en slepptu seinni leiknum. Assi og Stína komu svo hjólandi um kvöldið.

2. júlí 2010

Brynja, Kalli og Kristín kíktu í fótbolta og mat, alltaf jafn skemmtileg kvöld.

1. júlí 2010

Viktor farinn til Spánar, liggur við að það verði hálf einmanalegt hjá okkur tveimur…

27. júní 2010

Fjölskylduhittingur í Austurbrún, Haukur, Kári og Sylvía komin heim frá útlandinu og Viktor ekki farinn. Gaman að hitta loksins kærustuna hans Jonna, Marísu.

26. júní 2010

Fjölskyldugrill hjá Öggu og Magga í Móa, flottur nýi pallurinn þó hann nýttist kannski ekki eins og vel og við vonuðumst til vegna kulda, yfirdrifið af mat eins og alltaf þegar þessi fjölskylda hittist.

25. júní 2010

Orri og Tommi kíktu í grill og fótbolta og smá tónlist, vel heppnað kvöld.

24. júní 2010

Fyrirlestur hjá James Randi í Háskólanum, virkilega skemmtilegur og gaman að sjá hann. Hittum stutt á Krissa og Rúnu á eftir.

21. júní 2010

Skemmtilegur fyrirlestur hjá Daniel Dennet í Háskóla Íslands.

19. júní 2010

Útskriftarveisla hjá Góu, svakalegar veitingar, „aldrei þessu vant“… Kristín kíkti í heimsókn um kvöldið.

18. júní 2010

Raclette hjá Magnúsi og Sylvíu í Austurbrún, virkilega gaman að hitta þau aftur eftir Spánardvölina og alltaf sérstök stemming yfir matnum.

17. júní 2010

Heima, aldrei þessu vant, á sautjánda júní.

16. júní 2010

Hljómsveitar át- og drykkjuveisla í Kaldaseli, Fræbbblarnir og HFF – Árni Daníel reyndar veikur. En mikið rosalega var þetta góður matur og skemmtilegt kvöld. Grillaður lax, rauðbeður með geitaosti og hnetukurli, kjúklinga canelloni, súkkulaðikaka, rabarbarabaka, marineraðir sjávarréttir, salat, tandori kjúklingur, áll, nautavöðvi í engifer og hvítlauk, grillpinnar með kjúklingi..

12. júní 2010

Dagbjört dóttir Hákonar og Kötu að útskrifast sem lögfræðingur, virkilega flott útskriftarveisla.

5. júní 2010

Tók að mér að vera afhafnastjóri við nafngjöf Hrafnkels Mána, sonar Alla og Drafnar. Mjög gaman og flott veisla.

Elduðum síðbúinn kvöldmat með Brynju og Kalla og enduðum í heimsókn til Kristínar á Ölstofuna, eiginlega bara nokkuð gaman.

5. júní 2010

Tók að mér að vera afhafnastjóri við nafngjöf Hrafnkels Mána, sonar Alla og Drafnar. Mjög gaman og flott veisla.

29. maí 2010

Kosningaútsending hjá Rúv. Alltaf sérstök stemming í kringum útsendinguna, gekk í sjálfu sér mjög vel. þó alltaf hefði eitthvað mátt ganga betur. Sátum svo að sumbli til sjö undir morgun.

21. maí 2010

Matur hjá Helga og Þóru, Bryndís og Palli kíktu líka. Maturinn frábær að vanda hjá þeim, svínaskankar hljómuðu kannski ekki spennandi fyrirfram en mikið rosalega tókst þeim að gera góða máltíð úr þessu. Og alveg sérstaklega gaman alltaf að hitta þau systkini plús maka þó Sæunn og Friðjón væru á öðru flakki í þetta skipti.

15.-16. maí 2010

Við Fræbbblar fórum til Húsavíkur til að spila á hljómleikum ásamt Morðingjunum og þremur frábærum „innfæddum“ hljómsveitum. Fórum á Ford 350 bílnum hans Gumma, stoppuðum í Staðarskála Glerártorgi á Akureyri og vorum mætt hálf fimm í „sándtékk“ sem gekk fljótt enda greinilega vanir menn á staðnum. Matur á Gamla Bauk og svo byrjuðu hljómleikarnir hálf níu. Þrjár mjög flottar ungar hljómsveitir byrjuðu, Functional Foundation, Jukk og Johnny Computer. Morðingjarnir stórskemmtilegir og okkar spilamennska gekk, að ég held, nokkuð vel, amk. fannst okkur mjög gaman. Gaman að hitta Sigurgrím fyrrum Fræbbblameðlim og Kára, pabba Hilmars, sem var í forsvari fyrir hljómleikana, en Kári var oft í sambandi við okkur á sínum tíma – við vorum alltaf á leiðinni að spila á Húsavík.

Við sátum aðeins fram eftir á Bauknum, gaman að hitta skólasystur Iðunnar, sem býr á Laxamýri, rétt utan við bæinn. Fínn morgunmatur á Árbóli og kaffi hjá Rögnvaldi gáfaða á Akureyri. Síðasta stoppið var á Pottinum og pönnunni á Blönduósi. Rokkland þar sem Óli Palli gerði nýjum safndisk Stranglers góð skil fylgdi okkur heim.

7.-9. maí 2010

Uppskeruhátíð Postulanna í Grímsborgum, vorum í mjög skemmtilegum hús sem Ólafur Laufdal er með. Nautalund á föstudagskvöldið, lambahryggur á laugardag og stór morgunmatur báða dagana. Stíf dagskrá að hætti Arnars, á laugardeginum golf, pílukast, reiptog, strútafótbolti og spilastokkakeppni í fótbolta, hvert keppti fyrir eina þjóð sem hann kynnti fyrir mótið. Þar fyrir utan póker, bjórdrykkja, heitur pottur og meiri bjór.

6. maí 2010

Tuttugu og sjö ára brúðkaupsafmæli. Fórum á Dill og fengum heldur betur frábæran mat, er kominn í uppáhaldsveitingahúsalistann, ásamt Humarhúsinu, Við Tjörnina og nokkrum í útlandinu. Rosalega skemmtilega unnið úr hráefninu og þjónustan til fyrirmyndar fengum okkur fimm rétta matseðil.

1. maí 2010

Matarklúbburinn GoutOnVa hittist. Í þetta sinn skipt í lið með jöfnu kynja hlutfalli og hjón höfð í sitt hvoru liðinu. Okkar hópur byrjaði í Reynihvamminum hjá Rúnu um hálffjögur. Iðunn varð svo lasin rétt fyrir tvö, þegar við vorum nýbúin að klára síðasta réttinn. En Dry Martini, Foie Gras, trufflusveppakæfa, Trufflusveppa Risotto, baconvafin hörpuskel, lax á spínati með geitaosti og appelsínu lavender, kræklingur, grilluð lúða og andabringa á kartöfluturni.

30. apríl 2010

Hljómleikar á Sódómu. Frábært að sjá Q4U aftur á sviði og ekki skemmdi kvöldið að við Fræbbblar áttum sennilega okkar bestu hjómleika. Fastagestirnir voru mjög sáttir og það kom skemmtilega á óvart hversu margir af yngra fólkinu komu til okkar eftir hljómleikana og voru yfir sig hrifin og eiginlega mjög undrandi.

29. apríl 2010

Kíktum á Humarhúsið í hádeginu, Jonni einum degi eldri en tuttugu og fimm ára. Þetta er nú eiginlega alveg toppurinn, þó við höfum kannski ekki legið afvelta eftir matinn…

Dúfurnar í Borgarleikhúsinu um kvöldið, flott sýning og réttlætti, með Dauðasyndunum, áskriftarmiðakaupin.

GoutOnVa, sem var mættur í öllu sínu veldi, fór svo á Kringlukrána að skipuleggja laugardagsmatarklúbbinn.

28. apríl 2010

Jonni tuttugu og fimm ára. Tuttugu og fimm ára. Kíkti með Arnari á Barcelona – Inter. Hefði mátt enda betur.

27. apríl 2010

Síðasta Fræbbblaæfingin fyrir hljómleikana næsta föstudag.

26. apríl 2010

Lokakvöld Postulanna, mætti þó heilsan væri slöpp, það er bara ekki hægt að sleppa þessu kvöldi. Gústi vann og var vel að sigrinum kominn.

24. apríl 2010

Kvefaður eins og aumingi, spiluðum samt nokkur lög á hverfishátíð í Breiðholtinu um daginn. Sambindið kíkti til Höskuldar um kvöldið að skála fyrir nýju starfi.

23. apríl 2010

Alli, Bjössi, Gústi og Palli kíktu í spil.

22. apríl 2010

Innflutningspartý hjá Krissa, Rúnu og fjölskyldu í Reynihvamminum. Auður og Steini kíktu í hversdags spaghetti áður. En mikið rosalega var þetta skemmtilegt partý, svo sem eins og við var að búast.

18. apríl 2010

Tommi hennar Brynju (og Sverris og Kalla) að fermast í dag. Mjög ánægður með hann að fermast hjá Siðmennt. Átti svo sem ekki von á neinum slor veitingum, en svei mér þá ef Aratúnið toppaði ekki fyrri veislur.

17. apríl 2010

Stjórnarskrárfundur að hætti þjóðfundar. Tók þátt í að undirbúa fund um stjórnarskrá með nokkrum áhugamönnum. Tilefni fundarins var að velta upp um hvað stjórnarskráin ætti að fjalla. Þokkalega vel mætt, yfir 50 manns, þrátt fyrir að erfitt sé að ná athygli á þessum tíma. Og kom á óvart hvað þetta var skemmtilegt og fróðlegt. Líka gaman að vinna eftir aðferðafræði þjóðfundar, sem Guðjón Már stýrði. Vonandi að þetta sé bara upphafið að vinnu við að skrifa stjórnarskrá.

Margtilhlökkuðu innflutningspartýi Krissa og Rúnu varð að fresta þar sem þau voru öskuteppt í Köben.

16. apríl 2010

Stakamót í Keilu, Stefán var einu stigi fyrir ofan mig, og átti eitt skot eftir þegar tíminn rann út. Ætla að leyfa mér að trúa að ég hefði klárað næstu umferð sem við vorum byrjaðir á, en náðum ekki að klára. Næst haldið í „pool“ í Lágmúlanum sem Stefán kláraði líka. Ég lét gott heita að kíkja til Andreu á Dillon en þeir sátu eitthvað áfram.

14. apríl 2010

Ættarkaffi hjá Öggu, við Kiddi kíktum í heimsókn og hittum Öggu Hrönn og mömmu hennar, gaman að rifja upp og heyra sögur af ættingjunum – bæði frá Dalvík og Þingeyri.

11. apríl 2010

Elín að fermast. Glæsileg veisla í Reynigrundinni hjá Auði og Steina.

4. apríl 2010

Páskaegg. Matur í Austurbrún um kvöldið. Hittum Patrick sem við kynntumst á Spáni og er í heimsókn hjá Magnúsi og Sylvíu. Og sáum nýjasta fjölskyldumeðliminn, afabarn Palla og Bryndísar, ónefnda dóttur Jönu og Magga.

3. apríl 2010

Stjórnarskrárspjall fundur á Thorvaldsen. Assi og Stína buðu svo í alvöru saunu við Mógilsá, Foie Gras á meðan við biðum eftir að gufan hitnaði. Svo heim til þeirra í frábærar nautalundir, kartöflusalat og alvöru piparrótarsósu. Og Pecanhnetubakan….

2. apríl 2010

Sváfum Sambindisgöngutúr af okkur, enda Iðunn ekki göngufær og ganga í leiðindaveðri ekki ofarlega á áhugamálalistanum hjá mér.

Mætti hins vegar í bingó hjá Vantrú á Austurvelli.

Megnið af deginum fór samt í að fikta í Cubase studio forritinu sem Iðunn gaf mér í afmælisgjöf. Virðist vera hægt að gera „allan andskotann“ þarna, en leiðirnar stundum svolítið skrýtnar og langar. Og óþolandi að þurfa alltaf að setja kubb í tölvuna í hvert skipti sem ég opna forritið.

Addi og Jonni komu í kvöldmat og Alli bættist í hópinn við að spila Póker fram eftir.

31. mars 2010

Kíkti á Arsenal-Barcelona með Viktori, Arnari og Garðari… frábær leikur.

27. mars 2010

Punk 2010 á Amsterdam, alltaf eitt af skemmtilegustu kvöldum ársins, í þetta sinn 17 manna hópur, meira efni, og talsvert af nýjum mannskap. „Fivebellies“ hópurinn smellpassaði inn í dagskrána og frábært að heyra aftur í Snillingunum. Efnið sem við tókum fyrri tvö árin gekk jafnvel enn betur en þá og það var eins og Biggi Baldurs, Jakob Smári og Hjörtur Howser hefðu aldrei gert annað en að spila þessi lög. Á neikvæðu nótunum var svo leiðindaatvik við dyravörslu og þó mætingin hafi í sjálfu sér verið fín, áttum við jafnvel von á enn fleiri gestum.

20. mars 2010

Punk 2010 æfing um morguninn og fram eftir, smá hreyfing, fótbolti og nokkrir postular (og Unnur) mættu í póker um kvöldið.

19. mars 2010

Billiard hjá Magnúsi í Austurbrún með Kidda og Magga, smá bjór og mjög skemmtilegt kvöld, myndir fljótlega..

15. mars 2010

Fyrsta æfing fyrir Punk 2010.

13. mars 2010

Árshátíð Staka með Mílu, frábær matur í Hlégarði og fín heimatilbúin skemmtiatriði.

11. mars 2010

Mætti í Pókermót Símans, datt út í sjötta sæti. Kíkti á Vantrú á O’Conner á eftir, eitthvað fækkað þegar ég kom. Missti af fundi um stjórnarskrána.

6. mars 2010

Orri og Tommi kíktu í bolta, bjór, mat og músík, sérstaklega vel heppnað kvöld og vonandi endurtekið áður en of langt um líður.

5. mars 2010

Kíkti í spil til Kalla, ásamt Alla, Palla, Braga, Magga, Steina og Þórhalli.

27. febrúar 2010

Bryndís, Gulli og Kristín kíktu í mat, skemmtilegt kvöld eins og alltaf þegar við hittumst.

26. febrúar 2010

„Food and Fun“ á Nauthól með Assa og Stínu. Að mörgu leyti skemmtilegur staður en sama vandamál og víðar, óþægilegur kliður í stórum og berum sal. Maturinn í góðu lagi en ekkert rosalegur, humarinn reyndar mjög fínn.

25. febrúar 2010

Þorði ekki út í ófærðina fyrr en Jón sótti mig seinni partinn til að hitta Kalla og Óðinn í bjór. Óðinn skrópaði reyndar, og bjórinn teygðist í léttan mat og hljómleika á Rosenberg. Við Kalli hlustuðum á Árstíðir, auðvitað ekki alveg mín „deild“, en talsvert áheyrilegri en ég átti von á og betri á hljómleikum en á plötu, eins og svo oft áður. Kannski finnst mér einfaldlega skemmtilegra á hljómleikum…

24. febrúar 2010

Sá Bjarnfreðarson og Desember í kynningarátaki fyrir Edduna, svo sem ekkert yfir mig hrifinn, en samt, kannski ákveðinn áfangi fyrir íslenska kvikmyndagerð að miðlungsmyndir eru orðnar talsvert betri og frambærilegri en fyrir nokkrum árum.

23. febrúar 2010

Sambindisfundur hjá Tomma.

20. febrúar 2010

Fyrstu hljómleikar Fræbbbla með Gumma sem trommara, Gummi smellpassar í hljómsveitina en hljómleikarnir hefðu mátt ganga betur, samt ekkert stórslys, fullt af nýju efni.

19. febrúar 2010

Bjórsmökkun og póker hjá Staka, heppnin heldur betur með mér þegar ég vann Viðar í lokauppgjörinu.

15. febrúar 2010

Tuttugu ára afmæli Siðmenntar, mætti í kaffi.

8. febrúar 2010

Fimmtíu og eins árs. Gerði ekkert í tilefni dagsins, mætti auðvitað í postulafótboltann.

6. febrúar 2010

Fjölskyldu þorrablót hjá Öggu með frænkunum Öggu Hrönn og Elínu ásamt eiginmanninum Guðmundi. Skemmtilegt kvöld og fín tilbrigði við hefðbundna þorramatinn.

5. febrúar 2010

Fórum með Brynju og Kalla á Faust í Borgarleikhúsinu. Vissulega talsverð vonbrigði enda væntingarnar miklar. Innihaldið er, og hefur alltaf verið, ansi þunnt og í mesta lagi efni í stuttmynd. Leikaratalandinn allt of yfirþyrmandi og ég er ekki að kaupa að hann þurfi að vera til staðar þó þetta sé gamalt verk. Vissulega ofsalega flott „sýning“ en æfingarnar með net og hjólastóla bæta í rauninni engu við efnið.

Síðan á Tapas barinn, sem var troðfullur þó við værum seint á ferðinni. Fínn matur, slappt og allt of dýrt vín og einhvern veginn hafði maður á tilfinningunni að þjónustufólkið væri orðið svolítið lúið.

Kristín kíkti með Enzo úr fjölskyldumatarboði og leiðin lá á Ölstofuna og þaðan til Andreu á Dillon.

30. janúar 2010

Fórum á Hótel Holt í boði Staka frá fimmtugsafmælinu. Mjög fínt, en kannski ekkert svo frábært eins Holtið var alltaf í gamla daga, kannski dauft vín að gera útslagið og ofeldaður humar. Eða að við erum orðin svo góðir kokkar ásamt öllum eldunarfélögunum…

Smá pöbbarölt á eftir, Balthazar lokaður, svo á Ölstofuna, en Kristín var ekki „heima“ – en enduðum á að kíkja á Andreu á Dillon

29. janúar 2010

Alli, Friðjón, Maggi, Palli og Venni kíktu í spil, Atli, Dabi og Jonni voru með..

23-24. janúar 2010

Einifells hittingur hjá Íslandsdeild GoutOnVa. Horfðum á Ísland – Danmörk og sáum hálfa Luxemborgardeildinga á leiknum. Heimabakaðar flatkökur, heimareykt hrátt hangikjöt, reyktur áll, Foie Gras, Marókanskur kjúklingur, steiktur Mozzarella, kavíar í Avocado, súkkuðlaðihúðuð jarðarber, ricotta eggjabaka, ostaveisla og eitthvað meira.

Petanque í flóðljósum og heitur pottur í brunagaddi.

22. janúar 2010

Horfðum á Alla (hjá Staka) keppa í WipeOut, með „Stökum“, á Spot, kíktum heim í smá rauðvín á eftir.

15.-17. janúar 2010

Sambindið fór ásamt eiginkonum í helgarferð á Skóga sem nokkurs konar sameiginlega fimmtugsafmælisgjöf frá okkur til okkar. Við leigðum rútu og byrjuðum á að heimsækja höfðingjann Rafn, föðurbróður Höskuldar, að Bræðrabóli í stutt spjall við Rafn og Guðmund frá Núpi undir léttum veitingum.

Við vorum komin að Skógum undir kvöld, fengum hótelið fyrir okkur og byrjuðum á „dönsku“ jólahlaðborði sem Raggi Sverris í Höfðakaffi hafði útbúið fyrir okkur – heitur pottur og ostar um kvöldið. Skemmtilegt lítið hótel sem við eigum örugglega eftir að heimsækja aftur.

Laugardagurinn fór í gönguferð, sem ég sleppti en undirbjó fiskisúpu á meðan. Síðbúinn hádegismatur, meiri pottvera og kvöldmatur sem við Höskuldur elduðum að mestu undir stjórn Höskuldar, laxatartar, maukelduð lambalæri og súkkulaðikaka að ógleymdu Madeira frá 1959 sem Höskuldur hafði fundið.

Heim á sunnudegi eftir alvöru morgunmat.

Sylvía, tengdamamma átti afmæli, og fjölskyldan mætti í mat í Austurbrún undir kvöld.

9. janúar 2010

Postula uppskeru hátið, frábært kvöld eins og alltaf, hefði kannski verið óvitlaust að hætta eitthvað fyrr.

1. janúar 2010

Nýársdagur, rólegur að venju, Brynja, Kalli, Rakel, Tómas og Agla kíktu í svínabóg, Auður og Steini stungu nefinu inn um kvöldið.

Nokkrar myndir frá jólum, jólaundirbúningi og áramótum hér.

2009

31. desember 2009

Áramótin í Austurbrún að venju, frábært matur og skemmtilegt fólk, þarf ekki meira… Slepptum að halda partý í Kaldaselinu, enda búin að vera döpur mæting síðustu árin, saknaði þess nú kannski samt aðeins…

30. desember 2009

Áramót Iðunnar í Bridge, okkur tókst að vinna annað árið í röð, eiginlega merkilegt því við erum nánast alveg hætt að spila. Kannski hjálpar til að það er minni vinna að hugsa um mótið en oftast áður.

28. desember 2009

Jólamót Jonna í skák haldið í fjórtánda skipti, eftir árs hlé. Stefán Freyr komst ekki og Guðjón vann eftir að Ómar hafði sýnt mótspyrnu, annars 10 manns og alltaf skemmtilegt mót.

27. desember 2009

Eins og ekki sé búið að vera nóg um veisluhöld þá voru Þóra Kata og Nonni að skíra dótturina Laufeyju Rós og Hafsteinn bróðir Magnúsar bauð okkur í mat. Veisluhlaðborðið í Fögrubrekkunni sveik ekki, eða réttara sagt, það var næstum því búið að fara illa með okkur því það var erfitt að éta ekki á sig gat, vitandi af matarveislu um kvöldið. En skírnin var fin, presturinn ekkert að gera annað en hún átti að gera, jú kannski pínulítið hár hallærisstuðull á henni, en ég er jú með óvenju lágan þröskuld. Og eftir örlitla pásu tók við þetta líka svakalega matarboð hjá Hafsteini og Jónu, leikurinn hófst með súpu, fylgt af rjúpu & önd og þegar við stóðum á blístri kom ostakaka, súkkulaðikaka og ís. Öllu þessu fylgdu svo drykkir við hæfi.

26. desember 2009

Svínabógur í Auturbrún með fjölskyldu Iðunnar, að venju á annan í jólum, skemmtilegt kvöld.

25. desember 2009

Jóladagsveisla í Kaldaseli hjá minni fjölskyldu, hangikjöt og eplakaka. Eiginlega nokkurs konar samkeppni milli nokkurra hangikjötstegunda, kjötið sem Steini reykti frábært og bar af aðkeypta kjötinu, en ekki frá því að læri af veturgömlu sem Helgi kom með hafi haft vinninginn, kjötið sjálft amk. betra, þó Steini vinni reykbragðskeppnina í mínum bókum.

24. desember 2009

Óvenju rólegur aðfangadagur, jólagrautur í hádeginu, kalkúnn um kvöldið. Magnús og Sylvía í mat hjá okkur og maturinn sérstaklega vel heppnaður, kannski að graflaxinum undanskilum. Og jú, aðalvínið nokkur vonbrigði. En mjög fínt kvöld, enduðum á að spila Heilaspuna, ágætlega heppnað spil.

23. desember 2009

Hefðbundin Þorláksmessu Skötuveisla hjá Öggu, læt skötuna vera, eftir skelfilega reynslu við að smakk fyrir nokkrum árum, en saltfiskurinn sólþurrkaður og sérstaklega góður. Kláruðum jólagjafakaupin í fámennri Kringlunni um kvöldið.

21-23. desember 2009

Undarleg veikindi, vakna frekar illa haldinn og slappur fram eftir degi, svo lagast þetta og orðinn fínn um kvöldið, þrjá daga í röð.

20. desember 2009

Einhver veikindi að hellast yfir, sem betur fer væt útgáfa, kíkti upp í kirkjugarð með fjölskyldunni.

19. desember 2009

Jólaboð hjá Halla og Steinu, frábær matur og skemmtilegt kvöld, einhver slappleiki að hrjá mig og við entumst ekki lengi.

18. desember 2009

Stúdentsútskrift hjá Sylvíu Dagmar, flott veisla að hætti foreldranna.

14. desember 2009

Síðasti tími postulanna, Bjössi vann í þriðja skipti, ég hef aldrei verið eins neðarlega og fæ vestisumsjón á næsta tímabili

12. desember 2009

Mættum fyrir hádegi á Hótel Heklu í fertugsafmæli Friðjóns, þrælskemmtilegur dagur, með mat, drykkju, leikjum, heitum potti úti í kuldanum, enn meiri mat og frábærum vínum.

11. desember 2009

Fínt jólahlaðborð hjá Mílu, gaman að hitta þá sem vinna á sama stað utan vinnu, ansi mörg ný andlit samt..

8. desember 2009

Fræbbbla-æfing, Gummi orðinn mjög klár, bæði á nýja og gamla efninu, þurfum að fara að spila.

6. desember 2009

Kíkti á jólatónleika Karla- og Kvenna- og barnakóra Kópavogs, kom eiginlega á óvart hvað þetta var vel heppnað, þó lokalagið væri í lengri kantinum.

5. desember 2009

Matarklúbburinn GoutOnVa nýtti tækifærið fyrst Krissi & Rúna eru á landinu. Byrjuðum í alvöru Sauna á Mógilsá, svo á jólatónleika Kvennakórs Reykjavíkur og að lokum heim í Kaldasel og svakalega át- og drykkjarveislu. Foie Gras og Whisky grafinn lax að hætti Rúna í forrétt. Afrískur lambaréttur undir stjórn Stínu í aðalrétt en við einfaldlega gleymdum eftirréttinum. Mörg flott vín, Guelbenzu hvítvínið fór ágætlega með forréttunum og hvert rauðvínið öðru betra, ValSotillo það sérstakasta, hrikaleg lyktin en ekki allir sammála um hvort það væri einfaldlega í lagi. Nokkrar myndir hér.

3. desember 2009

Staki flutti sig upp á Jörfa til Mílu og svo í jólaboð Sensa, mjög flott boð og glæsilegar veitingar. Fórum á Dauðasyndirnar í Borgarleikhúsinu með GoutOnVa og á Kringlukrána á eftir.

En Dauðasyndirnar sérstaklega skemmtilegt og réttlætti kaupin á áskriftarkortinu, örugglega ekki allra, en við vorum mjög ánægð, flott sýning.

2. desember 2009

Fræbbblaæfing, Gummi búinn að ná 39 lögum með okkur, gengur ótrúlega vel og þurfum að koma okkur í að spila.

1. desember 2009

Efast á pöbbnum um kvöldið, alltaf skemmtilegt að hitta þennan hóp.

30. nóvember 2009

Fótbolti með Postulunum eins og alltaf á mánudagskvöldum, bjór á eftir, eins og alltaf á mánudagskvöldum.

21. nóvember 2009

Brynja & Kalli kíktu í eldamennsku og Alli kom í mat. Þórhallur kom svo í spil.

20. nóvember 2009

Jólamatur hjá Staka, mættum í fordrykkinn, og fórum svo með Assa & Stínu og Auði & Steina á Fjölskylduna í Borgarleikhúsinu. Svo til Assa & Stínu í alls konar mat, Lúðuturn, bakaður geitaostur á epli, reyktur lax, quasidillas, gæsapaté, lárpera…

Leikritið talsverð vonbrigði, leikararnir stóðu sig reyndar frábærlega og leikmyndin var mjög flott, en það er eitthvað að ef maður eru mikið að velta leikmyndinni fyrir sér. Sýning tók tæpa fjóra tíma með tveimur hléum, og efnið frekar þunnt, klisjukennt og staðlaðar persónur.

Kannski pirraði mig líka hvað fólk er tilbúið að kútveltast um úr hlátri af frekar ómerkilegum bröndurum. Samt alls ekki eins mikið og þegar áhorfendur voru að skellihlæja þegar ekkert fyndið var í gangi og átti ekki einu sinni að vera fyndið.

19. nóvember 2009

Hljómleikar hjá HFF á Bar11, skemmtilegur lítill staður, en rosalega vorkenndi ég þeim að drösla græjunum upp á aðra hæð. En ótrúlega fínt „sánd“ og skemmtilegir hljómleikar, lögin sem mér fundust veikari fyrr hafa batnað mikið.

14. nóvember 2009

Matur hjá Höskuldi og Sirrý, klikkaði ekki frekar en fyrri daginn.

13. nóvember 2009

Matur með vinnufélögum Iðunnar, partý í heimahúsi á eftir, samt frekar rólegt.

7. nóvember 2009

Frábær laxaveisla hjá Öggu í gær, laxinn í boði Helga.

6. nóvember 2009

Iðunn í vinnutengdri skemmtun, Halli, Kalli, Palli og Atli kíktu í spil til okkar Jonna.

1. nóvember 2009

Athafnastjóranámskeið hjá Siðmennt, Svanur fór yfir athafnir sem Siðmennt býður upp á, veit samt ekki hvort ég fer að taka þetta að mér.

31. október 2009

Fjölskyldumyndakvöld hjá Kidda og Gunnu, frænkurnar Agga Hrönn og Elín Hauksdætur mættu, vel heppnað kvöld.

30. október 2009

Spil hjá Brynju og Kalla enda Iðunn með vinnupartý heima, æfing og nudd (þar sem ég var rukkaður um 2.000 fyrir 5 mínútna sturtu)…

29. október 2009

Eftirvinnubjór með hópnum sem byrjaði hjá Símanum 2006, frekar slök mæting en gaman að sjá þá sem komu.

27. október 2009

Fræbbblaæfing og efasemdarhópur að hittast á pöbbnum.

24. október 2009

Viktor hinn tvítugi með afmælisveisluna hér í Kaldaseli, virkilega vel heppnuð veisla, nóg af fólki og veitingum. Byrjaði reyndar hægt þar sem hálf ættin sleppti því að mæta en hinn helmingurinn bætti vel upp og svo hófst partýið fyrir alvöru þegar krakkarnir komu. Ótrúlega flottir krakkar sem Viktor þekkir – og reyndar Addi og Jonni líka, því hann bauð vinum þeirra. Það lá við að við Iðunn færum hjá okkur við að hlusta á allt lofið í seinni ræðuna hans, já, mikill ræðumaður.

22. október 2009

Viktor tvítugur, afmælisveislan á laugardag, en pöntuðum pizzu (nánast óæta frá HH) og byrjuðum að undirbúa veisluna.

19.-21. október 2009

Heima veikur, eiginlega ekkert að mér, en samt að sálast – í öllu falli ekki svínaflensa, bara lítill hiti.

18. október 2009

Afmælisveisla hjá Hákoni, fjölskylda og sambindi í morgunhádegisverð. Rosalegar veitingar, eins og búast mátti við, og gaman að hitta fjölskylduna, ekki síst hvað foreldrar hans eru hress, ótrúlegt að mamma hans sé orðin áttræð.

17. október 2009

Ákváðum að opna Bertani Amarone rauðvínið sem ég fékk í fimmtugsafmælisgjöf, eðalvín og frábært að smakka svona vín, sem maður myndi seint tíma að kaupa sjálfur. Eldaði nautalundir víninu til samlætis og tókst alveg sérstaklega vel upp, eiginlega í fyrsta skipti sem ég næ nautakjöti svona góðu.

15. október 2009

Sambindisfundur hjá Tomma, lokið við að skipuleggja Skógaferð í tilefni af fimmtugsafmælum okkar.

14. október 2009

Sæunn orðin þrjátíu og níu ára, kaffi og veitingar að hætti Sæunnar.

10. október 2009

Notuðum loksins gjafakort sem ég fékk í fimmtugsafmælisgjöf frá fyrrum vinnufélögum Iðunnar, matur á Sjávarkjallaranum, alveg frábær, humar með Foie Gras, chili, blómkáli í forrétt, andabringa með Foie Gras, ís í aðalrétt og súkkulaðikaka (ekki með Foie Gras) í eftirrétt. Pommard vín með, svo sem allt í lagi, en ekkert sérstakt. Kíktum á Balthasar í boði Fritz á eftir, spiluðum smá Póker, sem ég tapaði en Iðunn vann til baka og gott betur.

4. október 2009

Fyrsta áskriftarsýningin í Borgarleikhúsinu, „Heima er best“, hefðum betur tekið heitið til okkar, því þrátt fyrir ágætis frammistöðu leikara þá var efnið einfaldlega svona fimm mínútna virði.

3. október 2009

Mætti í upphitun fyrir bikarúrslitaleikinn við Fram, Fræbbblar spiluðu þrjú lög og skipti væntanlega sköpum að bikarinn vannst.

30. september 2009

Stebbi er ekki lengur trommari Fræbbblanna, Gummi er tekinn við og eitt „b“ er dottið út.

25-27. september 2009

Sambindissumarbústaðaferð í Reykjaskóg, fórum seinni partinn á föstudeginum, frábær saltfiskur hjá Höskuldi um kvöldið, póker og þokkaleg tónlistarblanda fram eftir kvöldi.

Alvöru morgunmatur, kaffi hjá Bryndísi mágkonu Höskuldar, bolti og bjór á Lindinni á Laugarvatni og gufa. Grilluðum nautalund í brjáluðu veðri, smá upprifjun og svo meiri póker fram eftir kvöldi, en tónlistarvalið á köflum að gera út af við mig.

22. september 2009

Ný frænka komin í heiminn, Þóra Kata, dóttir Kidda og Gunnu að eignast sitt fyrsta barn, til hamingju Kata og Nonni!

19. september 2009

Sýning opnaði í Kópavogi, „Heilbrigð æska, pönkið og Kópavogurinn“, kom skemmtilega á óvart hvað þeim Pétri og Heiðu hefur tekist að safna saman miklu dóti og vel uppsett. Blóð, HFF spiluðu í tilefni dagsins, en þar sem Fræbbblarnir eru ekki starfandi tókum við Assi, Helgi og Iðunn nokkur lög með Gumma. Skemmtilegur hittingur heima um kvöldið.

18. september 2009

Pizza, bjór og pool með Staka á Spot, Fúsi vann mótið. Ætlaði að bíða eftir hljómsveitum á Austfirðingaballi en gafst upp eftir að hafa setið undir hroðalegri diskómúsík hátt í annan tíma.

16. september 2009

IBC búin… Samkvæmt fréttablaðinu þeirra mættu yfir 45.000 manns, aðeins um 7% fækkun. Sýnendurnir sem við hittum töluðu um þrjátíu prósent fækkun. En sýningin virkaði talsvert fámennari en áður, aðeins mismunandi eftir sýningarhöllum, og kannski í rauninni minna að sjá. Smá framfarir hér og þar og fyrirtækin að teygja sig lengra, en ekkert stórkostlegt eða nýtt, þrívídd reyndar alltaf að verða raunverulegri.

En okkar hlutverk gekk vel og talsvert af möguleikum, en auðvitað talsvert eftir til að vinna úr þessu.

Heimferð, alltaf hálf þreytandi flakk, vinnufundur hér heima seinni partinn, útgáfuteiti hjá kvikmyndaframleiðanda „Me And Bobby Fischer“ og æfing með Gumma trommara fyrir helgarspilamennskuna.

15. september 2009

Síðasti dagurinn á IBC, var á báðum áttum um að mæta, en ákvað að taka einn hring enn. Sá hringur var heldur betur fyrirhafnarinnar virði, fór svo aðeins í bæinn í árangurslítinn verslunarleiðangur, bjór á Cafe Belgique og matur með Viðari á Savini um kvöldið. Savini er mjög fínn, heimilislegur veitingastaður en alls ekki sami klassi og Vasso. Meiri bjór á Cafe Belgique og bjór á Leidseplein en okkur var ekki hleypt skilríkjalausum inn á Holland Casino.

14. september 2009

Mánudagur á IBC, nokkrir fundir og lausir endar, en aðallega að skoða mig um og leita að einhverju nýju. Rölti yfir götuna á ítalskan stað í hádeginu sem var svo sem allt í lagi og kíkti aðeins í bæinn í vindla, kveikjara og eitt og annað. Tveir bjórar á frábæra bjórstaðnum In De Wildemans og einn heimabruggaður (bókstaflega) á De Bekeerde Suster. Bjórinn farinn að flæða út um eyrun.

Fór með Viðari hjá Rúv að borða um kvöldið á kínverskum stað, kíktum á EuroPub en fundum engan, eftir smá ráp endaði ég á Holland Casino og fór heim 50 Evrum ríkari úr Pókernum.

13. september 2009

Skoðunardagur og nokkrir fundir á IBC, nokkur tækifæri til viðbótar. Jón fór heim og var aðeins að vandræðast, hinn ítalski Savini var stútfullur, fór á Gaucho, argentínskan steikarstað við hliðina. Vantaði ekki að steikin var frábær, sennilega ein sú besta sem ég hef lengi fengið, en verð samt að játa að ég er meira og meira spenntur fyrir hugmyndaríkri matargerð.

Ekki í stuði fyrir meira pöbbarölt og fór á Holland Casino, tapaði 10 Evrum í rúllettu sem ég veit ekki hvers vegna ég var að reyna, en vann 30 Evrur í Póker.

12. september 2009

Fimm fundir á IBC, gengur mjög vel þó þeir spiluðust ekki alveg eftir fyrirfram gerðri áætlun. En alls staðar jákvæð viðbrögð og fullt af tækifærum

Fórum á hinn franska og frábæra Van De Kaart um kvöldið, alveg sérstaklega góður matur, þriðja skipti sem ég mæti og alltaf fyrsta klassa matur.

Jón gafst snemma upp, ég fór á pöbbaflakk, byrjaði á að kíkja á pöbbinn sem samstarfsfélagarnir frá RTSoftware „búa“ á, svo á EuroPub, en hitti reyndar engan, fann ekki pöbbinn sem átti að vera varaskeifa, entist aðeins, en ekki lengi, og rölti svo inn á hótel, sennilega lengri leið en ég þurfti.

11. september 2009

Ferð til Amsterdam á IBC, gekk vel að komast á hótelið, vildu reyndar ekki breyta pöntuninni minni sem hin ömurlega Hotel Club vefsíða bókaði vitlaust, en þeirra hausverkur.

Kíkti svo aðeins á sýninguna, svona rétt að heilsa upp á fyrri samstarfsaðila og þá sem við höfum verið í sambandi við.

Fórum á Vasso um kvöldið, frábær ítalskur veitingastaður í hliðargötu af Klaverstraat, fjórða skipti sem ég mæti – og alltaf topp matur. Litum við á EuroPub og hittum nokkra samstarfsmenn, en entumst nú reyndar ekki lengi.

10. september 2009

Fræbbblarnir settir í óhjákvæmilegt hlé vegna samstarfsörðugleika, veit ekki hvað verður um framhald.

7. september 2009

Postuladeildin hófst í kvöld, hálf slappur og vont kvöld, en gaman að komnir aftur í gang.

5. september 2009

Æfing og smá nudd, opnun á málverkasýningu hjá Sigga Örlygs með tilheyrandi söng Unnar missti af fyrri hálfleik í landsleiknum við Noreg, grátlegt að ná ekki að vinna, spil hjá Kalla um kvöldið.

4. september 2009

Iðunn í sumarbústað. Fór á hljómleikaflakk. Byrjaði á Dillon að hlusta á HFF, rosalega þéttir og vel spilandi, sérstaklega framan af. Ef eitthvað var hefði söngurinn mátt heyrast betur. Dillon er reyndar vanmetinn hljómleikastaður, virkaði amk. mjög vel.

Stökk frá Dillon á Grand Rokk, missti af Blóð og Insol en náði Hellvar sem voru mjög flott, hef reyndar ekki séð þau eða heyrt oft á hljómleikum, en þetta bar af. Gæfi samt hægri (eða kannski bara vinstri) hendina fyrir að heyra þau með alvöru trommara.

Dr. Gunni var líka frábær, sennilega það besta sem ég hef séð til hans. Ekki svo að skilja að platan sé ekki góð, en lögin eru miklu betri „live“. Kannski mín sérviska, en sennilega er þetta frekar regla en hitt, mér finnst miklu skemmtilegra að heyra lög á hljómleikum en af plötum.

Aftur á Dillon þar sem Andrea sá um tónlistina og endaði með Árna Daníel og Rikka á Ölstofunni.

28.-30. ágúst 2009

Matarklúbburinn „GoutOnVa“ hittist á Einifelli hjá Auði & Steina. Við Iðunn mættum á föstudagskvöld en Assi & Stína og Krissi & Rúna mættu á laugardag. Ítölsk kjötsúpa og heitur pottur á föstudagskvöldinu.

Maturinn á laugardeginum byrjaði um hádegi og var svona nokkurn veginn: Parma skinka með cantalópu, sasumi þar sem maríulax Krissa var í aðalhlutverki, grillaður humar ala Einifell, Carpaccio með sveppa Parmesan mauki og Ruccola, kjúklingafyllt Canneloni með graskersfræsósu, sólþurrkaður saltfiskur að ítölskum hætti með ávaxtasalati, súkkulaðifrauð í bláberjahlaupi og Pecanhnetu Brownies – og á sunnudag Foie Gras, humarsúpa og sveppasúpa. Eitthvað var drukkið af eðalbjór, hvítvíni og rauðvíni – helst að nefna ValSoTillo rauðvínið, sem var einstök upplifun, þó ekki væri nema fyrir lyktina.

Steini vann bæði Petanque mótið og Fimbulfambið örugglega en mér tókst að vinna tveggja manna golfmótið okkar Steina. Að öðru leyti var tíminn notaður í heitan pott, mótorhjólaviðgerðir, sveppatínslu, berjatínslu, traktorinn, meiri heitan pott og loftbelgjasendingar.

22. ágúst 2009

Menningarnótt, rótuðum frekar snemma og reyndum að ná stemmingunni í borginni, svona einu sinni, Palindrome að spila við útitaflið á Lækjartorgi, ljósmyndasýning Gunnars Salvarssonar á Laugaveginum (fundum ekki fyrr en í annarri tilraun, leituðum að innganginum þar til Stína benti okkur á að sýningin væri utan á húsinu), kíktum á Pétur Gaut, stungum hausnum inn hér og þar, borðuðum á Segurmo (sem er víst, því miður, að loka), kaffi á Kaffifélaginu og Babalú (þar sem afgreiðslufólkið var full stressað), flugeldasýning og svo hljómleikar á Grand Rokk.

Hljómleikarnir á Grand Rokkk tókust einstaklega vel þrátt fyrir bassamagnarabilun, Palindrome áttu eina sína bestu hljómleika en saknaði þess að sjá ekki meira hjá MegaSukk… Nokkrar myndir hér.

21. ágúst 2009

Tvöfalt fimmtugsafmæli, Tommi og Helga, glæsileg veisla eins og við var að búast.

21. ágúst 2009

Æfing og kíkti svo á kotrumót, gaman að prófa og sjá og hitta andlit sem maður hefur ekki séð lengi..

16. ágúst 2009

Brynja og Kalli buðu okkur og Kristínu í saltfiskpasta með Sabin og syni hennar, Sidney – jú, og Rakel bauð upp á eftirréttakökuna. Gaman að hitta hana aftur og ekki verra að hún benti á mögulegt sumarhús í Toscana sem dóttir hennar leigir, hvort og hvenær sem við getum farið þangað.

15. ágúst 2009

Bryndís & Palli, Halli & Steinunn og Jón & Gyða kíktu í mat, allir úr sitt hvorri áttinni en small ótrúlega vel saman. Eðal rauðvín, og allt í lagi rauðvín, hvítvín og bjór, frábær kjúklinga caneloni í forrétt.

14. ágúst 2009

Kristín kom í heimsókn með eðal púrtvín og hélt svona nokkurs konar annan í afmæli með tilheyrandi osta- og sultuáti. Brynja og Kalli kíktu þegar á leið.

13. ágúst 2009

Fjölskyldumyndataka hjá Iðunnarfjölskyldu í Austurbrún, nokkur dæmi hér.

7.-9. ágúst 2009

Fiskidagsferð, myndir hér. Við fengum íbúð með litlum fyrirvara og ég fór með systkinunum Öggu og Kidda – og Magga mág. Mættum í 23 stiga hita á föstudagseftirmiðdag, byrjuðum að skoða nýja menningarhúsið og svo bjór utanhúss. Smá snarl í boði Öggu áður en við fórum á fiskisúpukvöldrölt, frábær súpa hjá Júlla og Agga dró okkur á Sunnuhvol þar sem fjölskylda Rúnars Júl var með einhvers konar blöndu af partý og hljómleikum.

Mættum tiltölulega snemma á laugardaginn, prófuðum fisk frá hinum og þessum, en gáfumst upp á biðröðinni hjá Friðvik V., keyptum bókina þeirra Finnboga (og Júlíusar) til að bæta fyrir. Gaman að sjá Kidda spila, Herdísi konuna hans í kór og Hvanndalsbræður.

Toppurinn var nú samt að bærinn hafði ákveðið að heiðra afa í þetta sinn, en þeir heiðra alltaf einn Dalvíking á Fiskideginum. Heimir tók við viðurkenningunni og Níels var ekki langt undan.

Meira flakk um kvöldið, kíktum á bryggjusöng og flugeldasýningu – hittum Öggu og Elínu, fórum í heimsókn til Vals, sem var ekki í landi síðast þegar við komum, enduðum á bar, Pizza Vero, reyndar að mestu utan dyra.

2. ágúst 2009

Brynja og Kalli og Agla Margrét kíktu í heimsókn.. „Rib eye“, ís og Whisky.

1. ágúst 2009

Maggi sextugur fyrir viku og var að koma heim frá Berlín og Kaupmannahöfn, plötuðum hann til Góu þar sem fjölskyldan faldi sig inni í búri og bauð upp á óvænta afmælisveislu…

31. júlí 2009

Árni Daníel fimmtugur, virkilega flott veisla í Skólabrú og gaman að hitta fjölskylduna hans loksins, enduðum á smá flakki, allt of mikið labb fyrir minn smekk og botninn datt úr kvöldinu..

29. júlí 2009

Fyrirfram-afmæli hjá Magnúsi í Austurbrún, öll börn og öll tengdabörn, eitthvað af barnabörnum og jafnvel eitt tengdabarnabarn.

28. júlí 2009

Afmæli hjá Þóru, mátti alveg slafra í sig Osso Buco pottréttinum, já, og súkkulaðikakan hans Kára var alveg æt.

25. júlí 2009

Maggi sextugur í dag, en að heiman. Mættum í mat hjá Bryndísi, frábær matur og skemmtilegt kvöld, „vinyl“ þema og ég fann tvo kassa af litlum plötum niðri í kjallara.

24. júlí 2009

Afmæli hjá Kristínu á Tryggvagötunni.

23. júlí 2009

Magnús og Sylvía kíktu í spaghetti

18. júlí 2009

Afmæli hjá Kidda í Fögrubrekku, átum yfir okkur af lambalærum, að ógleymdum örlitlu af bjór og víni… myndir seinna.

16. júlí 2009

Auður og Steini kíktu í heitapottrannsóknir, enduðum í mat í Reynigrundinni.

11.-12. júlí 2009

Kíktum til Auðar og Steina á Einifell, nokkurs konar golf, Petang, nautasteik, hamborgarar, Pastis, bjór, rauðvín, Foie gras, hvítvín, Sangria og …

10. júlí 2009

Tvítugsafmæli hjá Heklu, skemmtileg garðveisla með grilli og tilheyrandi.

4. júlí 2009

Maggi, Dísa, Helgi og Kristín kíktu á okkur…

3. júlí 2009

Matur í Austurbrún, sátum úti fram eftir öllu að eta, drekka og …

2. júlí 2009

Póker vinir Iðunnar kíktu í heimsókn, humar, bjór, hvítvín og Whisky.

27. júní 2009

Brynja, Kalli, Sæunn, Friðjón, Hákon og Hjördís kíktu á okkur, virkilega skemmtilegt kvöld.

26. júní 2009

Sylvía Dagmar tvítug, hún sem fæddist næstum því í gær.. en flott veisla á Oliver.. enduðum á að hitta Kristínu á Ölstofunni með Ásgerði og Dagmar.

20. júní 2009

Útskriftarveisla hjá Lilju, frábærar heimatilbúnar veitingar að venju í boði foreldranna. Spil með hjá Kalla með Alla, Halla og Palla um kvöldið.

14. júní 2009

Alli, Halli, Palli kíktu í spil með okkur, Viktor vann bæði mótin.

13. júní 2009

Kata að útskrifast frá HR, skemmtileg útskriftarveisla og maturinn frá Red-eitthvað – sem ég man ekki hvað heitir nákvæmlega – frábærar. Brynja, Kalli, Agla, Kristín og Svanhildur í heimsókn um kvöldið.

11. júní 2009

Bjór og rauðvín á barrölti með Jóni Einars, gaman að hittast eftir nokkuð langan tíma og uppfæra „stöðuna“ – þrælskemmtilegt kvöld.

8. júní 2009

Flug frá Charles de Gaulle klukkan átta. Fríð búið. Við áttum samt eitt ævintýri eftir. Við lentum í þeirri ótrúlegustu lífsreynslu sem við höfum upplifað. Leigubílstjórinn sem keyrði okkur út á flugvöll afþakkaði allt þjórfé! Sagði að það væri óþarfi.

7. júní 2009

Aftur leyfðum við Rúnu að ráða ferðinni og fórum upp að kirkjunni fyrir ofan hótelið. Einn bjór og svo á Dali safnið sem kom skemmtilega á óvart, sérstaklega skúlptúrarnir. Duttum svo inn á götukynningu frá Périgord (muni ég rétt) þar sem endalaus vín, „foie gras“, trufflu-sveppir og vín voru á kynningu. Létum okkur hafa að kaupa nokkur sýnishorn til að fara með heim. Tókum hádegismat þar sem við fengum böku sem hafði verið drekkt í geitaosti… ekki gott. En Krissi og Rúna þurftu að fara eftir þetta og við fórum að skoða Grand Arche (við La Défense). Merkileg bygging og sennilega fínt útsýni en grenjandi rigning og skyggnið frekar lélegt. Í byggingunni er reyndar tölvusafn, ekkert rosalega merkilegt en amk. eitthvað fyrir mig, samt skelfilegt að sjá að sumt af því sem ég er að nota er komið á safnið, og mjög stórt hlutfall sem ég hef einhvern tímann komið nálægt…

Við ákváðum svo að við værum búin að fá nóg af frönsku línunni í eldamennsku. Sennilega fínt ef hráefnið er fyrsta flokks og kokkurinn kann til verka, en ef annað hvort er ekki í lagi þá er þetta eiginlega hálf breskt, þurrt, bragðlaust og lítið spennandi. Þannig að við ákváðum að treysta á ítalska matargerðarlist og fundum stað sem heitir Fellini í miðborginni. Og hann klikkaði svo sannarlega ekki. Kannski ekki alveg gefins, en maturinn frábær og meira að segja staðurinn nokkuð flottur, þemað var (ótrúlegt en satt) Fellini. Tókum reyndar frekar ódýrt rauðvín, Masi Valpolicella, en alveg í lagi. Á næsta borði var svo eldri maður, nánast á grafarbakkanum, með ungri konu – sem, nei, virkaði ekki eins og hjákona – og þegar þau fóru höfðu þau varla hellt nema niður að hálsi úr sinni flösku. Við vorum að velta fyrir okkur að hjálpa þeim að klára, enda ekki hægt að láta svona vín (frá Sardiníu) fara til spillis. En sem betur fer vorum við ekki farin að gera mikið í málinu því þau komu aftur eftir tuttugu mínútur eða svo… En kláruðu samt ekki vínið.

6. júní 2009

Krissi og Rúna mættu í morgunmat, komu með lest frá Luxemborg, nýbúin að eiga silfurbrúðkaupsafmæli. Rúna stýrði röltinu um miðbæinn, latínuhverfið, eyjarnar á Signu og inn á veitingastaðina. Fengum þokkalega önd og kjúkling í hádeginu og ágætis rauðvín. Nú móðga ég örugglega bæði Englendinga og Frakka, en einhvern veginn fannst mér París minna óhugnanlega mikið á London, þeas. þegar við vorum ekki við einhverja af stóru byggingunum eða minnisvörðunum. Ef skiltin í litlu götunum hefði verið á ensku hefði alveg mátt ljúga að mér að við værum þar. En mikið helvíti er bjórinn dýr. Átta Evrur á eyjunum á Signu og 5-6 annars staðar. Ekki nóg með að gengið sé óhagstætt heldur hefði þetta þótt góður biti 2007. Skítakuldi eina ferðina enn. Fórum svo tiltölulega snemma upp á hótel enda mæting rétt fyrir átta í siglinguna.

Byrjuðum kvöldvaktina á kojufylliríi með kampavíni og foi gras úr kjörbúðinni. Síðan sigling og matur á Signu. Fyrsta flokks veitingastaður og umhverfið og útsýnið fullkomlega ógleymanlegt. Við Rúna völdum nautakjöt en Iðunn og Krissi önd sem aðalrétt. Við báðum um nautið rautt þrátt fyrir að þjónninn legði til „medium“ og svo kom kjötið nánast „well-done“. Við báðum um leiðréttingu, sem var sjálfsagt, en kannski þolir kjötið ekki að vera minna eldað því satt að segja hafði það bragðast betur þannig. En forréttirnir, vínið, eftirréttirnir, ostarnir og Cognacið stóðu fyrir sínu. Og útsýnið og stemmingin, já… búinn að nefna það.

Tókum bíl upp á hótel og fórum á pöbbarölt. Fyrstur á dagskrá var írski barinn sem við Iðunn fundum og í þetta sinn hefði ég verið til í þögn frekar en tónlistaratriðið sem var í boðið, einn „ofsahress“ söngvari með gítarleikara sem skiptust á að leika undir. Sennilega nýkomnir úr lestargöngunum og hefðu mátt halda sig þar. En reyndum nokkra bari í viðbót og vorum svo aftur komin að Circle Casino. Fyrir rælni ákvað ég að spyrja, og jú, jú, þetta var alvöru Casino eftir allt saman. Flestir voru reyndar í einhverju undarlegu spili þar sem einn leikmaður skaut kúlu eftir einhverju sem líktist billiard borði og að lokum datt kúlan inn á hjól með tölum, ekki ósvipað rúllettu, en einhver blástur virtist vera á hjólinu því kúlan veltist fram og til baka milli talna áður en hún ákvað að setjast að. Í kringum þetta sátu nokkrir tugir manna og voru mjög áhugasamir. Ég ákvað að spila póker en Iðunn var full þreytt og Krissi og Rúna fóru fljótlega heim. Hef svo ekki spilað póker oft í Casino en þetta var í fyrsta sinn sem ég fer út í mínus og það þrátt fyrir að vita að ég átti að hætta fyrr, var einfaldlega orðinn allt of þreyttur…en ekki svo stórt tap og enn í góðum plús.

5. júní 2009

Í gamla daga hefði ég „fussað og sveiað“ yfir hugmyndinni að fara að skoða Eiffel turninn og það eru örugglega ellimerki að vilja fara í svona túristaferð. En við létum okkur hafa endalausa biðröð í nístingskulda og vorum frosin í gegn þegar við loksins komumst upp. Fyrsta verk var heitt súkkulaði á kaffiteríunni á annarri hæð. Fórum upp á topp og létum okkur hafa að skála í kampavíni. Og satt að segja er þetta ótrúlegt mannvirki. Bæði er útsýnið yfir borgina stórkostlegt, en ekki síður gaman að skoða bygginguna. Þetta er nógu stórt í dag, en að byggja þetta í lok nítjándu aldar með þeim tækjum og tólum sem þá voru til hefur verið þrekvirki. Og að geta á þeim tíma boðið upp á þetta útsýni yfir París, þegar enginn hafði komið í flugvél, hlýtur að hafa verið einstakt.

En þetta tók yfir fjóra tíma og við fengum okkur snigla, lauksúpu og skinku á stað nánast við hliðina. Nýjasta aðferðin við að hafa peninga af fólki er að kasta hring á götuna rétt hjá því, þykjast finna hann, segja að hann sé úr gulli og vilja fundarlaun – eða gefa hann og bjóðast til að þiggja smá upphæð að launum – eða kannski reyna að komast í vasana hjá viðkomandi meðan hringurinn er skoðaður. Þetta var orðið svolítið spaugilegt þegar fjórði strákurinn „fann“ sams konar hring rétt við tærnar á okkur á sömu tíu mínútunum.

Jói hafði mælt með veitingastað ekki langt frá hótelinu, Bouillon Chartier, þar sem gestum er blandað saman á borðin, og maturinn sagður mjög fínn. Eftir um hálftíma gönguferð kom í ljós að staðurinn var lokaður vegna endurbóta. Við fundum stað sem okkur leist þokkalega á, Carpediem, fínn forréttur, fínt vín og góð þjónusta, en aðalrétturinn frekar ómerkilegur. En vínið sem sagt fínt, Bourgogne, máttum fá flösku og drekka eins mikið eða lítið og við vildum og borga aðeins fyrir það sem við drukkum. Kláruðum auðvitað flöskuna. Vorum hálfþreytt og fórum frekar snemma upp á hótel, horfði löngunaraugum á Circle Casino og óskaði þess að þetta væri Casino. Röltum reyndar aftur af stað og fundum ágætis írskan bar fyrir svefninn, alveg þokkalegur trúbadúr að spila.

4. júní 2009

Sorrento með Hákoni og Hjördísi, flugvöllur og samlok. Róm í kvöld… byrjuðum á að þiggja far hjá hótel starfsmanni niður í bæ, tókum rútu til Sorrento og hittum þar Hákon og Hjördísi, sem buðu okkur í þennan lika flotta hádegismat. Það hlaut einhvern veginn að vera að við hittum Hákon, hann var stöðugt að dúkka upp þegar við vorum með Dísu og Magga í Róm. En svo lest til Sorrento og önnur til Rómar. Þar tók við rútuferð út á flugvöll sem hafðist á góðum tíma og við vorum komin til Parísar um ellefu leytið. Hálf svöng enda ekki búin að borða yfir okkur eins og hina dagana þannig að við fundum lítinn bar þar sem ung stúlka vildi allt fyrir okkur gera, átti bara brauð í eina samlokun, en smurði fyrir okkur þessa fínu samloku eftir að hafa ráðfært sig um hvora tegundina af smjöri við vildum, af þeim fyrsta flokks tegundum sem hún hafði í boði.

Hótelið var í Montmartre og í götu sem var smekkfull af súlustöðum og börum með sýningum við hæfi. Sáum reyndar eitt merkt Casino, Poker, og ákváðum að kíkja aðeins við. Spurðum næturvörðinn á hótelinu hvort ekki væri í lagi með staðinn og hann varð hálf kindarlegur á svip, ræskti sig og sagði að þetta væri eiginlega ekki Casino. Hann ætlaði aldrei að koma orðum að því hvað væri þarna en játaði þegar ég spurði hvort þarna væri „bordello“. En klukkan orðin margt og ansi langt ferða lag að baki þannig að við sögðum þetta gott.

3. júní 2009

Nú var siglt til Capri og við vorum samferða bandaríkjamanninum Reed niður á höfn – þangað sem starfsmaður hótelsins skutlaði okkur á sínum einkabíl – og í bátnum. Sá hafði ferðast talsvert og ráðlagði okkur að finna nokkur atriði og gefa þeim tíma frekar en að reyna að fara á hlaupum yfir sem mest, bæði á Capri og í París. Skondið að sjá rúturnar allar illa rispaðar á báðum hliðum, benti til að ekki væri mikið svigrúm á fjallvegunum. Við ákváðum að fara til Anacapri og upp á topp í nokkurs konar skíðalyftu, þeas. stök sæti sem eru toguð í kapli upp á topp. Útsýnið þar sveik ekki og maturinn í Anacapri fínn en verðið jafnvel enn hærra en í Amalfi. Og þegar við komum niður var verðið á bjór 6 Evrur við höfnina, þannig að við spurðum hvað hvítvínið kostaði, þjónninn þóttist ekki vita það í fyrstu, kom svo með lista sem sagði 5,50 fyrir hálfan lítra þannig að við pöntuðum, enda prýðilegt útsýni út á sjó. En þá dró hann upp annan matseðil þar sem verðið var komið upp í 7 Evrur. Ekki svo að skilja að ein og hálf Evra hefði skipti sköpum fyrir fjárhaginn, en þetta fór nægilega illa í taugarnar á mér þannig að við kvöddum án þess að fá að drekka. Held að ástæðan fyrir að ekki er varað við vasaþjófum á Capri sé að veitingastaðirnir ryksuga alla peninga af ferðamönnum áður en tilvonandi þjófar komast að. Ekki bætti úr skák hversu ágengir þjónarnir eru úti á götu, það er ekki hægt að koma innan við tíu metra frá stað án þess að bókstaflega sé reynt að draga mann inn að panta eitthvað.

Okkur tókst að sólbrenna lítillega á Capri, enda orðin óvön öðru en rigningu og slagviðri. Fórum aftur á Memé um kvöldið, ætluðum reyndar á annan stað við hliðina, sem hafði tapað túkallsuppkastinu kvöldið áður, en sá staður var lokaður þegar við mættum. Sennilega hefur eigandinn verið á framboðsfundinum sem haldinn var á aðaltorginu í Amalfi. En, þó maturinn væri fínn, var hann ekki alveg í sama klassa og áður, kannski aðallega vegna þess að ég pantaði grillaðan „seabass“ (Sæbrima?) sem var fiskur dagsins og átti að vera ferskur en ég hef oftast fengið hann betri og ferskari á strödinni við Benalmadena á Spáni.

2. júní 2009

Ætluðum til Capri og planið var að hitta Hákon og Hjördísi þar, en það var ekki siglt vegna veðurs og of seint að komast til Pompeii. Við skiptum yfir í heimsækja-Ravello planið og dóluðum okkur þar fyrri hluta dags í grenjandi rigningu. Ekki gleyma ótrúlegri þjónustunni á hótelinu, þegar við báðum þau að hringja á leigubíl fyrir okkur til að komast niður í bæ sögðu þau okkur að doka aðeins við, og einn starfsmaðurinn skutlaði okkur á sínum bíl. Í Ravello fundum við veitingastaðinn Figli di Papá, enn einn topp veitingastaðurinn í ferðinni, við erum eiginlega eins og hlustandi sem er alltaf sammála síðasta ræðumanni, við erum alltaf sammála síðasta kokknum. Fundum svo enn einn staðinn um kvöldið Memé, örlítið falinn í hliðargöngustíg, en maturinn ekkert til að fela. En lítið um að vera og fórum snemma á hótelið. Kaffi og líkjör og hótelstjórinn sagði okkur að lítið væri varið í bláu hellana á Capri, „emerald“ hellarnir við Amalfi væru miklu tilkomumeiri, bláu hellarnir væru „tourist rip-off“.

1. júní 2009

Byrjuðum að rölta um borgina án stefnu, reyndum að finna pizzustað sem Agga systir mælti með, en eitthvað fór heimilisfangið á milli mála og amk. engin pizzustaður þegar við mættum. Var að láta betlarana fara í skapið á mér, svo sem allt í lagi að rétta þeim sem sannanlega eiga bágt einhvern pening og líka allt í lagi að gefa þeim pening sem leggja sig fram um að skemmta (þannig séð) til dæmis með því að spila. En þegar unglingar í merkjavöru setja allt í einu upp skælusvip upp úr þurru, rétta fram plastglast og biðja um pening fékk ég eiginlega nóg. Lét samt nægja að bölva þeim í hljóði. Við fengum okkur svo mjög gott pasta í hádeginu á sama stað og pizzurnar daginn áður og fórum að finna CircumVesuviana lestina til Sorrento. Þegar til Sorrento kom var rútan til Amalfi troðfull, þurfti að taka töskurnar út og bíða eftir næstu rútu. Hún fylltist strax en við náðum inn og við tók hátt í tveggja tíma rútuferð í troðfullri rúti í fjallshlíðum Amalfi strandarinnar. Hákon og Hjördís voru í Amalfi og það munaði einhverjum 5-10 mínútum að við næðum að hitta á þau. En þetta er víst fríhelgi og þess vegna var allt fullt þarna. Hótel Dei Cavalieri allt í lagi, herbergið lítið og sturtan sú minnsta sem ég hef fengið, en þau buðu reyndar upp á betra herbergi fyrir litla viðbót. Smá labb niður í móti niður í bæ og fundum nokkuð góðan ítalskan stað, Iðunn pantaði þrjá rétti og var að venju pakksödd eftir þann fyrsta og skildi megnið af hinum eftir. Íslensk rigning um kvöldið og lítið um að vera þannig að við fórum snemma upp á hótel.

31. maí 2009

Kominn tími á Napolí. Höfðum hugsað okkur að sleppa því að stoppa þarna, en það var smá rugl með hótelið í Amalfi, sem var ekki laust fyrr en á mánudag, þannig að við tókum eina nótt í Napolí. Klukkutíma lestarferð frá Róm og okkur fannst engu logið um ruslið þegar við mættum og borgin frekar minna til dæmis á Kaíró en Evrópska borg, jæja, kannski smá ýkjur. En ruslið hafði sennilega fokið af útimörkuðum og var reyndar þrifið um kvöldið, svona að mestu. Höfðum heyrt að við yrðum að panta pizzu í Napolí, hvað við gerðum á staðnum á móti hótelinu, og satt að segja mjög sérstök. Engin „tómatsósa“ en engu að síður mjög fín fyrir minn smekk en Iðunn var ekki að kunna að meta sína eins vel. Fórum niður í bæ og sáum þá allt aðra borg, hefðum skoðað betur ef ekki hefði verið grenjandi lárétt rigning að íslenskum hætti. En fundum La Cantinella ekki langt frá höfninni og fengum mjög fínan mat. Völdum einfalt rauðvín en sáum að staðurinn státaði af því að vera með einn af tíu bestu vínkjöllurum Evrópu. Og sagðist vera með útibú á Capri. Einn bjór á litlu kaffi húsi á móti hótelinu fyrir svefninn.

30. maí 2009

Þurftum nauðsynlega að skoða Vatikanið fyrst við vorum komin þetta langt að. Tókum daginn frekar snemma og eyddum nokkrum klukkutímum þarna. Kom mér eiginlega á óvart hvað þetta var lítið spennandi, eða réttara sagt ruglingslegt. Sumt auðvitað stórkostlega flott, annað í rauninni ekkert merkilegt og fullt af einfaldlega ómerkilegu drasli. Mér fannst eiginlega mest koma til Egypska safnsins, væntanlega öllu stolið og á ekkert skylt við kristni. Kannski verst hvað öllu var grautað ósmekklega saman, að minnsta kosti á köflum.

Fórum á staðinn fyrir utan bara vegna nafnsins, Paolo, í von um að hann stæði undir nafna sínum í Frankfurt. Fengum okkur smásnarl sem var ekki alvont, en lítill bjór á 9 Evrur var eiginlega einum of gróft. Fórum svo niður á blómatorgið og aftur á Baccanali og aftur í Canneloni og aftur var maturinn frábær, í þetta sinn með trufflusveppa polentu sem forrétt. Náðum restinni af Chelsea – Everton í sjónvarpinu á barnum sem fyllti okkur kvöldið áður.

Vorum að vandræðast með veitingastað um kvöldið, en fyrsti kosturinn, sem átti að bjóða upp á úrvals vínkjallara, var lokaður þannig að við enduðum á Colline Emiliana, sem flaggaði Michelin meðmælum, topp umsögnum á vefsíðu sem ég fann og þótti sérstaklega vel heppnuð og dæmigerð Bolognese eldamennska. Ég fékk frábæran mat en Iðunni fannst lítið til Bolognese Spaghettisins koma, og það réttilega. Sangiovesi vínið fínt og allt annað en Bolognese til fyrirmyndar. Ákváðum í einhverjum vitleysisgangi að bæta eftirrétti við og súkkulaðikakan sem ég pantaði varð til þess að ég gat varla gengið, hvað þá farið að kveðja Róm á viðeigandi hátt.

Samantektin á Róm.. Frábært að koma þarna og gaman að sjá alla þessa staði, varla hægt að hreyfa sig án þess að detta um einhverja kirkjuna eða söguslóðir. En einhvern veginn svolítið mikið grautað saman, jafnvel frekar ósmekklega. Og ég er alltaf jafn hneykslaður á allri vinnunni og orkunni sem fer í allar þessar kirkjur og minnisvarða. Jafnvel þó nokkrir listamenn hafi fengið tækifæri til að skapa stórkostleg listaverk, þá réttlætir það varla þrældóm þúsunda eða tugþúsunda áratugum saman.

Og jú, líka að vissu leyti gaman að koma á söguslóðir, en það er sagan en ekki staðurinn sem er merkileg.

29. maí 2009

Maggi og Dísu fóru í morgun, ákváðum að skoða Colosseum, keyptum okkur inn á leiðsögumann, óvænt að hitta Eirík hjá Getraunum í sömu ferð. Svo niður í bæ að éta, í þetta sinn frekar vondan mat, eitthvað sem kallaðist pizza en var eins og tvöfalt lag af þurru tekexi, engin sósa og enginn ostur. Hráskinkan sem lá laus ofan á kexinu var svo sem ágæt. En skondið að fylgjast með austurlensku hjónunum sem höfðu pantað sitt hvorn pasta diskinn og einn salatdisk og bara fengið salatið. Þau reyndu aftur og aftur að fá pastað sitt. Gamli maðurinn, sem talaði bara ítölsku, reyndi aftur og aftur að rukka þau um tvo pasta skammta og salat. Þetta gekk svona hátt í korter þegar við fórum og þau voru að gefast upp aftur, alveg sama hvað þau sögðu, sá gamli reiknaði bara aftur og bað um peninginn.

Vorum orðin frekar þreytt, skoðuðum miðborgina og tókum svo góða „siestu“ og fórum að borða rétt hjá hótelinu seint um kvöldið. Fórum á annan fjölskyldustað í sömu götu og Al Chianti, sem ég man ekki hvað heitir, en fékk frábært kræklingaspaghetti og eigandinn gaf mér vindil úti á stétt eftir matinn. Fundum bar í næstu götu með ágætis úrvali af Whisky og enduðum kvöldið þokkalega gegnsósa af áfengi.

Svolítið um lögguhópa hér og þar um borgina, kannski 10-20 manns og 2-3 bílar, en urðum ekki vör við nein læti. Assi sagði okkur reyndar að það hefðu verið fréttir um óeirðir í Róm þessa daga.

28. maí 2009

Fórum í túrista-gír með Magga og Dísu en bæði búin að vera nýlega í Róm, og með söguna á takteinum, upp á toppinn á Péturskirkjunni, lyfta og 320 tröppur, þegar þrengst var þurftum við að labba … Stoppuðum í bjór og svo á Fiori torgið, duttum inn á veitingastaðinn Baccanali, sennilega toppurinn á matnum fram að þessu og hafði nú ekki verið mikil til að kvarta yfir, Canneloni með spínati og Ricotta eftir skinku í forétt og aftur rauðvín frá Sikiley (ef ég er ekki farinn að rugla stöðunum of mikið saman). Fótum svo á Navona um kvöldið, maturinn fínn en ekki stóð ekki alveg undir verðinu. Fengum okkur Valpolicella Amaroni, ég átti von á meiru en hin voru sátt.

Eiginlega toppaði þjónninn kvöldið, rukkaði okkur um 14% þjónustugjald og fór svo að væla í okkur að það væri þóknun staðarins en svo ætti hann skilið aukalega þjórfé. Var að fara að húðskamma hann á íslensku en ákvað að láta kyrrt liggja, síðasta kvöldið okkar saman í Róm, réttum honum 10 Evrur og fórum. En eftir á að hyggja, ég hefði betur hellt mér yfir hann, dómsdags frekjan!

Komumst að því að Hákon og Hjördís eru að fara á svipaðar slóðir og við á Amalfi strödina í næstu viku.

Enduðum kvöldið á nokkuð skemmtilegum vínbar sem ég man ekki hvar var…

27. maí 2009

Leikdagur og bjórbannið tekið hátíðlega. Fórum að Colosseum þar sem UEFA var með bikarinn og einhvers konar festival. Röltum niður í bæ, skoðuðum hempu-, prestskrúða- og nunnu-búninga-búða-götuna áður en við settumst niður á veitingastað við torgið fyrir framan eina kirkjuna. Bara vatna að drekka, en maturinn fínn.

Fundum svo lítinn götusala sem hafði ekki frétt í vagni sem hafði ekki fengið skilaboðin og seinna veitingastað sem virtist vera alveg sama. Létu reyndar vínið hverfa þegar löggan var að fylgjast með handan við hornið. Ákváðum að borða kvöldmatinn tímanlega þarna og fengum vín með matnum. Man ekki nafnið á staðnum en ætti skilið aðra heimsókn, fínn matur, parmaskinka og sveppa risotto hjá mér, fínt rauðvín frá Sikiley..

Dísa var auðvitað búin að finna hótelið sem United gisti á og fann rútuna þeirra, tóma og staða. Við mættum svo Barcelona liðinu á leiðinni út á völl á fullri ferð, kannski svona eins og leikurinn spilaðist. Fundum leigubíl sem var til í að skutla okkur út á völl, 40 evrur, bætti svo 10 við vegna umferðarinnar.

Höfðum aðeins áhyggjur af miðunum en reyndist ekki ástæða til. Og skrýtin tilfinning að vita að 5.000 Englendingar biðu fyrir utan völlinn, tilbúnir að borga frá þúsund pundum og upp úr fyrir hvern miða.

Ég ætla eiginlega ekki að reyna að lýsa leiknum og stemmingunni á vellinum. Þeir sem hafa áhuga á leiknum sjálfum hafa væntanlega séð hann, og liprari pennar en ég myndu aldrei ná að lýsa stemmingunni. Hef svo sem oft verið á leikjum, en þetta var einstakt og eins Iðunn sagði, stemmingin náði alveg inn að beini.

Það var svo ekki hlaupið að því að komast frá leiknum. Gaman að hitta Birki og Röggu óvænt fyrir utan völlinn. En engar lestir, rúturnar fáar og troðnar, en komumst að lokum inn á brautarstöð. Keyptum bjór fyrir utan völlinn og reyndum tvisvar að taka leigubíl og biðja um að keyra okkur á bar sem vildi selja okkur bjór. En einhver hryðjuverkalög hafa verið sett því enginn barinn vildi selja bjór. Leigubílstjórinn sem keyrði okkur upp á hótel var gráti næst þegar hann rifjaði upp það stórslys að Roma tapaði fyrir Liverpool í vítaspyrnukeppni 1984. Og þegar við komum upp á hótel sagði gamli maðurinn á vaktinni að þeir hefðu orðið að tæma mini barina á hótelinu. Reyndist reyndar ekki rétt þannig að við Iðunn náðum að skipta einum bjór.

26. maí 2009

Flug til Rómar strax um morguninn, lítill svefn en það má sofa þegar við komum heim. Tók tíma að komast á hótelið, svo sem allt í lagi og ekki langt frá miðborginni. Hittum Borghildi og fjölskyldu eftir smá morgunmat og allt of langt labb niður að spönsku tröppunum. En gaman að hitta þau, fengum okkur kaffi og meira með þeim á Caffe Greco.

Smá rölt um miðbæinn og salat á einhverju litlu torgi ekki langt frá. Dottuðum aðeins áður en Maggi og Dísa komu og fórum með þeim á Al Chianti, ítalskan fjölskyldustað rétt hjá hótelinu. Fínn matur en það spurðist út að það væri búið að setja áfengisbann á Róm. Fórum niður í bæ og fundum strax bar með bjór, fórum svo á Navona torg og keyptum meiri bjór, komumst að því að bjórbannið tók gildi klukkan 11:00 og staðurinn sem hafði neitað að afgreiða okkur fyrr um kvöldið hafði tekið bannið of snemma. Þeir tilkynntu okkur svo að löggan hefði hringt, varað við að þeir væru að koma, settu bjórinn í plastglös og létu okkur lofa að segja að við hefðum keypt hann fyrir 11:00. Stór mjúkur bolti gekk manna milli á torginu, svona stemmingarinnar vegna.

25. maí 2009

Af stað í tveggja vikna frí, úrslitaleikurinn í meistaradeildinni í Róm, flakk um suður Ítalíu á Amalfi ströndinni og helgi í París á heimleiðinni. Flugum til Frankfurt, settum töskurnar í geymslu og fórum á röltið. Byrjuðum á mat við endann á einni verslunargötunni, ég fékk Frankfurter stemmingarinnar vegna, ótrúlega vont, Iðunn hafði rænu á spaghetti. Ætluðum að enda á Paolo’s, uppáhalds veitingastaðnum okkar í Frankfurt, en komum að honum lokuðum, sennilega til frambúðar. Fúlt. Röltum á stað sem við höfðum prófað áður, flaggaði Michelin meðmælum, en snitselið sem þeir mæltu með var svona rétt yfir meðallagi.

Rétt náðum í níu-rútuna til Hahn flugvallar, tveggja tíma akstur, þaðan í leigubíl á hótelið í þriggja tíma svefn áður en við héldum áfram.

22. maí 2009

Viktor orðinn stúdent, útskrifaðist úr Kvennó í gær með fína einkunn, 8,4… Ansi mikið langdregin athöfn og Viktor fékk ekki viðurkenningu fyrir stjórnarstörf fyrir mistök. En skemmtileg veisla fyrir fjölskylduna heima seinni partinn – mættum í partý með krökkunum um kvöldið. Nokkrar myndir hér hér.

20. maí 2009

Uppskeruhátíð Postulanna, eitt af skemmtilegustu kvöldum ársins eins og alltaf, Þórhallur bauð heim, Bragi sá um matinn, hefðbundnar skálar og hringur. Og svo farið á Ölstofuna, nánast að venju.

16. maí 2009

Grill hjá Brynju og Kalla – Alli, Dröfn og Hrafnkell Máni kíktu, frábært nautakjöt, entumst samt ekki mjög lengi.

15. maí 2009

Fimmtugsafmæli hjá Helgu, glæsileg veisla og skemmtileg, gaman að hitta aftur gamla skólafélaga og nágranna, þó andlitsminnið sé alltaf jafn dapurt.

9. maí 2009

Þrjátíu ára stúdentsafmæli, hittumst í Gustsheimilinu, mætingin frekar döpur en verulega gaman að hitta þá sem komu.

8. maí 2009

Sumarbústaðaferð til Írisar og Sigga, með Helga, Þóru og Jóni. Frábær ferð eins og við var að búast í þessum félagsskap.

6. maí 2009

Tuttugu og sex ára brúðkaupsafmæli! Fórum á „Við Tjörnina“ og brást ekki frekar en fyrri daginn, ótrúlegt hvað staðurinn nær að halda stöðugum og góðum standard.

2. maí 2009

Matur hjá Helga og Þóru – frábær matur eins og alltaf, lauksúpa, svínabógur og púrtvínssoðnar perur með ís – allt toppað með skemmtilegu kvöldi.

1. maí 2009

Sumarbústaðaferð með Bryndísi til Gulla og Kristínar. Frábær ferð, enda hvað er hægt að fara fram á betra en að snæða hvern snilldarréttinn á eftir öðrum, með freyðivíni, bjór, rauðvíni og líkjör og það í svona skemmtilegum hóp? Skákin okkar Gulla stenst fer væntanlega ekki í sögubækurnar og Macallan flaskan var ósnert daginn eftir. Nokkrar myndir hér hér.

25-26. apríl 2009

Kosningavakan hjá RÚV, óvenju afslöppuð og góð útsending, tók reyndar óratíma eins og alltaf. Ótrúlegt að ekki megi telja á mörgum stöðum. Og furðulegt rugl með talningu á breyttum kjörseðlum. En, alltaf skemmtileg stemming í kringum þessar kosningavökur, mikil törn og gaman þegar vel gengur. Þrettánda kosningavakan og nítjánda kosningasjónvarpið og aðeins í þriðja skipti sem ekki er samkeppni..

22. apríl 2009

Sean Kirwan frá RtSoftware í heimsókn vegna kosninganna. Komst að því að Sean er írskur og ákvað að fá hann til að gera gæðakönnun á írsku pöbbunum í borginni. Komst reyndar að því að hann vill frekar sulla í einhverju sem kallast „cider“ (og ég veit hvað er, en segi ekki frá) en bjór. Náðum samt sjö krám, Guinnesinn bestur á English Pub, Leffe fínn á Vínstofunni, Grand Rokk og Ölstofan ekki slæm, hvor með sína stemmingu.

12. apríl 2009

Addi (og Jonni og Viktor) í páskamat.

11. apríl 2009

Spilað í Kaldaseli.

10. apríl 2009

„Crispy duck“ hjá Brynju og Kalla um kvöldið.

9-10. apríl 2009

Á Einifell til Auðar og Steina. Alltaf jafn gaman að koma til þeirra, grilluðum í hríð undir miðnætti, kjötið frábært. Prófuðum bjórsmökkun og féllum jafnilla og í vínsmökkun, helst Iðunn sem þekkti eitthvað. Fórum á smáflakk á föstudag inn á Laxfoss, gaman að koma þangað, mjög skemmtilegt umhverfi, en þyrftum að stoppa örlítið lengur.

8. apríl 2009

Kíkti á afmæli til Andreu og Óla Palla, fórum á stutt flakk með Hrund og Skarpa á eftir.

4. apríl 2009

Punk 2009 á Grand Rokk. Ótrúlega skemmtilegt kvöld, tókum 45 lög frá 1976-1979, lög sem við vorum að hlusta á þegar við vorum að byrja að spila, hvort sem þau skilgreinast sem Punk eða ekki. Spillir ekki hvað þetta er skemmtilegur hópur. Örfáar myndir
hér.

3. apríl 2009

Kíkti til Óla Palla í viðtal á Rás2 með Óttari Felix.

Á hljómleika hjá Halla Reynis á Rosenberg um kvöldið, mjög vel heppnaðir, en furðulegt að mæta á hljómleika hjá trúbadúr og setjast á háværa kjaftatörn eins og hálfur salurinn gerði.

Beint á Kringlukrána að sjá Pops, náðum nokkrum ágætum lögum fyrir hlé, sérstaklega gaman að heyra Slow Down en skóli hjá Iðunni í fyrramálið og ákváðum að segja þetta gott.

2. apríl 2009

Samskiptadagur Símans, skemmtilegt partý þrátt fyrir ömurlega tónlist. Í annað skiptið á stuttum tíma sem móðurfélagið okkar þrumar skelfilegu öskutunnudiskói yfir gesti og gangandi… Punk 2009 æfing endurheimti sálarró..

1. apríl 2009

Æfing fyrir Punk 2009, kíkti á restina af Jonathan Richman, alltaf sérstakur en séð hann tvisvar áður og fyrsta kvöldið bar af, heyrðist á gestum að hann hafi ekki verið upp á sitt besta.

28. mars 2009

Lokahóf síðustu starfsmanna Kuggs, fórum á Food And Fun framlengingu á Grand Hótel þar sem við fengum frábæran mat.

27. mars 2009

Spilað hjá Brynju og Kalla.

21. mars 2009

Alvöru gufubað á Mógilsá, verðum að fá okkur svona. Svo „Food And Fun“ á Fiskmarkaðnum seinna um kvöldið. Maturinn bókstaflega frábær, þjónustan svona og svona, staðurinn eins og járnbrautarstöð, varla hægt að tala saman. Og kokkarnir farnir þegar okkur langaði að forvitnast um matargerðina.

20. mars 2009

Viktor og félagar að keppa enn einu sinni í Morfís, í þetta sinn í undanúrslitum, stóðu sig mjög vel, en dómgæslan alltaf stóri „random-faktorinn“ – naumt og frekar ósanngjarnt tap.

20. mars 2009

Ráðstefna SKÝ um rafrænar kosningar og beint lýðræði. Mjög skemmtileg og vel heppnuð ráðstefna, fullt af hugmyndum til að melta og skoða.

19. mars 2009

Aðalfundur Siðmenntar.

19. mars 2009

Kíkti á Rás2 með Daða Ingólfssyni að kynna ráðstefnu SKÝ um rafrænar kosningar og beint lýðræði.

15. mars 2009

Afmæli hjá Marel Andra, glæsilegar veitingar hjá Sæunni eins og alltaf.

14. mars 2009

Eðal lax í boði Tómasar hjá Brynju og Kalla. Borðtennis og spil fram eftir nóttu.

13. mars 2009

Þurftum að halda auka postula uppskeruhátíð til að afhenda Kolla bjór og bikar. Spiluðum í nokkra tíma og enduðum á Ölstofunni.

7. mars 2009

Árshátíð hjá Símanum, Skiptum og þar með talið Staka. Mjög skemmtileg „carnival“ uppsetning í Hafnarhúsinu, en tónlistin hrikaleg þegar á leið. Entumst ekki lengi enda Iðunn búin að vera lasin.

6. mars 2009

Vinnutengdur bjór eftir vinnu og svo til Þórhalls í tilefni af fjörutíu og fimm ára afmæli.

28. febrúar 2009

Auður fimmtug, bauð báðum matarklúbbunum í mat. Frábær matur í boði Steina og þrælskemmtilegt kvöld, gaman að hitta Krissa og Rúnu… og hinn matarklúbbinn, og auðvitað okkar…

25. febrúar 2009

Morfís keppni hjá Viktori (og Baldri og Bjössa) fyrir hönd Kvennó, þjálfaður af Jonna (og Ara), sanngjarn sigur, kannski helst til stór, en eru með virkilega gott lið og gætu farið langt.

21. febrúar 2009

Kíktum til Brynju og Kalla í matseld, upp úr einni afmælisgjöfinni, borðtennis og bridge..

13. febrúar 2009

Kjartansgleði í boði Eddu í PikkNikk hjá Áslaugu, gamlir félagar, vinir og ættingjar Kjartans Árnasonar að hittast og minnast hans, hann hefði orðið fimmtugur þann 12. febrúar.

11. febrúar 2009

Æfingar fyrir Punk 2009 kvöldið að byrja, verður væntanlega fyrsta laugardag í apríl.

8. febrúar 2009

Afmælisveisla í gærkvöldi á Amsterdam, fyrst ættingjar, hópar og nánustu vinir, opið hús eftir miðnætti. Reyndar frekar fáir sem bættust við þá, vona að ég hafi engum gleymt og engan móðgað, en húsið tók einfaldlega ekki fleiri. Fræbbblar spiluðu tvisvar og Steini tók Police & Thieves með okkur Assa og Stebba. Örugglega oft spilað betur, sérstaklega byrjuðum við illa, en alveg rosalega gaman.

Seinni partinn beið svo fjölskyldan eftir mér heima þegar ég kom úr rótinu, tókst að koma mér all svakalega á óvart og mættu með kaffiveislu með sér. Enda orðinn fimmtugur, hitt var 49,99 ára afmæli.

Vísur á fimmtugsafmælinu

Frá Magga og Kidda

Leiðir þínar liggu um
landslag tækifæra.
Flottustum og fimmtugum
fína ósk þér færa.

Nú er hálfnuð öldin, hjá þér elsku kallinn, hér að okkur sækja, ístran stór og skallinn. Þú ert stuðboltimikill, og stutt hjá þér í grínið og stöðugt að skána, sem besta gæða vínið“!

Mér finnst ég ekkert gamall, hvorki farlaman né rýr, hef fótavist að mestu, og hausinn nokkuð skýr. Ég telst því vera miðaldra, sé tíminn ekki á flakki, og tæknilega séð þá er Valli bara krakki!

Á sunnudegi vakna hér, með staðreynd heldur kaldri, að hann litli bróðir minn er orðinn kall á sextugsaldri.

49 komma 99 komma og hálfur.

Frá Hugborgu Lindu

Nú senn
Kæru vinir og vensla menn
Senn rennur upp sú stund
Er léttist mjög okkar lund
Því Valli mun standa hér á meðal oss
Eins og gamalt eymdarlegt hross
Ei lengur fjörlegur ungur kálfur
Sem getur sagt
Ég er ekkert gamall !
Ég er bara,
49 komma 99 komma 9 og hálfur.

Við hér
Það er okkar skilda, og okkur ber
Að vera Iðunni trú og trygg
Hún mun verða á stundum aum og hrygg
Þetta verður henni erfið bið
Því kallinn mun þráast við
Neita staðreynd og segja sjálfur
Hættu þessu kerling
Ég er búinn að segja þér
Ég er bara,
49 komma 99 komma 9 og hálfur.

En fremur
Ég vil árétta, að stundin kemur
Er Valli í spegilinn lýtur
Og niður kinn hans tárið hnýtur
Þá mun birtast honum fáleg en staðföst sýn
Og trúið mér honum mun ei finnast hún fín
Sannleikurinn verður honum gjálfur
Skelfileg staðreynd
Ég er ekki lengur
49 komma 99 komma 9 og hálfur.

7. febrúar 2009

Hangi enn á að vera fjörutíu og eitthvað, fimmtugur á morgun, síðasta fertugspartýið á Amsterdam í kvöld – opið hús eftir miðnætti, Fræbbblar spila stutt.

6. febrúar 2009

Höskuldur fimmtugur, glæsileg veisla.

28. janúar 2009

Sambindi hjá nýfimmtugum Orra. Einhverra hluta vegna snérust umræður um þjóðmálin, er enn að reyna að átta mig á hvort homma/lesbíu fóbían sem dúkkaði upp aftur og aftur hafi verið grín…

24. janúar 2009

Kíkti til Vantrúar í hitting eftir ársfund.

23. janúar 2009

Orri fimmtugur í dag, til hamingju!

Ekki sáttur við ummæli Harðar Torfa í kjölfar frétta af Geir. Hörður hefur unnið þrekvirki og það verður ekki tekið frá honum. En alveg sama hvaða skoðun menn hafa á verkum stjórnarinnar, þegar veikindi eiga í hlut á ekkert annað en samúð við.

Póker og bjór í vinnunni um kvöldið, þurfti að fara í miðju spili til að horfa á Viktor keppa fyrir hönd Kvennó í Morfís undir þjálfun Jonna (og Ara). Fín keppni hjá báðum liðum og seinni ræða Viktors alveg einstök.

21. janúar 2009

Aðeins á Austurvöll, svo á tvo fundi, annars vegar um beint lýðræði og hins vegar um breytingar á stjórnarskrá.

Óþolandi að horfa upp á ótínda glæpamenn ráðast á lögreglu í skjóli mótmælenda. Stoltur af Jonna og Viktori að gera sitt til að stöðva þetta, sérstaklega Jonna sem stóð fyrir framan lögreglu – og um leið smá áhyggjur, var í stórhættu.

20. janúar 2009

Fór á Austurvöll, tek undir kröfur um breytingar, þó sennilega á allt öðrum forsendum en flestir. Á samt mjög erfitt með að þola þetta lið sem beitir ofbeldi og skemmdarverkum, þetta truflar og tefur, fjölmenni og hávaði nægja til að ná árangri.

17. janúar 2009

Austurvöllur klukkan þrjú og svo afmæli hjá Sylvíu tengdamömmu.

16. janúar 2009

Spilað hjá Brynju og Kalla.

10. janúar 2009

Postulauppskeruhátíð – að venju frábærlega vel heppnað kvöld með hefðbundnum ræðuhöldum, skálum, hring og handaregludeilu.

3. janúar 2009

Barði, Helgi og Þóra kíktu í mat og smá drykkju.

2. janúar 2009

Afmæli hjá Palla, kökur og kaffi..

2008

31. desember 2008

Matur í Austurbrún hjá Magnúsi og Sylvíu, með Friðjóni, Sæunni og fjölskyldu. Hafsteinn, Jóna og börn birtust eftir mat. Frábær matur og svo áramótapartý hjá okkur í Kaldaseli, Magnús & Sylvía, Hafsteinn, Jóna og Bjarni komu úr Austurbrún og svo Agga, Maggi og Kiddi. Alli, Kristín, Anna og Pétur kíktu við og Halli Reynis með tengdamömmu. Frábært kvöld og mjög gaman en greinilega ekki mikil stemming fyrir svona áramótasamkomu.

Nokkrar myndir frá jólum og áramótum hér.

30. desember 2008

Áramót Iðunnar í bridge, góð mæting, 20 manns og við náðum aldrei þessu vant að halda sigrinum inni á heimilinu.

23-27. desember 2008

Hátíðarnar eftir venju, nema hvað Viktor var lasinn á aðfangadagskvöld, Skötuveisla hjá Öggu á Þorláksmessu, kalkúnn hjá okkur á aðgangadag, hangikjöt með minni fjölskyldu og kasti á jóladag hjá Kidda, svínabógur með fjölskyldu Iðunnar í Austurbrún á annan í jólum. Brynja, Kalli, Kristín og Svanhildur kíktu í heimsókn á laugardag.

19. desember 2008

Alli, Maggi og Þórhallur kíktu í spil, Iðunn vann bæði mótin.

18. desember 2008

„Jóla“-tapas, vín, snafsar og fleira hjá Bryndísi, með Gulla og Kristínu. Frábært kvöld, eins og alltaf þegar þessi hópur hittist.

13. desember 2008

Jólahlaðborð hjá Staka, fordrykkur undir stjórn Hafliða heima hjá Jóni og Jóhönnu í glæsilegu nýju húsi. Maturinn í Skútunni í Hafnarfirði óvenju góður af hlaðborði að vera og vínin sérstaklega vel valin, aftur hjá Hafliða. Fórum á gömlu vínstofuna á eftir.

12. desember 2008

Jólamatur hjá Brynju og Kalla, mættum um sjö og vorum að éta til ellefu, ofboðslega vel heppnað kvöld, með ostum, síld, kæfum, rauðsprettu og pörusteik. Brynja, Kristín, Iðunn og Steinunn og svo Alli, Halli, Halli, Kalli og Valli.

11. desember 2008

Í heimsókn hjá Frey á dægurmálaútvarpin Rásar2 að velta upp hugmyndum um kosningalög, sjá nánar kosningalögin.

6. desember 2008

Sálfræðingarnir á BUGL kíktu í sameiginlega máltíð, tókst rosalega vel, myndatakan mistókst, en nokkrar hér.

5. desember 2008

Kíktum aðeins á jólaborð Þjónustumiðstöðvar Breiðholts, eftir matinn, gaman að hitta hópinn aftur.

28. nóvember – 1. desember 2008

Ferð til Manchester með Öggu & Magga, Gunnu & Kidda, Halla & Steinunni og Írisi & Sigga. Jólamarkaðurinn skemmtilegur, góður matur á gríska Tapas staðnum Dimitri’s, frábær á argentínska steikar staðnum Gaucho, og vel yfir meðallegi á ítalska Piccolino. Og til að við næðum nú öllu sviðinu þá duttum við inn á (sennilega) versta veitingastað sem við höfum borðað á, amk. ef götusölum í London er sleppt. Thaílenskur / indverskur og heitir „Vermilion & Cinnabar“ – meðalmennskan í mat og slöpp þjónusta kannski ekki það versta, en dúndrandi hátt teknó allan tímann var ekki alveg það sem við vorum að leita að. Og til að toppa kvöldið fékk Steinunn sennilega matareitrun.

En hópurinn small ofsalega vel saman og eftir að við ákváðum að nota gengið eins og það var í vor, pundið á rúmlega hundrað kall, þá voru engin vandamál. Sinclair’s Oyster Pub við enda einnar göngugötunnar í skemmtilegu gömlu húsi bauð bjórinn á rúmt pund. Ekki spillti að ná 140 pundum í plús í póker í Casino.

Fórum á Manchester City – Manchester United, dapur leikur en stemmingin á pöbbnum hjá City með því skemmtilegra sem við höfum lent í fyrir leik. Kiddi auðvitað heitur City aðdáandi og restin af hópnum hélt með City, nema auðvitað Halli, sem klappaði með tánum þegar United skoraði – og Steinunn gaf ekkert upp.

En jólamarkaðurinn er mjög skemmtilegur, fullt af litlum kofum með heimalöguðu konfekti, „fudge“, handavinnu, peysum, treflum, húfum, ostum frá Hollandi og Belgíu, bjór og pylsum frá Þýskalandi og Spáni, kæfum, jólaglögg, meiri bjór, hvítlaukur, meiri ostar og ég veit ekki hvað…

Hótelið var nánast við miðbæinn, ótrúlega stór og tóm herbergi, en allt sem við þurftum var til staðar. Miðbærinn hefur fengið mikla andlitslyftingu, en sláandi munur á borginni um leið og komið er út fyrir innsta kjarnann, bara 20 mínútna göngufjarlægð (á mínum hraða) var búið að negla fyrir fullt af fyrirtækjum og húsin í niðurníðslu.

En, fyrsti skammtur af myndum hér.

27. nóvember 2008

Héldum upp á þrjátíu ára afmæli Fræbbblanna og enn frekar að fjórði áratugar Fræbbblanna er hafinn. Spiluðum á Grand Rokk, ágætis mæting og virkilega fín stemming. Uppistaðan í dagskránni var efni af næstu plötu og virðist ætla að ganga upp, auðvitað eitt og annað sem þarf að slípa til.

22. nóvember 2008

Sambindis jólamatur hjá Hákoni og Hjördísi, frábær kalkúnn og gott kvöld, spurningaleikur að hætti Tomma.

16. nóvember 2008

Brynja, Tina, Assi og Stína kíktu með og í mat. Alli kom að sækja bílinn..

15. nóvember 2008

Alli, Kalli, Maggi og Þórhallur kíktu í spil.

9. nóvember 2008

Tók að mér að vera athafnastjóri við nafngjöf Öglu Margrétar, dóttur Brynju og Kalla. Vann þetta í samráði við Siðmennt þó athöfnin væri ekki á þeirra vegum. Mjög gaman taka þátt og ánægður að fá að vera með.

8. nóvember 2008

Madridarkvöld, hópurinn sem fór til Madrid í fyrra hittist hjá Hirti og Þóru, skemmtilegt kvöld með tapas og vínkynningu frá Berinu.

6. nóvember 2008

Sambindið kom í heimsókn, Orri skrópaði, en annars mæting.

5. nóvember 2008

Sameiginlegt barnaafmæli á afmælisdegi mömmu, veisla að hætti Öggu.

1. nóvember 2008

Í mat hjá Halla Reynis og Steinunni, alltaf gaman að hitta þau. Afmælispartýið hans Viktors beið okkur svo þegar við komum heim, stútfullt af skemmtilegum krökkum. Iðunn var ein af krökkunum, en ég fór fljótlega að sofa.

31. október 2008

Í mat hjá Helga og Þóru, stungum af til að sjá Viktor keppa í Morfís fyrir hönd Kvennó undir þjálfun Jonna. Unnu öruggan sigur. Aftur til Helga og Þóru eftir keppnin og sátum að hóflegu sumbli.

25. október 2008

Assi, Stína og Alli komu í mat.

18. október 2008

Árshátíð Vantrúar, mættum reyndar ekki fyrr en eftir mat, en gaman að hitta þá sem við höfum verið að fylgjast með á vefnum.

17. október 2008

Staki flutti upp á Klettháls, stutt að fara, bjart og fínt húsnæði, en mætti vera meira hús næði.

9.-11. október 2008

Árleg Sambindisferð í sumarbústað. Fín ferð og þó við Orri færum tveir á föstudagskvöldinu vorum við í góðum gír með grill, gæðavín og góða tónlist.

3. október 2008

Vísindadagur hjá Iðunni, lauk með móttöku í Skólabæ, fínt kvöld og enduðum á Vínbarnum.

12.-16. september 2008

IBC sýningin í Amsterdam. Alltaf gaman í Amsterdam og sýningin orðin ómissandi. Verst hvað allt verð er hrikalega hátt í borginni þessa helgi, bjórinn á þúsund kall á EuroPub, ég fékk smá kústaskáp (8 fermetra) á 950 Evrur fyrir fjórar nætur. Enda stendur til að færa sýninguna til Frakklands, eftir því sem leigubílstjórarnir sögðu. En EuroPub er „skrifstofa“ norðurlanda þjóðanna og gaman að hitta fólk utan dagskrár.

Annars óvenju svalt og meira að segja íslensk rigning á köflum og þar fyrir utan einhver slappleiki og aumingjagangur að drepa mig..

Veitingastaðirnir Vasso og Van De Kaart stóðu heldur betur undir væntingum, og Savini bættist á nauðsynlegt-að-heimsækja listann. Fann nokkra bjórstaði rétt hjá sem voru með mikið úrval af bjór á viðráðanlegu verði, In De Wildeman, Cafe Belgique og Amsterdam Stoombierbrouwerij, en komst aldrei á Whisky barina, segir kannski meira um hvað heilsan var döpur.

Datt reyndar síðasta kvöldið inn á Holland Casino og kom 20 þúsund kalli ríkari út þrátt fyrir lítinn upphafssjóð. Skemmtilega stemming að detta öðru hverju inn í Casino (er ekki til skárra íslenskt orð en „spilavíti“?) en er samt einhvern veginn ekki nógu spenntur til að gerast spilafíkill..

4.-8. september 2008

GoutOnVa ferð til Luxemborgar, þeas. við Iðunn fórum með Assa og Stínu og Auði og Steina í heimsókn til Krissa og Rúnu (og reyndar Salóme) í Luxemborg. Ferðin gekk eingöngu út á að éta og drekka og vera glöð eins og þar segir, og tókst alveg stórkostlega vel. Fullt af myndum hér

Keyrðum frá Frankfurt til Luxemborgar og gistum hjá Krissa og Rúnu í nýja húsinu, nóg pláss og nóg af öllu. Fyrsta kvöldmáltíðin var á stað sem heitir „Síðasta kvöldmáltíðin“ og svo farið í Tívolí.

Trier var næst á dagskrá, bjór, vínsmökkun, matur og heim í skýfall. Fórum á japanskan stað um kvöldið sem toppar sennilega alla japanska staði sem við höfum farið á, nema kannski staðinn sem var á Krasnapolski í Amsterdam. Næst á hljómleika með kanadísku punk hljómsveitinni The Mahones (sem ríma visvitandi við Ramones, og taka sennilega seinni hlutann af Pogue Mahone þar sem Pogues gripu fyrri hlutann) í tjaldi í næsta skýfalli á írskum pöbb, „The Black Stuff“, þrælskemmtilega hljómsveit og koma kannski heim á næsta ári. Salóme plataði okkur svo í SingStar þegar heim var komið, ótrúlegt hvað mikil bjórdrykkja brýtur niður mótstöðuaflið.

Á laugardeginum var verslað inn fyrir matseld næstu tveggja daga, farið í vínsmökkun til Jesús sem flytur inn spönsk vín og nautakjöt í whisky sósu plús eldað.. Sunnudagurinn fór í leit að kampavínssmökkun sem fannst ekki, útimarkað, Petang mótið fram eftir kvöldi meðfram eldamennsku, andarbringur í þetta skipti. Náðum ekki að útkljá Evrópumótið í Petang, en útkljáðum held ég endanlega að það standast engir kokkar okkur snúning.

29.-31. ágúst 2008

Einifells ferð til Auðar og Steini, og reyndar kaffi og rabbabaraköku hjá Assa og Stínu, frábær helgi eins og alltaf, fiskisúpa á föstudagskvöldinu, grill. pottur, berjaferð, stjörnuskoðun og Petang á laugardeginum.

23. ágúst 2008

Menningarnótt og hljómleikar í portinu á bak við „Við Tjörnina“, sennilega fjölmennasta kvöldið og skemmtileg stemming, eins og alltaf, fundum minna fyrir að Miklatún væri að taka allt til sín en í fyrra. Mér finnst ekkert að því hjá Rás2 að halda svona stórhljómleika, en þeir eiga ekki erindi á menningarnótt. Þeir taka tennurnar úr kvöldinu og því sem gerði menningarnóttina einstaka, fullt af litlum uppákomum út um allan bæ. Svona hálfpartinn eins og flóðhestur í barnalaug. Það er nóg af kvöldum á árinu og engin ástæða til að valta yfir menningarnóttina.

9. ágúst 2008

Síðbúið afmæli hjá Kiddi og Magga sem voru að meðaltali sextugir, svona nokkurs konar fiskidagur fyrst við komumst ekki norður, myndir frá Kidda hér.

9. ágúst 2008

Mættum á Gay Pride 2008, amk. fjölmennasta og flottasta sem við höfum séð, nokkrar myndir af handahófi hér.

3. ágúst 2008

Mauro-en-samt-ekki-Mauro partý í Kaldaseli, þokkaleg mæting þrátt fyrir verslunarmannahelgi og sunnudagskvöld, og umfram allt, frábært kvöld, nokkrar myndir hér.

3. ágúst 2008

Spiluðum hluta af Punk hátíðarefninu á Árbæjarsafni, gekk nokkuð vel þrátt fyrir aðstæður, ákváðum að flýja rigninguna og færa okkur upp á aðra hæð á síðustu stundu..

26. júlí 2008

Grill með Iðunnarfjölskyldu hjá Sæunni, nokkrar myndir hér.

25. júlí 2008

GoutOnVa á Einifelli á föstudagskvöldi, þriggja liða heimsmeistaramót í Petang, sem Assi, Krissi og Valli unnu. Frábær humar og ekki síðra lambalæri að ógleymdum fljótandi veitingum. Örfáar myndir hér.

3. júlí – 10. júlí 2008

Fórum í vikuferð til Benalmadena á Spáni að eyða nokkrum dögum með Sylvíu og Magnúsi, fengum gott tilboð á flugi og mættum fyrirvaralaust. Nokkrar myndir hér, sumar reyndar frá Sylvíu áður en við komum.

29. apríl – 18. maí 2008

Silfurbrúðkaupsafmælisferðin okkar, London, Aþena, 12 daga sigling, Aþena og London. Stutt ferðasaga hér og slatti af myndum hér.

12-18. apríl 2008

NAB ráðstefnan í Las Vegas með Jóni Eyfjörð og Þorkeli Lillie, fullkomlega galið umhverfi, eftirmynd af París og önnur af New York, eitt stórt ljósaskilti, minnti helst á kvikmyndaver, framhliðin í yfirstærð en ekki svo mikið á bak við. Hótelið sennilega kílómetri að innan, við fengum kort af hótelinu, ekki bænum og þegar Þorkell bað um kort af bænum settu þeir upp svip, „Hvers vegna? Til hvers þarftu að fara út af hótelinu?“. Stútfullt af spilakössum, á næsta hóteli voru 3.000 spilavélar, fyrir utan borðin, og fólk spilandi allan tímann, með kortið í vélinni og snúru frá því í vasann. Ég fékk stærra herbergi en við höfðum pantað, risasjónvarp (sem ég nennti reyndar ekki að horfa á) nuddpottur á baðinu og annað sjónvarp þar. Sýningin sjálf var fín, en allt of stíf dagskrá hjá okkur.

Gistum eina nótt í New York á heimleiðinni, þurftum reyndar að millilenda í Allentown til að taka bensín eftir að hafa hringsólað yfir New York. En, var mjög heillaður af New York, þótt allir (alvöru) matsölustaðir hafi lokað á okkur um kvöldið. Nokkrar myndir hér.

16. mars 2008

Tvær „fermingar“ veislur, Steinar sonur Halla og Steinunnar og Ægir Máni, sem hélt reyndar bara upp á 14 ára afmæli í stað þess að lát ferma sig – flott hjá honum.

8. mars 2008

Héldum Punk hátíð á Grand Rokk með gömlum félögum úr hinum og þessum hljómsveitum, einhverjar myndir hér. Ógleymanlegt kvöld, 40 lög frá 1977-1979, gekk ótrúlega vel, fullt hús og frábær stemming. Verður vonandi árlegur viðburður.

Kvöldið endaði samt á leiðinlegum nótum fyrir Árna Daníel, einhver skríll réðst á hann á heimleið, barði hann og rændi.

4. mars 2008

Horfði á „Óðal feðranna“ með Hrafni og nokkrum þeirra sem tóku þátt í gerð myndarinnar. Myndin eldist ótrúlega vel. Stefnt að því að gefa út á DVD, upprifjfun á myndinni tekin upp og fylgir með sem ítarefni. Kíktum til Hrafns á eftir.

24. febrúar 2008

Mamma dó í nótt, frekar óvænt eftir að hafa verið til þess að gera hraust síðustu mánuði. Varð níræði í haust og eftir að hafa staðið ótrúlega af sér mjög erfið veikindi 2005 og 2006 kom þetta nánast algjörlega flatt upp á okkur.

17.-21. febrúar 2008

Námskeið / kynning / þjálfun hjá RTSoftware í London. Gott hótel við Thames, alltaf gaman í London og ekki spillti að hafa Sævar frá Stöð2 með í för. Kíktum á Steve Earle í Roundhouse, byrjaði ekki illa, en fór hratt niður á við, illa farið með pening að kaupa miðana á svörtum.

Tímdum svo ekki að borga 280 pund á Arsenal-AC Milan, en mælum með ítalska Passione og japanska Roka á Charlotte Street, rétt hjá Tottenham Court Road. Og ekki gleyma ítalska Capitan Corelli í Battersea, óhrjálegur ítalskur staður, en maturinn frábær og nánast borgað með honum.

15. febrúar 2008

Kveðjupartý Iðunnar fyrir vinnuna, eins og alltaf gaman að skemmta sér með þessum hóp, þó ég hafi óvart sofnað full snemma eða um þrjúleytið.

9. febrúar 2008

Sambindið hittist hjá Höskuldi, sem hafði veg og vanda af eldamennsku og undirbúningi, sérstaklega vel heppnað kvöld.

8. febrúar 2008

Iðunn bauð mér á Humarhúsið í tilefni 49 ára afmælisins. Frábær matur og toppþjónusta, ótrúlegt hvað þeir ná að halda háum standard eftir allan þennan tíma. Kíktum á Kristínu og Halla á eftir.

2. febrúar 2008

Árshátíð hjá Iðunni í Gullhömrum, frábær matur og skemmtilegt fólk náði að vinna vel á móti skelfilegu stefi.

Kosningalög, beint lýðræði

Hér fylgir smá samantekt á hugmyndum um breytingar á kosningalögunum. Má örugglega fínpússa og taka ákveðna þætti fyrir,aðalatriðið er að fá umræðu og fara að koma hlutunum í verk

Landið eitt kjördæmi

Í sjálfu sér ekki flókið, 330.000 manna þjóð þarf ekki á skiptingu í kjördæmi að halda. Því fylgja óþarfa flækjur og óþarfahagsmunaárekstrar.

Eitt atkvæði á mann

Annað atriði sem segir sig í rauninni sjálft, það er verið að kjósa (vonandi) um málefni og stefnu við löggjöf ogframkvæmdavald. Hvers vegna ætti skoðun íbúa úti á landi á tilteknu máli að vega þyngra en þess sem býr áhöfuðborgarsvæðinu? Auðvitað eru engin rök fyrir því og einu rökin sem heyrast er að þetta sé gert til að vinna gegn öðruójafnvægi. Þvílík rökleysa.. er ekki einfaldara að leiðrétta þetta umrædda ójafnvægi? Hvers eiga kosningalögin að gjalda?Af hverju er þeim „nauðgað“ í þessu samhengi?

Mætti ekki með sömu „rokum“ gefa fólki mismunandi atkvæðisrétt eftir atvinnugrein? Eða háralit?

Hverjir setja lögin?

Í rauninni er fráleitt að þingmenn sjálfir séu að vasast í að setja kosningalög. Ekki er bara hætta á að þeir fari að hnikatil ákveðnum atriðum, sínum flokki í hag, amk. í eigin kjördæmi, heldur eru beinlínis staðfest dæmi um fráleitar reglur viðúthlutun þingsæta þar sem sitjandi þingmaður lét setja inn ákvæði fyrir sig og sína.

Kosningalögin eru auðvitað fyrir kjósendur og það er þeirra sem vilja ná kjöri að aðlaga sig að kröfum kjósenda, ekkiöfugt. Núverandi fyrirkomulagi má (í grófu samhengi) líkja við íþróttakappleik þar sem annað liðið setur reglurnar og dæmirjafnóðum. Já, þetta er að mörgu leyti sambærilegt því hagsmundir kjósenda og þingmanna fara langt í frá alltaf saman.

Aðgreina löggjafarvald og framkvæmdavald

Nokkuð sem mér finnst líka segja sig sjálft. Þetta eru tvö gjörólík hlutverk og í rauninni erfitt að átta sig á hvers vegnaþetta rann saman í eitt. Annars vegar er verið að tala um það að setja almenn lög og reglur til að fara eftir, hHins vegarer rekstur ríkisins.

Þeir sem lenda í stjórnunarstöðum eru oftar en ekki þeir sem hafa geð í sér til að koma sér áfram innan núverandi flokka.Ekki svo að skilja að þetta sé allt vondir og / eða óhæfir einstaklingar. En það vantar fjölbreytni og kröfur umfagþekkingu. Dettur einhverjum í hug að dýralæknir yrði ráðinn fjármálastjóri í 300.000 manna fyrirtæki?

Fulltrúalýðræðið

Upphaflega áttu „allir“ rétt til að sitja þing, reyndar með sínum fráleitu takmörkunum. En þegar á leið þótti ekki hagkvæmtað draga allan landslýð á þing og fulltrúalýðræðið var fundið upp. Í rauninni var þetta „skítaredding“ á tæknileguvandamáli.

Þetta tæknilega vandamál er ekki lengur til staðar. Það er einfalt í framkvæmd að leyfa öllum að taka þátt íatkvæðagreiðslu um allar lagasetningar.

Það er í rauninni fráleitt að ætlast til þess að kjósendur geti valið einn flokk út frá þeim fjölmörgu málefnum sem þarf aðtaka afstöðu til. Ég þekki amk. fáa sem finna algjöran samhljóm í stefnu eins stjórnmálaflokks.

Beint lýðræði

Það eru auðvitað nokkrar leiðir við beint lýðræði. Einfaldasta aðferðin er að gefa öllum kost á að taka þátt íatkvæðagreiðslu um öll frumvörp. Hlutverk þingsins yrði þá fyrst og fremst að semja og leggja fram frumvörp.

Og þá mætti auðvitað fækka þingmönnum.

Hvort þetta er eingöngu kosning á vefnum eða einnig verður boðið upp á að nota síma, jafnvel skriflega fyrir þá sem þaðvilja, er aukaatriði.

Ég hallast að því að leyfa kjósendum að framvísa atkvæði sínu, þeas. veita öðrum einstaklingi umboð til að fara með sittatkvæði, ýmist að öllu leyti eða í þeim málaflokkum sem kjósandi velur. Kjósandi getur auðvitað alltaf tekið þetta umboðtil baka. Og kjósandi getur hugsanlega ákveðið að framvísa atkvæði sínu í mismunandi málaflokkum til mismunandieinstaklinga.

Ég hallast að því að atkvæðagreiðsla sé opin, ég ætlast einfaldlega til þess að sá sem tekur afstöðu til og hefur áhrif álagasetningu, sé klár á að standa fyrir máli sínu. Ég hef heyrt gagnrýni um mögulega misnotkun, en þau tilfelli eru afarlangsótt og ætti að vera auðvelt að fyrirbyggja. Fyrir minn smekk finnst mér sjálfsagt að standa fyrir það hvernig éggreiði atkvæði. Engu að síður er þetta atriði sem má – og þarf að – hugsa til enda.

Það er sérstaklega mikilvægt að skoða þetta í samhengi við núverandi umræðu. Við síðustu þingkosningar var varla talað umESB, og þeir sem höfðu skoðun fóru lítið eftir flokkslínum. Í dag er þetta kannski stærsta spurningin. Væri ekki talsvertmikils virði að hafa vettvang fyrir umræður og möguleika á að kanna hug kjósenda?

Gagnrýni

Og svo ég leyfi mér að svara þeirri gagnrýni sem ég heyri oftast..

Fólk getur ekki sett sig inn í öll mál.

Jú, reyndar, en ef ekki þá er alltaf þessi möguleiki að framvísa atkvæði sínu, eða einfaldlega sitja hjá og leyfa þeim semhafa áhuga og skoðun að leiða málið til lykta.

Ég treysti ekki fólki til að taka rétta ákvörðun

Þessi rök ganga engan veginn upp. Með sömu rökum ætti að afnema kosningaréttinn alveg. Ef fólki er treyst til að takaafstöðu til málefna, velja sér flokk og kjósa eftir þessari afstöðu – þá segir sig sjálft að fólki er treyst til að takaafstöðu.

Er ekki alltaf hægt að svindla í svona tölvukerfum?

Það má vera að alltaf sé hægt að setja upp dæmi þar sem hægt er að svindla á kerfum, ef nægt fjármagn, endalaus tími oghægt er að véla nógu marga með.

Aðalatriðið er að það er hins vegar óendanlega miklu dýrara og flóknara en að svindla á núverandi kerfi.

Það er hægt að ganga þannig frá kosningakerfi að hætta á svindli og misnotkun sé miklu langsóttari og erfiðari en ínúverandi kerfi.

Æ, ég held ekki…

Kannski erfiðustu rökin að svara, vegna þess að þetta eru auðvitað engin rök og ekkert svar. Bara tilfinning að ekki séráðlegt að breyta því sem hefur verið óbreytt svo lengi. Sama hversu illa það er að virka.

Að lokum

Er kannski hægt að velta fyrir sér ef lýðræði hefði þróast „eðlilega“, það er að segja að allir væru alltaf að kjósa um öllmál, hverjum dytti þá í hug að taka upp fulltrúalýðræði. Hvað kæmu mörg „æ, ég held ekki“…

Sigling 2008

Ferð út

Við stoppuðum í London á leiðinni út, lentum á Stansted rétt fyrir hádegi og fórum frá Heathrow um kvöldið. Við vorum samferða Krissa og Rúnu í fluginu út, rétt náðum að segja skál við Arnar og Unni í Keflavík en misstum af Hjálmari, ótrúlegt en satt. Við kvöddum Krissa og Rúnu með bjór á Stansted. Við áttum svo nokkra klukkutíma milli flugferða þannig að við skildum töskurnar eftir á Euston og fórum í Camden Town.

Skemmtileg stemming á markaðnum þar, en stoppuðum ekki lengi og eyddum allt of löngum tíma í að reyna að finna ítalskan veitingastað, sem reyndist svo vera of langt í burtu fyrir þennan tíma, og enduðum á snarli á pöbb.

Aþena

Lentum svo í Aþenu um hálf þrjú nóttina eftir og ekkert mál að finna leigubíl. Bílstjórinn gaf aðeins tóninn fyrir Aþenu, keyrði allt of hratt, fór yfir á rauðu ljósi og reykti í bílnum. Viðhorfið var gjarnan þegar Iðunn ætlaði að drepa í sígarettunni áður en hún fór inn, „Hvað ertu að hugsa? Hafðu ekki áhyggjur, þú ert í Aþenu“.

Fyrsti dagurinn í Aþenu fór svo í rölt, höfðum hugsað okkur að fara í skoðunarferð á Akrópólis daginn eftir. Út að borða um kvöldið á stað sem vinkona Iðunnar hafði mælt með, Abyssina, ekkert sérstakur matur, en fínt umhverfi, brenndi mig á báðum höndum á einum disknum.

Akrópólisferðin klikkaði svo á því að það var líka fyrsti maí í Grikklandi. Allt lokað. Röltum samt upp á hæðina og skoðuðum bæinn. Fórum um kvöldið á veitingastað sem hótelið mælti með, fengum kjötsúpu í smjörpappír, ekkert sérstakur matur en skemmtilegt umhverfi og stemmingin fín, tveir náungar að spila gríska tónlist og syngja.

Sigling

Við vissum auðvitað ekkert hverju við áttum von á, gerðum okkar talsvert miklar vonir, en sáum þetta engan veginn fyrir. Skipið sló út öll fimm stjörnu hótel sem við höfum verið á. Erfitt að lýsa þessu í nokkrum setningum, en það voru 600 starfsmenn á skipinu en 1.300 farþegar og allir starfsmennirnir á tánum að passa upp á allt væri í lagi, herbergið (eða á ég að segja káetan?) var þrifin amk. tvisvar á dag, morgunmaturinn gat verið á hvaða lúxushóteli sem var, við gátum valið milli ótrúlega margra rétta í hádeginu, og svo var fjórrétta kvöldmatur. Allur matur og gisting var innifalin í tiltölulega hóflegu verði. En við drukkum auðvitað líka, það var vínsmökkun á hverju kvöldi og 13 barir á víð og dreif um skipið. Það var auðvitað Casino á skipinu og það voru sýningar á hverju kvöldi, sem við slepptum reyndar, bókasafn, listaverkasafn, málverkasafn, Picasso, Dali, Rembrandt, líkamsrækt (sem við hefðum kannski betur mætt í), innisundlaug, útisundlaug, körfuboltavöllur, útitafl og Spa. Gott dæmi um að þeir voru ekki að sleppa ódýrt frá hlutunum var að það spilaði hljómsveit fyrir balli og stundum við sundlaugina, kammersveit fyrir framan matsalinn, „dinner“ tónlist við einn barinn og Billy Joel afrit á píanóinu við annan.

Herbergið var þrifið tvisvar á dag og enn eitt dæmið um smáatriðin var að á hverju kvöldi beið okkur „dýr“ úr vöfðum handklæðum, fréttabréf, dagskrá morgundagsins og upplýsingar um næsta áfangastað.

Ferðin var eins konar blanda af sólarlandaferð, siglingu og borgarferð, nema hvað við þurftum ekki að pakka fram og til baka, og keyra langar leiðir, hótelið var jú með okkur.

Einhverra hluta vegna duttum við inn á Casino á hverjum kvöldi, ekki til að sóa stórum fjárhæðum, heldur var skemmtilegasta stemming þar, skemmtikrafturinn Barnaby, Rússinn Boris sem var í rauninni frá Úkraínu en leit á sig sem Rússa þar sem hann hafði flutt til Bandaríkjanna 1979, Úkraínumaðurinn Sasha, sem leit á sig sem Úkraínumann, konan hans Tania, vinkona hennar Elaine og maður Elaine, Jim, frá Californiu. John spilaði við okkur á meðan konan hans Caitlin var í rúllettunni. Systurnar Gail og Jackie frá Kanada og bræðurnir Howard og Bob frá Arizona (ef ég man rétt).

Þar fyrir utan kynntumst við talsvert af fólki við kvöldmatinn. Við vorum ekki með föst sæti í kvöldmatnum heldur vorum við sett til borðs með þeim sem til féllu hverju sinni. Tvisvar sátum við til borðs með hinum 86 ára Raymond Wynne og japönsku eiginkonunni hans Judy til 51 árs. Bæði mjög hress og Raymond sagði að kvöldið áður hefði hann verið unglingurinn við borðið. Joyce og George, Victoria og Mike, Penelope og David að ógleymdum mægðunum Rene og Hillary, sem við hittum nokkrum sinnum þar sem þær voru að tefla á útitaflinu við sundlaugina.

Istanbúl

MS Rotterdam stoppaði tvo daga í Istanbúl, fórum niður í bæ, keyptum „smá“ gull á gamla basarnum, fórum í tyrkneskt bað, Hamami, sem var frábært. Það er að segja hjá mér, Iðunn villtist aftur og aftur sín megin og fékk endurgreitt. Við báðum leigubílstjóra að fara með okkur á dæmigert tyrkneskt veitingahús, sem hann gerði, fínn matur og þjónarnir allir af vilja gerðir, reyndar frekar mikil óreiða, en mjög skemmtileg. Fimm þjónar fyrir hvert borð, einn til að færa okkur matseðlana, annar til að taka við pöntuninni, þriðji til að koma með matinn, sá fjórði til að segja honum hvert hann átti að fara með matinn og sá fimmti til að leiðrétta þann fjórða. Þegar Iðunn var ekki klár á hvernig hún átti að bera sig við að borða kebab-ið kom þjónninn og brytjaði ofan í hana eins og litlu börnin. Vorum svo næstum búin að týna skipinu, leigubíllinn fór með okkur á vitlausa höfn, en náðum að finna réttan stað á endanum.

Seinni daginn fórum við í skoðunarferð, létum pranga inn á okkur þremur rándýrum teppum, skoðuðum bláu moskuna, Ayasofia og safn sem bauð upp á staf Móses, sverð Davíðs og hendi Jóhannesar – eða svo sögðu þeir. Frábær matur í hádeginu í fyrrum sumarbústað þjóðhöfðingjans.

Varna

Við slepptum skoðunarferðum þennan dag, tókum leigubíl niður í bæ og höfum sennilega byrjað á vitlausum enda. Slepptum morgunmatnum á skipinu og ætluðum að fá okkur einfaldan morgunmat í bænum, kaffi, appelsínusafa og croissant, eða einhvers konar horn. Það var hins vegar hvergi í boði, pizzusneiðar í lúgum og kaffistofur sem buðu bara upp á sætar kökur. Fundum svo skárri bæjarhluta þar sem verið er að byggja upp og kannski þess virði að heimsækja seinna. Síðasti bjórinn var á ströndinni rétt hjá skipinu. Við höfðum rölt óvart í áttina að höfninni og leigubílstjórinn sem hafði skutlað okkur í bæinn, lofað að skutla okkur til baka og elt okkur þegar við löbbuðum fram hjá honum, missti af góðum bita.

Odessa

Þó ekki væri nema að koma á Potemkin tröppurnar í Odessa þá var ómissandi að fara í land. Að mörgu leyti svipuð og Varna, mikil uppbygging í gangi, fengum frábært Carpaccio á veitingastað sem var að mestu úr stáli og gleri.

Vorum samt ekki lengi, brúðkaupsafmælisdagurinn, fórum á Pinnacle, grillið á skipinu, um kvöldið og fengum frábæra steik en gleymanlega forrétti og eftirrétti.

Constanta

Kannski minnst spennandi borgin við Svarta hafið, stoppuðum reyndar ekki lengi, tókum rútu í bæinn, reyndum að finna hraðbanka sem virkaði eða peningaskiptilúgu sem vildi skipta búlgörskum eða úkraínskum peningum. Þegar þeirri þrautagöngu lauk leituðum við að bar, hittum systurnar Gail og Jackie og buðum bjór með okkur. Röltum aðeins meira en tókum svo rútuna „heim“. Kannski eins gott að við völdum ekki skoðunarferð, hittum fólk sem kom niður á skip og sagði sínar skoðunarfarir ósléttar, farastjórinn hafði týnt þeim ásamt tíu öðrum.

Svartahafið

Svo var mjög sérstakt að sigla niður Svartahafið meðfram strönd Tyrklands. Við fengum sögustund á skipinu sem rifjaði upp bardagana við Gallipolí, „And The Band Played Waltzing Matilda“ söng í hausunum á okkur í steríó.

Þess á milli lesið, legið í leti, lesið, mót í 21 með viðbúanlegum árangir og lesið meira.

Ísrael

Tókum langa skoðunarferð til Jerúsalem og Betlehem. Ef eitthvað var átti ég von á að Ísrael væri auðugra að sjá, þó ekki væri annað. Leiðsögumaðurinn dældi í okkur sögu sem var farin að ryðga eða við höfðum alls ekki heyrt. Mjög fróður og sagði vel frá, en á köflum aðeins of góður með sig og sína, fyrir minn smekk. En sagan auðvitað miklu flóknari og hrikalegri gegnum tíðina og reyndar miklu meiri flækjur í dag en maður fær af daglegum fréttum. Og átökin í dag, þó kaldranalegt að segja, kannki bara skuggi af því sem þau hafa verið gegnum aldirnar. Við heimsóttum Getsamanegarðinn, grátmúrinn, krossfestingarhæð og upprisuhelli í Jerúsalem og fórum seinna um daginn til Betlehem að skoða fæðingarstað Jesú. Í rauninni nöturlegt að rifja upp allar þær hörmungar sem þessir staðir hafa kostað, þetta eru bara staðir, steinar og dót. Allt saman heilagt og þess virði að drepa miskunnarlaust fyrir. Hlægilegt að hugsa til þeirra trúuðu andans manna sem tala niður til (okkar) sem ekki trúa á neitt sem fólks sem „trúir á stokka og steina“, sem er auðvitað ekki rétt, við trúum heldur ekki á stokka eða steina. Og að sjá svo þessa stokka og steina sem þeir trúuðu hafa verið að eltast við gegnum aldirnar, er það ekki að trúa á stokka og steina?

Kýpur

Stysta stoppið í ferðinni var í Limasol á Kýpur, við tókum rútu í bæinn og til baka, á milli fengum við okkur bjór, keyptum Muscat vín og Elato, kýpverskt nammi og hnetur, fengum okkur Moussaka og fórum til baka.

En sennilega sá staður sem við færum helst til í sumarfrí af þeim sem við heimsóttum, þó stoppið væri stutt þá minnti þetta á ódýra og rólega Nice.

Egyptaland

Fórum í skoðunarferð frá Alexandríu til Kaíró, pýramídar, Sfinx og matur á Níl. Sláandi fátækasta svæðið sem við keyrðum um, þriggja tíma ferð hvora leið, ekki kannski skemmtileg, en gaman að sjá hvernig þeir eru að rækta upp eyðimörkina, sem okkur var sagt að væri að frumkvæði Sadats.

Pýramídarnir voru svo sem nógu stórir og svakalegir en samt ekki svo heillandi. Allar kenningar um að pýramídarnir væru svo mikil og vönduð smíð að þetta hlyti að vera gert af geimverum eða öðrum máttarvöldum virkuðu jafnvel enn hlægilegri í návígi. Vissulega stórt og mikið og hefur kostað einhverja mannmánuði í vinnu, en greinilega bara fullt af fólki að vinna í marga áratugi. Leiðsögumaðurinn sagði okkur að það hefði komið í ljós að þeir hafi verið byggðir af bændum í sumarfríi en ekki þrælum. Má vera að þeir hafi unnið líka við þetta en það er ofvaxið mínum skilningi að einhver hafi puðað sjálfviljugur yfir sumarmánuðina við þetta, amk. miðað við hitastækjuna í maí.

Fórum inn í stærsta pýramídann gegnum loftlaus, lág göng og komumst að því að þar var ekkert að sjá og engin ástæða til að taka af okkur myndavélarnir.

Sölumennirnir fyrir utan voru enn ágengari en áður, einn hirti 20 dollara og 500 krónur (já, íslenskar) af Iðunni. Túristalöggan sem átti að passa ferðamennina fyrir óprúttnum sölumönnum var líka að maka krókinn á myndatökum, „aðeins 4 dollarar“.

Sfinxinn var, svona fyrir minn smekk, merkilegri en pýramídarnir, en hitinn var orðinn kæfandi og við stoppuðum ekki lengi.

Maturinn á fljótabátnum á Níl var svo sem ekki spennandi, magadansinn flottur og eins náunginn sem snerist hring eftir hring með einhvers konar pils eða hatt, en hvort tveggja full langdregið.

Síðasti dagurinn

Mót í 21, gekk betur en fyrra skiptið, en rétt misstum af úrslitunum, annars sama letilíf og fyrri siglingadaga. Fórum í fyrsta skipti í Spa hlutann og fengum frábært nudd.

Aþena

Fengum nokkra klukkutíma í Aþenu eftir að siglingunni lauk og áður en við flugum til London og ákváðum að reyna aftur að komast á Akrópólis, sem tókst og kom nokkuð á óvart, fengum einka leiðsögumann, sem rifjaði fullt af sögu upp, og vorum eiginlega nokkuð heilluð. Hefði ekki viljað missa af þessu.

London

Vorum eiginlega hálf lasin og hálf kvefuð, alltaf gaman að rölta um London og drekka bjór, en stóðum ekki í miklum stórræðum. Sáum Lewis Schaffer, uppistandara á The Arts Theatre, mjög góður og 3 frekar dapra uppistandara á Comedy Club kvöldið eftir. Fínn matur á indverska Rasa og hinum Thaílenska Busaba Eathai, frábær matur á japanska Roka en Passione nokkur vonbrigði. Spaghetti House og Cafe Pasta í Covent Garden buðu upp á fínt miðdagssnakk. En engir hljómleikar og ekki laust á Derren Brown. Sparks voru reyndar með hljómleikaröð þar sem þeir spiluðu eina stóra plötu á hverju kvöldi, „A Woofer In A Tweeter Clothing“ á laugardagskvöldinu, en þó ég hafi hlustað aðeins á hana í tónlistarhallærinu á fyrri hluta áttunda áratugarins þá endist hún ekki vel, og Iðunn hafði engan áhuga.