Amsterdam, sunnudagur

Ákvað að sleppa IBC, búinn að sinna því sem ég ætlaði að sinna og átti eftir að kíkja á nokkra staði.. til dæmis að drekka meiri bjór.

Meiri vindlar, eitthvað af fötum, líkjör á Wynand Fockink (sem ég veit ekki enn hvernig er borið fram) og eitthvert smádót.

Dundaði mér aðeins á  De Bekeerde Suster, kíkti á markað á torginu þar, allt í lagi kínverkst nudd og svo nautasteik á Gaucho, fín en eitthvað lítið spennandi.

Einn bjór í viðbót á Café Belgique og svo upp á hótel. Ég hafði hugsað mér að nýta nýja leigubílaþjónustu, Abel, enda átti ég afsláttarkóda – þeir eru hins vegar mjög dýrir ef maður vill vera kominn á réttum tíma, var orðinn of seinn í lest þannig að ég pantaði Uber.

Lítið að gera á Schiphol, innritun og leit gengu hratt fyrir sig, en það var bókstaflega allt lokað þegar ég var kominn inn. Flugið fínt og þjónustan bara vel yfir meðallagi, flaug með IcelandAir í þetta skiptið.

Amsterdam, laugardagur, IBC

Var rosalega þreyttur áður en ég fór að sofa, ákvað að slökkva á vekjaraklukkum og leyfa svefninum að hafa sinn gang. Enda svaf ég eins og steinn, svaf vel út en ekkert óheyrilega lengi. Morgunmatur á nálægum veitingastað og svo á IBC. Náði að heimsækja þokkalega mörg fyrirtæki, mikil þróun, betra streymi, meira gagnamagn, meiri upplausn, stærri skjáir og almennt svona frekar stöðugt framhald og fyrirtækin að ná hvert öðru.

360 gráðu myndavélar voru alls ráðandi í „Future Zone“ en eins flott og þetta er, hvort sem það eru hjálmar, hanskar eða kúlur.. þá sé ég ekki gagnið í framtíðinni.

Náði restinni af Arsenal-Southampton, fór á Paste e Basta og fékk frábæran mat, eðal þjónustu og alvöru stemmingu – þjónarnir skiptast á að syngja!

Svo upp á hótel í Sauna  og pott, datt inn á frekar undarlegan bar, fann engan frá RT Software en hitti Árna á EuroPub… Árni var hins vegar á leiðinni heim.  De Bekeerde Suster var lokuð þannig að þrátt fyrir að nenna ekki í Casino datt ég nú samt þangað, tapaði 50 Evrum í póker fyrir óþolandi heppnum náunga sem ætlaði að tudda mér út með tvær fimmur á móti mínum tveimur drottningum.. og gaurinn datt einmitt um þriðju fimmuna.

En, þarf svo sem ekki að kvarta, er í fínum plús á Casino heimsóknum.

Þaðan á LB Whisky barinn, þeir státa sig af hátt í þrettán hundruð tegundum af Whisky en áttu ekkert handa mér fyrr en í áttundu tilraun. Rölti svo upp á hótel í rigningunni, hafði hugsað mér að grípa einhvers konar rusl fæði en borgin var búin að loka.

Amsterdam, föstudagur

Tíunda ferðin á IBC í Amsterdam..

Alltaf gaman að koma til Amsterdam og alltaf sérstakt að mæta á IBC.

Hótelið, Grand Hotel Amrath, var fimm stjörnu, gamaldags og eðal hótel út í gegn, frábær þjónusta, flott þjónust og allt til alls, frítt á mini-bar, sauna, heitur pottur, sloppar og inniskór.

Ég þurfti aðeins að sinna annarri vinnu og það tók því ekki að fara á sýninguna.

Byrjaði á De Bekeerde Suster, þaðan að kaupa vindla hjá Hajenius, yfir á Pilsener Club þar sem ég hitti Árna Finns á rölti – við fengum okkur að sjálfsögðu bjór.

Hugmyndin var að prófa nú nýja veitingastaði í þessari ferð, en þeim á franska staðnum Bord’Eau var skemmt þegar ég kom og hélt að ég gæti fengið borð fyrirvaralaust. Þannig að ég rölti á Vasso, sem var ekki langt undan, og fékk frábæran mat. Kíkti við á EuroPub en fann engan sem ég þekkti (skilst reyndar að Árni hafi verið þarna) en datt svo á Café Belgique í bjór, þaðan á In De Wildeman í bjór og svo í meiri bjór á nálægan bar með Jason og Lindsay frá RT Software. Við sátum eitthvað fram eftir kvöldi en heilsan var ekkert rosalega þannig að við hættum til þess að gera snemma. Samt, einn bjór á  De Bekeerde Suster fyrir svefninn.

Fallhlífarstökk

Iðunn mætti í farþega fallhlífarstökk hjá Skydive við Hellu. Gekk frekar hægt að komast af stað og náðum rétt fyrir „í síðasta lagi“ tímann. En dagskráin hafði eitthvað riðlast og við þurftum að bíða talsvert. Brynja & Óskar mættu með Öglu og Einar, litla frænda Óskars. Iðunn varð reyndar fyrir því óláni að fá bolta óvænt í hausinn á meðan við biðum.

En þetta hafðist og Iðunn hafði amk. mjög gaman af, set myndir og videó seinna.

Eftir stökkið kíktum við í bústaðinn með Brynju & Óskari og börnum, skáluðum í alvöru kampavíni, Moet & Chandon, (ekki börnin reyndar) síðan alvöru nautasteik með viðeigandi rauðvíni.. Gyrðir & Stína litu svo við þegar leið á kvöldið.. ég var orðinn full þreyttur þegar leið á kvöldið, en Iðunn, Brynja & Óskar náði í heita pottinn.

fallhlif-235

Vissuferð

Við Staka og Talentufólk vorum alveg þokkalega dugleg að mæta í „vissuferð“ Stússs, sem er starfsmannafélag Deloitte. Fyrst mætt í fjórhjólaferð hjá Safari, ég ákvað að sitja hjá, en heyrðist fólk hafa skemmt sér mjög vel. Ég tók hins vegar þátt í leirdúfuskotfimi, gekk þokkalega og komið á bak við eyrað að heimsækja þá aftur.

Þaðan í grill og bjór í Gufunesi, en lét gott heita frekar snemma, enda mikið að gera á morgun.

leirdufur-1